İki gün öncə “avtoşdan” rüşvət aldığına görə həbs olunması xəbəri yayılan yol polisi hazırda iş başındadır.

gundemxeber.az AzNews.az-a istinadən xəbər verir ki, Nəsimi rayon Polis İdarəsinin Dövlət Yol Polisi Şöbəsinin (DYPŞ) əməkdaşı Rəşad Quliyev gözlənilmədən öz postuna qaytarılıb. Xəbəri dəqiqləşdirməkdən ötrü AzNews.az-ın əməkdaşı təqsirli bilinənən şəxsin özü — Rəşad Quliyevlə əlaqə saxlayıb. O, həqiqətən də işə çıxdığını təsdiqləyib. Rəşad Quliyev bildirib ki, barəsində yayılan xəbərlər doğru deyil:

“Yalan söhbətdi. Mən məzuniyyətə getmişdim. Sonra bildim ki, mənim barədə belə məlumat yayılıb. Heç biri doğru deyil. Yalnış məlumatdır. Nəsə anlaşılmazlıq olub”. Qeyd edək ki, yol polisinin rüşvət üstündə həbs olunması ilə bağlı məlumatı rəsmən təsdiqlənmişdi.

Xatırladaq ki, Nəsimi rayon Polis İdarəsinin Dövlət Yol Polisi Şöbəsinin (DYPŞ) inspektoru Rəşad Quliyev vəzifə səlahiyyətlərini aşaraq, rüşvət alarkən «iş başında» yaxalanıb. Avtosifer.az saytının yaydığı məlumata görə, avtoxuliqanlıq əməlinə görə saxlanılan sürücüdən 500 manat rüşvət istəyib. Sürücü bu barədə hüquq-mühafizə orqanlarına məlumat verib və əməliyyat planı hazırlanıb. Əməliyyat nəticəsində R.Quliyev həmin sürücüdən rüşvət alarkən iş otağında həbs olunub.