Dəyərli dostlar, hörmətli həmkarlarım!

Cəbhənin Ağdam istiqamətində, Çəmənli kəndinin ərazisində təmas xəttini pozan Ermənistan tərəfinə məxsus vertolyotun vurulması yəqin ki, ən azından yaxın bir həftə, on günü gündəmi zəbt edəcək hərbi, hərbi-siyasi mövzu olacaq. Hesab edirəm ki, bu Azərbaycanın xeyrinə olan bir hadisədir və biz bundan maksimum istifadə etməliyik. Artıq bəzi ermənipərəst qüvvələr var-gücü ilə «qara məni basınca, qoy qaranı mən basım» prinsipi ilə hərəkətə keçiblər. Məni ən çox narahat edən isə ATƏT-in baş katibi Lamberto Zannierin çox yersiz və qərəzli münasibəti oldu ki, məhz o haqda fikirlərimi sizlərlə bölüşmək istərdim.
Yəqin ki, diqqətli oxucular və hörmətli həmkarlarım yaxşı xatırlayırlar ki, mən istər ATƏT olsun, istərsə də digər irili-xırdalı beynəlxalq qurumların Ermənistan və Azərbaycan qoşunlarının təmas xəttində baş verənlərə, insan itkilərinə, mülki şəxslərin üzləşdikləri çətinliklərə biganə münasibəti hiddət doğurmaya bilməz. Ən yaxın tarixə nəzər salanda, bu ilin avqustunda cəbhə bölgəsində ondan çox hərbçisini itirən Azərbaycan Silahlı Qüvvələrinin hərbi qulluqçularının, həmçinin öz doğma ocaqlarına, ata-babalarının məzarlarını ziyarət edərkən girov götürülmüş Dilqəm Əsgərovun və Şahbaz Quliyevin vəhşicəsinə təhqir edilməsinə, Həsən Həsənovun isə işgəncələrlə qətlə yetirilməsinə son dərəcə biganə yanaşan ATƏT-in «xristian damarı» dərhal özünü göstərməyə başladı. Avropa Parlamentindəki dinləmələrdə çıxışı zamanı ATƏT-in baş katibi qeyd edib ki, bu hadisələr onsuz da qeyri-sabit olan vəziyyət kontekstində böhranın daha da genişlənməsinə səbəb ola bilər. Yəni, ATƏT insidentdən narahatdır və belə hadisələr böhranın miqyasını artıra bilər.
Vallah mən ATƏT «başbiləni» Lamberto Zanyerin hansı «etibarlı mənbəə»lərinə əsaslanaraq belə tez-tələsik bəyanat verməsini, bu haqda narahatçılığını bildirməsini anlamadım. Bu cənabdan sorusmaş lazımdır ki, ay filan zat, erməni kimi qaniçənin hərbçisinin, onun iki cüt, bir tək döyüş vertolyotunun …. Azərbaycan ərazisində nə işi var ki, onu da bizim əsgərlər vururlar? Və ümumiyyətlə özünə hörmət edən hansı ölkə imkan verər ki, onun başı üzərində düşmən ordusunun hərbi təyyarəsi, yaxud vertolyotu fırlansın?? Son illər Dağlıq Qarabağda və ətrafındakı hadisələrdən «çox narahat», «bərk narahat», «dərindən narahat» olan beynəlxalq qurumlar birdəfəlik anlamalıdırlar ki, artıq Azərbaycan xalqının səbr kasası daşmaq üzrədir. Belə daha davam edə bilməz.
Qeyd edim ki, Ermənistan ordusunun işğal olunmuş Azərbaycan torpaqlarında keçirdiyi hərbi təlimlər hələ bir neçə gün də davam edəcək. Dünən baş vermiş məlum insidentdən sonra düşmən tərəf mütləq mənada mövqelərimiz üzərində döyüş manevrləri yerinə yetirməyə və yeni-yeni təxribatlar törətməyə cəhd edəcəkdir. Ona görə də, ayıq-sayıqlıq birə beş artırılmalıdır. Qətiyyən boşluğa və özbaşınalığa yol vermək olmaz.
Sonda, onu da qeyd etməyi vacib sayıram ki, Müdafiə Nazirliyinin rəhbərliyinin müddətdən artıq həqiqi hərbi xidmət hərbi qulluqçusu, manqa komandiri Muradov İlkin Məmməd oğlunu dərhal xidməti vəzifəsini yerinə yetirərkən sayıqlıq və igidlik göstərərək düşmənin Mi-24 tipli döyüş helikopterini vurduğuna görə «Hərbi xidmətdə fərqlənməyə görə» 3-cü dərəcəli medalı ilə təltif etməsi, həmçinin ona qiymətli hədiyyənin verilməsi də çox gözəl bir addımdır. Məhz belə də olmalıdır.
Eşq olsun, Azərbaycan əsgərinə!!! Vuran əlləriniz var olsun!!!