Azad Mehdiyev 1800 manata satdığı torpağın sənədlərini Fərziyevlərə vermir

Lənkəran rayonu, Girdəni kənd bələdiyyəsinin sədri Azad Mehdiyev vətəndaşları aldadaraq, onlara satdığı torpaqların sənədlərini düzəldəcəyi adı altında pul alır. Bu barədə redaksiyamıza kənd sakini Mətanət Fərziyeva məlumat verib. Girdəki kənd sakini bildirir ki, ötən ilin may ayında o, 3 sot torpaq almaq istəyi ilə bağlı bələdiyyə sədri Azad Mehdiyevə müraciət edib. Bələdiyyə sədri isə ondan həmin ərazinin müqabilində 1800 manat pul istəyib. M.Fərziyeva bir gün sonra yaşlı anası Gülqədəm Fərziyeva ilə birlikdə razılaşmaya əsasən bələdiyyə sədrinə 1800 manat verirlər və Mehdiyev onlara deyir ki, qısa müddətdə torpağın sənədləri hazır olacaq. «Bir ay sonra bələdiyyə sədri bizdən daha 200 manat istədi. Həmin pulu birtəhər düzəldib verdik. Azad bizə bildirdi ki, problem yoxdur, ən geci 5 günə sənədləri hazır edib verəcək. Amma həmin müddətdən 1 ildir keçir, sənəd hələ də hazır deyil».
Lakin proses uzandıqca kənd sakinlərinin də səbr kasası daşmağa başlayır və onlar dövlət qurumlarına kömək üçün müraciət edirlər. İlk olaraq Lənkəran İcra Hakimiyyətinə üz tutan Fərziyevlər qısa müddətdə icra başçısının qəbuluna düşə bilirlər. Taleh Qaraşov məsələni öyrəndikdən sonra bələdiyyə sədri Azad Mehdiyevə qəti şəkildə tapşırır ki, vətəndaşlara satdığı torpağın sənədi hazırlayıb qısa müddətdə çatdırsın. Amma A.Mehdiyev icra başçısının dediklərinə «bəli», «baş üstə» dedikdən sonra yenidən ortalıqlardan yox olur.
Sonuncu belə vəd isə mayın 8-dən ibarət olub. Belə ki, Mehdiyev Fərziyevlərə vəd edib ki, mayın 8-də torpağın sənədləri hazır olacaq və sahiblərinə veriləcək. Hətta, bununla bağlı Ədliyyə Nazirliyi Bələdiyyələrlə Mərkəz və Omdusman Aparatına məlumat verilir. «Lakin Daşınmaz Əmlakın Reyestri Lənkəran İdarəsində sənədlər hazır olsa da, bələdiyyə sədri yenidən müxtəlif bəhanələr gətirir. Ailə üzvləri torpaqa almaqlarına da peşman olublar».
ELMAN