Salyanda iş adamı polis rəisinə müharibə elan edib

gundemxeber.az Salyanın polis rəisi Fuad Məmmədli ilə, rayonun iş adamı, əvvəllər polis zabiti olmuş Səxavət Cəfərov arasında qarşıdurma var. Redaksiyamıza daxil olan məlumatda bildirilir ki, bu qarşıdurma artıq bir neçə ildir ki, davam edir. Mənbənin sözlərinə görə Azərbaycan müstəqillik qazandıqdan sonra, Salyan rayonu narkotiklərin tranzit yollarından biri olub. Belə ki, Azərbaycana daxil olan narkotikanın əsas paylaşma məntəqəsi əsasən Salyan şəhəridir.
Salyanın indiki polis şöbəsinin rəisi Fuad Məmmədli Salyana ilk dəfə polis rəisi təyin olunduqdan sonra rayonun narkobaronlarına qarşı ciddi mübarizə aparmağa başlayıb. Belə ki, uzun illər boyu Salyanda narkotika biznesinə məhz yerli polis zabitləri rəhbərlik edib. Narkotika ticarətinin ən şıdırğı vaxtı isə keçmiş rəis Hamlet Salahovun vaxtında olub.
Fuad Məmmədli isə Salyana birinci dəfə rəis gəldikdən sonra həmin dəstəni polisdən uzaqlaşdırıb və Salyandan narkotikanın bütün ölkəyə həmçinin xaricə daşınmasının qarşısını almaq üçün böyük işlər görüb. Lakin naməlum səbəblərdən həmin vaxt Fuad Məmmədli Salyandan uzaqlaşdırılaraq Qubaya rəis göndərildi. Fuad Məmmədlinin Salyandan uzaqlaşdırılmasından sonra Salyanda narkobiznes yenidən çiçəklənməyə başlayıb. Lakin bir müddət sonra, Fuad Məmmədli yenidən Salyana qaytarıldı və bir çoxlarının planı bununla pozuldu.
Mənbə bildirir ki, hazırda Fuad Məmmədli yenidən Salyanda narkobiznesə qarşı mübarizə aparmaqdadır. Lakin bir qrup insan bütün gücləri ilə Fuad Məmmədlinin Salyandan uzaqlaşdırılmasına çalışır. Mənbə həmçinin bildirir ki, Cənub və Neftçala istiqamətindən narkotikanı zamanında 7 baron qəbul edib və müxtəlif marşurutlarla realizə ediblər. Məhz həmin baronlar Fuad Məmmədli tərəfindən polisdən uzaqlaşdırılıb. Həmin sabiq polis zabitləri isə Fuad Məmmədliyə qarşı planlı olaraq bir neçə ildir ki, iş yürüdürlər.
Mənbənin bildirdiyinə görə Salyanın polis rəisinin bu gün ən böyük problem yaşadığı adamlardan biri məhz keçmiş iş adamı Səxavət Cəfərovdur. Səxavət Cəfərov Fuad Məmmədlidən daha əvvəl polis orqanlarından uzaqlaşdırılsa da, hazırda Salyanın polis rəisinə qarşı müxalifətə o, rəhbərlik edir. Belə ki, mətbuatda saxta araq biznesi ilə əlaqəli olduğu bildirilən Səxavət Cəfərov həmçinin Salyanın iş adamlarından biridir. Onun Salyanda bir neçə şadlıq evi fəaliyyət göstərir. Həmçinin Səxavət Cəfərovun Salyanda topdansatış məntəqəsi də fəaliyyət göslərir və bu topdan satış məntəqəsi vasitəsi ilə bir neçə rayona saxta araq satılır.
Mənbənin bildirdiyinə görə son olaraq Fuad Məmmədli ilə Səxavət Cəfərov arasında qarşıdurma məhz bu məsələnin üstündə olub. Polis rəisinin saxta araq sexlərinə reyd keçirmək istədiyini duyan Səxavət Cəfərov Salyanın Noxudlu və daha bir neçə kəndində yerləşən həmin sexləri bağlamağa məcbur olub. Bildirilir ki, hazırda rayonda qarşıdurma pik səviyyəyə çatıb. Bu qarşıdurmadan kimin qalib gələcəyini isə əvvəlcədən söyləmək mümkün deyil. Qeyd edək ki, Salyanın polis rəisi Fuad Məmmədli Nəqliyyat naziri Ziya Məmmədovun qardaşı oğludur.

Gəray