Ölkədə məhkəmə və ədliyyə sistemində aparılan islahatlar hələ də bu sahədəki problemləri tam aradan qaldırmır. Belə ki, bəzi məhkəmələrdə hakim və icra məmurlarının birtərəfli qərar qəbul etməsi sonda tərəflərdən birinin hüquqlarının pozulması ilə nəticələnir. Bu da vətəndaşlarda məhkəmələrin obyektivliyinə olan inamı azaldır.
Redaksiyamıza müraciət edən Gədəbəy rayonunun Nərimankənd sakini Ramil Məmmədov da bu cür qanunusuzluğun qurbanına çevrildiyini iddia edir. Şikayətçi məhkəmə icraçılarının qərəzli qərarından əziyyət çəkdiyini bildirir. Şikayətçi yazır ki, bir neçə il Gədəbəy rayonundakı Covdar mis-qızıl mədənində işləyib: “Mən mədəndə işləyəndə Əsgərov Abbas Əhməd oğlu orada yüksək vəzifədə çalışırdı. 2012-ci ilin dekabrında A.Əsgərov məndən 30 qəpikdən 3 ton kartof aldı. Mədəndə bir yerdə işlədiyimizə görə ona inandım. Ancaq aradan 10 ay keçməsinə baxmayaraq, A.Əsgərov 900 manat məbləğində mənə verəcəyi pulu ödəmədi”.
Şikayətçi qeyd edir ki, məsələ ilə bağlı hüququndan istifadə edərək məhkəməyə müraciət edib. Məhkəmə iddianı təmin edib və zərərin ödənilməsi barədə qərar çıxarıb. Amma icra məmurları onu hələ də süründürməklə məşğuldur: “Azərbaycan Respublikası Mülki Məcəlləsinin 21-ci maddəsini və Azərbaycan Konstitusiyasının 68-ci maddəsini rəhbər tutaraq mənə dəyən zərərin ödənilməsini tələb etmək hüququm var. Odur ki, Qaradağ Rayon Məhkəməsində A.Əsgərova qarşı iddia qaldırdım. 19 novabr 2013-cü il tarixdə Qaradağ Rayon Məhkəməsinin hakimi Fuad Hüseynov ədalətli qərar çıxartdı. Ancaq Əsgərov Abbas Əhməd oğlunun dediyinə görə, onun həyat yoldaşının əmisi prokuror işlədiyi üçün məhkəmənin qərarını icra etməyəcək, belə ki, mənim pulumu ödəməyəcək.
Əslində A.Əsgərovun dediklərində həqiqət var, Qaradağ Rayon Məhkəməsinin icra qrupu öz vəzifəsini icra etməyi bacarmır. Halbuki Azərbaycan Konstitusiyasının 129-cu maddəsində (Məhkəmə qərarları və onların icrası) göstərilir:
1. Məhkəmənin qəbul etdiyi qərarlar dövlətin adından çıxarılır və onların icrası məcburidir;
2. Məhkəmə qararının icra olunmaması qanunla müəyyən edilmiş məsuliyyətə səbəb olur;
3. Məhkəmə qərarı qanuna və sübutlara əsaslanmalıdır.
Təəsüflər olsun ki, icra məmurları öz vəzifələrini hansı maraqlara görəsə icra etmirlər. Zərəçəkənin tərəfini yox, qarşı tərəfin hüququnu müdafiə edirlər. Bu da Azərbaycan Respublikasının qanunlarına hörmətsizlik, qanunların dövlət məmurları, məhkəmə icraçıları tərəfindən pozulması deməkdir. Eyni zamanda, İnzibati Xətalar Məcəlləsi Maddə 313-1. Məhkəmə və digər orqanların qərarlarının icrası ilə əlaqədar icra məmurunun tələblərinin yerinə yetirilməməsi. Madda 313-1.3. Borclunun hesablarında taləbkarın tələblərinin təmin edilməsi üçün yetərli pul vəsaitlərinin olmasına baxmayaraq, təqdim olunmuş icra sənədlərinin borcludan pul vəsaitlərinin tutulmasınıa dair tələblərinin mıüəyən edilmiş müddətdə icra edilməməsinə görə vəziifəli şəxslər min manatdan üç min manatadək miqdarda, hüququ şəxslar dörd min manatdan altı min manatadək miqdarda cərimə edilir. Ancaq məhkəmə icra məmurları öz üzərlərinə düşən məsuliyyəti unudurlar”.
Çarəsiz qalan şikayətçi məsələ ilə bağlı prezident İlham Əliyevə müraciət edib: “Hörmətli cənab Prezident! Məsələyə Sizin müdaxilənizi istəyərək, xahiş edirəm, məhkəmə qərarının icra olunması üçün mənə kömək edəsiniz”.
Qarşı tərəfin də mövqeyini işıqlandırmağa hazırıq.