Bakı qana boyandı:Bakıda silahlı insident olub

Şahidlərin verdiyi məlumata görə, hadisə bu gün saat 11.30 radələrində Zabrat qəsəbəsi, 307 saylı orta məktəbin qarşısında qeydə alınıb.
Bir nəfər naməlum şəxs iki kişini güllələyib. Hadisə yerinə polis və prokurorluq əməkdaşları gəlib. Hazırda hadisə yeri müayinə olunur.
Sabunçu rayon Polis İdarəsinin 15-ci Polis Bölməsindən faktı təsdiqləyiblər.
Bildirilib ki, güllələnən şəxslərdən biri hadisə yerindəcə keçinib. Digəri isə ağır vəziyyətdə xəstəxanaya aparılır. Hazırda onların adı dəqiqləşdirilir.
Bakıda baş verən atışmada ölən və yaralanan şəxslərin adı açıqlanıb.
Sabunçu Rayon Polis İdarəsindən verilən məlumata görə, güllələnənlərdən 1994-cü il təvəllüdlü Yaqub Rabil oğlu Musayev hadisə yerində keçinib.
Onun qohumu, 1991-ci il təvəllüdlü Pərvin Cahid oğlu Mehdiyev isə ağır vəziyyətdə xəstəxanaya yerləşdirilib.
Hadisəni törədən şəxsin kimliyi isə hələlik bilinmir.
Faktla bağlı Sabunçu Rayon Prokurorluğu tərəfindən cinayət işi başlanıb, istintaq gedir.

******
Hadisə şahidləri isə bildiriblər ki, hadisə qisas zəminində törədilib. Belə ki, qətlə yetirilən Y. Musayevin atası Rabil Musayev iki il əvvəl hadisəni törədən şəxsin qohumunu qətlə yetiribmiş. Həmin şəxs də qisas almaq məqsədi ilə bu addımı atıb.
Xatırladaq ki, R. Musayevin iki əvvəl qətl törətməsi barədə məlumat yayılıb. Həmin məlumatda bildirilir ki, 2012-ci il yanvarın 6-da axşam saatlarında Zabrat qəsəbəsində Rabil Musayev adlı şəxslə onun tanışları - Rafael və Kamil Fərəcov qardaşları arasında münaqişə düşüb. Hadisə nəticəsində R. Musayev bıçaqla hər iki şəxsi bıçaqlayıb. R. Fərəcov ölüb, K. Fərəcov isə müxtəlif dərəcəli bədən xəsarətləri ilə xəstəxanaya yerləşdirilib.
Hadisəni törədən şəxs saxlanıb.

******
Elşən Məmmədəliyev hadisə yerindən son bilgiləri verib. O, bildirib ki, hadisəni törədən Fərəcov Kamildir. Onun 45-50 yaşlarında olduğu deyilir. Hadisə nəticəsində yaralanan Mehdiyev Mehdi 1991-ci il təvəllüdlüdür. Onun Sabunçudakı 3 saylı klinik xəstəxanaya aparıldığı deyilir. Hadisə nəticəsndə ölən şəxsin ad-soyadı isə Raqub Musayevdir. Onun 1994-cü ildə anadan olduğu deyilir. Əldə etdiyimiz başqa bir məlumata görə, hadisə nəticsəndə ölən və yaralanan hər iki gənc Türkiyədə ali təhsil alırmışlar.
O, bildirib ki, bu dəqiqələrdə yaralanan və ölən gənclərin ailə üzvləri hadisə yerinə gəliblər. Atəş "Vinçester" tipli ov silahı ilə açılıb. E.Məmmədəliyev bildirib ki, yerdə 5 giliz və qan ləkələri var.
Kamil Fərəcov hadisəni törətdikdən sonra "VAZ-210015" markalı avtomobillə ərazidən uzaqlaşıb.