Ötən gecədən başlayan və sulu qarla müşayət olunan güclü külək ölkənin bəzi şəhər və rayonlarında ciddi fəsadlar törədib. Məlumata görə, Bərdə və Tərtər rayonları işıqsız qalıb. Külək elektrik dirəklərini aşırıb, naqilləri sıradan çıxarıb, ağacları aşırıb. Kəndlərin bəzilərində evlərin dam örtüyünü atıb. Goranboyun dağlıq ərazilərində yerləşən yaşayış məntəqələri isə 10 sm qar altındadır.
Azərbaycanın şimal bölgəsinə də gecə saat 3-dən başlayaraq qar yağmağa başlayıb. Ən çox qar Qubanın Xinalıq kəndi ərazisində yağıb. Qarın qalınlığının 22 santimetr olduğu bildirilir. Qusarin Dağliqləzə kəndinin ərazisində isə 15 santimetr qalınlığında qar yağıb. Şimal bölgəsində havanın temperaturu 10 dərəcəyə qədər aşağı düşüb.
Bu gün səhər saatlarından Şəkiyə də qar yağıb. Bəzi dağlıq hissələrdə qarın hündürlüyü 20 sm-ə çatıb. Güclü küləklə müşayiət olunan qar bölgədə bəzi fəsadlara da səbəb olub. Regional elektrik şəbəkəsindən aldığımız məlumata görə, dunən axşam saatlarından başlayan güclü külək və səhər saatlarından əraziyə düşən yağıntı bölgənin bəzi rayonlarında elektrik xəttlərinin qırılmasına səbəb olsa da, hazırda fəsadlar aradan qaldırılır. həmin ərazilərə enerji verilişi bərpa olunub.

***
Daşkəsən rayonu ərazisində - 10 dərəcə şaxta müşahidə olunub. Yaşlı insanlarımız deyir ki, bu tarixdə, hətta aprel və mayda qar yağması faktı olub, lakin bu, cəmisi bir neçə dəqiqə çəkib. Qışın öz tufan və çovğunu ilə geri qayıtması və saatlarla qar yağması kimsənin yadına gəlmir. Məsələnin bir maraqlı tərəfi də budur ki, qar yağışı ilə paralel olaraq bu gün Bakıda göy gurultusu da müşahidə edilib. Yol polisi isə sürücülərə diqqətli olmağı, Bakı-Şamaxı-Yevlax avtomobil yolunun Ağsu aşırımında avtomobillərdən istifadə etməməyi tövsiyə edib.
ANS