"Azərbaycan Prezidenti İlham Əliyev məmurlara müraciətində xalqın bir nömrəli xidmətçisi olduğunu və hər məmurun xalqa layəqətlə xidmət etməsinin vacibliyini həmişə qeyd edir. Prezident vurğulayır ki, məmular xalqın içində olmalı, vətəndaşları narahat edən məsələləri üzə çıxarmalı və onların həllinə nail olmalıdırlar. Bu gün Prezident İlham Əliyev üç rayonun yeni təyin olunmuş icra başçılarını qəbul edərkən də bu istiqamətdə tapşırıqlarını verdi və onlara dedi ki, siz icra başçısı olaraq kadr seçimi məsələsini diqqətlə həyata keçirməlisiz".

Bunu açıqlamasında Milli Məclisin deputatı Elman Nəsirov deyib.

Deputat bildirib ki, görüş zamanı Prezident İlham Əliyev məmurlara ciddi xəbərdarlıq edib: "İcra başçıları vəzifələrə təyinat apararkən savadlı, bilikli, vətənpərvər və sədaqətli, həmçinin milli-mənəvi dəyərlərə sadiq, eləcə də ümumbəşəri dəyərləri paylaşa bilən, dövlətə və dövlətçiliyə faydalı kadrlara üstünlük verməlidirlər. Prezident vurğulayıb ki, icra başçıları komandalarını diqqətli şəkildə formalaşdıraraq rayonları uğurla idarə etməlidirlər. Kabinetlərdə oturaraq deyil, xalqın içində olub, onların problemlərinin həllinə yerində nail olmaq lazımdır. Eyni zamanda, Prezident kadr seçimi ilə bağlı ilk növbədə onu qeyd edib ki, tanışların, qohumların vəzifəyə gətirilməsi yanaşması qəbuledilməzdir. Belə prinsiplər əsasında rayonların idarəetməsini həyata keçirmək effektsizdir. Cənab İlham Əliyev, həmçinin vurğulayıb ki, rüşvət və korrupsiya yolunu seçmiş, şəxsi maraqlarını dövlət maraqlarından üstün tutan icra başçılarını hansı taleyin gözlədiyi məlumdur. Belə məmurlardan bəzilərinin həbs edilməsi, bəziləri barədə istintaq işinin davam etməsi isə əsl nümunədir. Yəni, ləyaqətlə xidmət edənləri karyera yüksəlişi gözlədiyi kimi, korrupsiya, rüşvət və qohumbazlıq yolunu seçənləri də cəza gözləyir. Bundan başqa, Prezident 44 günlük Vətən müharibəsi şəhidlərinin ailələrinin və qazilərin qayğıları ilə məşğul olmağın, onların rastlaşdıqları problemlərin həllində yaxından iştirak etməyin vacibliyini qeyd edib. Prezidentin dediyinə görə, tarixi qələbəmizin əldə olunmasında böyük xidmətlər göstərmiş vətəndaşların və onların ailə üzvlərinin diqqət və qayğı ilə əhatə olunmasına çalışmaq lazımdır. Bu gün baş tutan görüşdə cənab Prezident bu kimi məsələləri xüsusi qeyd edib və vacib mesajlar ötürüb".