Mobil operator şirkəti 1 tarif paketinin maxinasiyasından ayda 10 milyon qazanır (Araşdırma)
Son vaxtlar müxtəlif KİV-də yeni ildən kommunal xidmət haqlarının artırılacağı haqda yazılar getməkdədir. Adətən belə yazılar sonda Tarif Şurasının bu barədə verdiyi açıqlamalarla bitir. Bu da təbiidir. Ölkədə tarif qiymətlərinin müəyyənləşdirilməsi Tarif Şurasının səlahiyyətindədir. Ölkədə çox bahalı və şişirdilmiş tarif qiymətlərinin olduğu bir çox sahələr vardır. Çox bahalı və şişirdilmiş tarif qiymətlərinin mövcud olduğu sahələrdən birinin (bəlkə də birincisinin) mobil operator şirkətlərinin: Bakcell və NarMobili şirkətlərinin olduğu heç kimə sirr deyildir. Xüsusən, Bakcel şirkətinin soyğunçu qiymət tarifləri, istehlakçıları aldadan reklamlardan gen-bol istifadə edilməsi və bununla da, Azərbaycanda qüvvədə olan qanunların kobud surətdə pozulması barədə çox yazılıb.




Bizim bu günki, yazımız əsas soyğunçu operator olan Bakcell şirkəti haqqındadır. Etiraf edək ki, mobil rabitə danışıq qiymətlərində Bakcell NarMobili dən xeyli insaflıdır. Ancaq internet tariflərində Bakcell NarMobili dən heç də geri qalmır. Ən pisi isə odur ki, Bakcell öz reklamlarında vəd etdiyi yüksək sürətli interneti istehlakçıya verə bilmir.Bakcellin reklamına bir daha diqqət yetirək: "Sür@ İnternet paketləri; Sür@ - hədləri aşan İnternet; Sür@ – gücdür! Sür@ – dinamikadır; Sür@ – enerjidir; Hamı Sür@-li olmağı xoşlayır. Elə bir insan tapılmaz ki, Sür@-i sevməsin. İnternetdə videoları tutulmadan izləmək, lazımi faylları vaxt itirmədən yükləmək, sosial şəbəkələrdə daim ünsiyyətdə olmaq Sür@-lə daha sərfəlidir.” Belə cəlbedici reklamdan sonra Bakcell 3 növ tarif paketi təklif edir: 1. Gündəlik İnternet 2. Trafikli paketlər 3. Limitsiz İnternet. Trafikli paketlər 30 gün müddətində istifadə edilir. MB-ın həcmindən asılı olaraq qiymətlər 1AzN-dən 4 AzN-ə qədər dəyişir. Yəni: 1 manata-40 MB, 2 manata-120 MB, 3 manata- 360 MB və 4 manata 600 MB internet təklif edilir.Ən maraqlısı (daha doğrusu soyğunçuluq) bundan sonra başlayır. Bakcell öz reklamında və özünün bakcell.com saytında bildirir ki: Trafik bitdikdən sonra İnternetdən istifadə dayandırılmayacaq və qoşulduğunuz tarif planına əsasən müvafiq məbləğ balansınızda qalan vəsaitdən çıxılacaq. Əsl həngamə də bundan sonra başlayır.
Bütün bu deyilənləri yoxlamaq üçün gundemxeber.az olaraq kiçik bir praktiki araşdırma apardıq və telefona 2 AzN dəyərində 120 MB yüklədik. Reklamda bizə hətta filmə, videoya baxmaq imkanı vəd edilməsinə baxmayaraq adi facebook səhifəsinə girmək özü problemə çevrilirdi. Buna görə də ay ərzində üst-üstə 40-50 dəqiqə internetə girməyə və istifadəyə cəhd etdik. Bakcelldən mesaj aldıq ki, artıq bizim vaxtımız bitib və bundan sonra internetdən istifadəmiz: "ödəniş GPRS xidmətinin adı tarif planına əsasən həyata keçiriləcək.” Bu mesajdan 1 saat sonra isə məlum oldu ki, bizim balansımızda cəmi 1 qəpik pulumuz qalıb. Hansı ki, mesajı aldıqda balansımızda 1 manat 86 qəpik pulumuz var idi. Bu müddətdə yalnız 1 dəfə zəng etmişdik. Təxminən 45-50 saniyə davam edən danışığa görə 2 qəpik hesabdan silinmişdi. Səhəri gün ehtiyatla balansa 1 manat yüklədik. Yenə də, heç bir danışıq etmədən balansımız 1 qəpiyə düşdü. Bundan sonra balansımızı dostlarımizın "İANƏSİ” hesabına hər dəfə 20 qəpik olmaqla artırırdıq. Bakcell bu "İANƏLƏRƏ” toxunmadı. Bundan sonra "ianəni” 40 qəpik etdik. İlk 22 saniyəlik ( yəni 1 qəpik dəyərində ) zəngi başa vuran kimi balansımız anındaca yenə 1 qəpiyə düşdü. Qısası 5 gün müddətində balansımızdan (daha doğrusu cibimdən) 3 AzN-dən artıq pul çırpışdırıldı. Əgər Bakcellin dediyinə və yazdığına inansa idik, bizdən 2 Azn silinən kimi. Biz yenə də 30 gün müddətinə 120 MB internet paketi əldə etməli idik. Reallıqda isə bütün bunlar baş aldatmaqdan (soyğunçuluğu pərdələyən söz yığınından başqa bir şey deyilmiş. Hər gün 1000-lərlə, on 1000-lərlə Bakcell abonenti olan vətəndaşlarımız bax beləcə günün günorta vaxtı soyğunçuluğa məruz qalırlar. Nəzərə alsaq ki, Bakcell abonentlərinin sayı milyonlarla ölçülür, onda oğurlanan pulların fantastik məbləği barədə təsəvvür yaranar.
Balaca bir hesablama kifayət edər ki, real olaraq oğurlanmış milyonlarla manat təsəvvür edilsin. Hər gün cəmi 30000 nəfər bu tələyə düşüb, 1 manat itirsə bu ay ərzində 900 min manat, il ərzində isə 10 milyon 950 min manat, yaxud 14 milyon ABŞ dolları edər. Biz yalnız 1 tarif paketinin qiymətlərini təhlil etdik. Digər 2 tarif paketini də bura əlavə etsək aldığımız 4 rəqəmi 2-3 dəfə artırmalı olacağıq. Maraqlıdır Bakcellin, NarMobili nin bu özbaşınalığına kimlər və nəyin xatirinə göz yumurlar?
P.S. Mövzuya qayıdacağıq. Qarşı tərəfi dinləməyə hazırıq.