Ölkədə böyük ədalətsizlik var

Abşeron rayon Məhkəməsinin hakimi İlham Kərimli Azərbaycan məhkəmə sistemində analoqu olmayan, məhkəmələrin imicinə kifayət qədər mənfi təsir edən bir qərar imza atmışdır.
Belə ki, Abşeron rayon Məhkəməsinin hakimi İlham Kərimli tərəfindən çıxarılan 06 fevral 2014-cü il tarixli, 1(2012)-19/2014 saylı hökm ilə Əliyev Xəyal Nadir oğlu Azərbaycan Respublikası Cinayət Məcəlləsinin (bundan sonra ARCM) 177.2.1, 177.2.2, 177.2.3, 177.2.4-cü maddələrində nəzərdə tutulmuş cinayətlərin törədilməsində təqsirli bilinərək 1500 manat miqdarında cərimə cəzasına məhkum edilmiş, Məmmədov İlkin Balaqardaş oğlu AR CM-nin 177.2.1, 177.2.2, 177.2.3, 177.2.4-cü maddələrində nəzərdə tutulmuş cinayətlərin törədilməsində təqsirli bilinərək 1400 manat miqdarında cərimə cəzasına məhkum edilmiş, Mirzəyev Elnur Atakişi oğlu AR CM-nin 177.2.1, 177.2.2, 177.2.3, 177.2.4-cü maddələrində nəzərdə tutulmuş cinayətlərin törədilməsində təqsirli bilinərək 1000 manat miqdarında cərimə cəzasına məhkum edilmiş, İbadov Zaur Zahid oğlu AR CM-nin 177.2.1, 177.2.2, 177.2.3, 177.2.4-cü maddələrində nəzərdə tutulmuş cinayətlərin törədilməsində təqsirli bilinərək 3 il müddətinə azadlıqdan məhrumetmə cəzasına məhkum edilmiş, polis əməkdaşları onun əlinə qandal vuraraq aparmışlar, səhərisi gün hakim İlham Kərimli hökmünü dəyişdirərək Z.İbadovu 4000 manat miqdarında cərimə cəzasına məhkum etmişdir.
“Aygün-C” MMC-nin İbadov Zaur Zahid oğluna, Mirzəyev Elnur Atakişi oğluna, Əliyev Xəyal Nadir oğluna, Məmmədov İlkin Balaqardaş oğluna qarşı zərərin əvəzinin ödənilməsi tələbinə dair iddiası təmin edilməmiş, cinayət nəticəsində MMC-yə dəymiş ziyan məhkumlar tərəfindən ödənilməmişdir. Maraqlısı odur ki, hakim İlham Kərimli son məhkəmə iclasında MMC-nin nümayəndəsinin iştirakını təmin etməmək üçün məqsədli şəkildə 05 fevral 2014-cü il tarixə təyin edilmiş məhkəmə baş tutmamış, nümayəndə fikrini yazılı şəkildə bildirərək getmiş, həmin gün nahar fasiləsindən sonra nümayəndənin iştirakı olmadan məhkəmə iclası baş tutmuş, Z.İbadovun barəsində 3 il müddətinə azadlıqdan məhrumetmə cəzası təyin edilsə də, səhərisi gün İlham Kərimli həmin hökmü dəyişərək Z.İbadovu həbsdən azad etmişdir.
Z.İbadov və qeyrilərinin cinayət əməli ondan ibarətdir ki, “Aygün-C” MMC-nin ərazisində və onun istifadəsində olan yük avtonmobilləri və onların yarımqoşqularından qaldırıcı silindirin və digər ehtiyat hissələrini oğurlayaraq MMC-yə xeyli miqdarda maddi ziyan vurmuşlar, nəticədə bu ziyandan əlavə, MMC-yə 100.000 manatdan artıq əldən çıxmış fayda qismində əlavə ziyan dəymişdir.
Cinayət işinin materialları ilə sübut olunur ki, Zaur İbadov digər təqsirləndirilən şəxsləri sözügedən oğurluq cinayətini törətməyə təhrik etmiş, həmin cinayətin törədilməsini təşkil etmişdir.
Bütün bunlar ibtidai istintaq və məhkəmə istintaqı zamanı öz təsdiqini tapmış, ancaq məhkəmə qərarını hüquq normalarının tələblərini və işin faktiki hallarıını nəzərə almadan öz mülahizəsi və digər maraqları nəzərə alaraq qəbul etmişdir.
Məhkəmə ibtidai istintaq zamanı bir il müddətinə həbsdə qalmış digər 3 məhkum olunmuş şəxslərə cəmi on gün həbsdə qalmış Zaur İbadovla eyni cəza təyin etmişdir. Eyni cinayət əməllərini törətmiş üç şəxs bir il, digəri 10 gün həbsdə qalırsa, burada ədalət məhkəməsindən söhbət gedə bilməz. Ümumiyyətlə, məhkəmənin hökmü ədalət məhkəməsinin tələblərinə cavab verməmiş, sosial ədalətin bərpa edilməsinə nail olunmamışdır.
Hüquqlarının və qanunla qorunan mənafelərinin qorunması məqsədilə məhkəməyə üz tutan vətəndaşın qarşısına İlham Kərimli kimi bir hakim çıxacaqsa, ədalətin bərpasından və hüququn aliliyindən söhbət gedə bilməz.
Səfər