“Gündəm Xəbər”in redaksiyasına daxil olan məlumatlara görə, Tovuz rayonunu sözün əsl mənasında yeyib üstündən də, su içirlər. Bunu da kimlər edir... Bizi

içimizdən gəmirən, “kreslo” və vəzifəsini satın alaraq Tovuzda burda mənəm, Bağdadda kor xəlifə deyənlər. Araşdırmalar nəticəsində Tovuzun həm təhsilini, həm əhalisini soymaqla məşğul olanlar məlum olub. Agentliyə gələn sonu bitməyən müraciətlərdə Tovuzda bir sıra özbaşınalıqlar, korrupsiya və vəzifəsindən sui-istifadə halları baş alıb getdiyi bildirilirdi. Bunu aid etmək üçün başlayaq ilk öncə Tovuzun təhsilindən. Burada çox ifrat şəkildə əhalinin hüquqları tapdanır. Bütün şikayət və faktlara rəğmən Rayon Təhsil Şöbəsinin müdiri Validə Hüseynova icraatında olduğu sahənin mükəmməl olduğunu, bütün maxinasiyaları ört-bastır etməyə çalışsa da alınmır. Artıq sorub-sovurduğu rayon camaatının səbri tükənib və əsasən kənd camaatının şahidliyinə arxalanaraq onların bu ağılasığmaz dərəcədə füsunətli maxinasiyalarla dolandırılmasına razı olmadıq. Tovuz təhsilinin bərbad günə düşməsində təkcə yerli aidiyyəti qurumlar təqsirkar deyil, bu işdə icra başçısı, polis, məhkəmə, ələlxüsus Təhsil Nazirliyi və Təhsil Nazirliyindən hər ay təhsili yoxlamağa gələnlərə qədər bir çox digər instansiyalar günahkardır. Belə ki, rayon məktəblərində, ümumilikdə rayon təhsilində baş verən özbaşınalıqlar, korrupsiya halları, vəzifədən sui-istifadə, talama, mənimsəmə, zəbt etmə və s. kimi hallara qarşı kəskin mübarizə birbaşa onların səlahiyyət həddindədir. Lakin nədəndirsə, heç kəs bunu görmür ya da görmək istəmir. İndi biz deyək, sonra siz qərar verin Tovuzumuzu və Tovuzdakı həmvətənlərimizi bu cür qan içən tamahkar insanların əsarətində qoymaq olar, yoxsa yox....

Təhsil şöbə müdiri meydan sulayır...

Tovuz rayon təhsil şöbəsinin rəhbəri Validə Hüseynova təhsildə sözün əsl mənasında meydan sulayır. Yəni istədiyini edir. Onsuz da nə baxan var, nə də bir söz deyən...və bu səbəbdən də qeydə alınan mənfi hallar baş alıb gedir. Ərz olunan məlumata görə, V. Hüseynovanın müdir vəzifəsinə təyinatının rayonun icra başçısı tərəfindən həyata keçirilib. Bəlkə bu səbəbdən də V.Hüseynova Tovuz təhsilində arxayın şəkildə çapıb-talama siyasəti yeridir? V.Hüsynovanın Tovuz təhsilinə qarşı düşmənçiliyini özündə əks etdirən bir neçə fakta nəzər yetirək. O ,hələ Puşkin adına Tovuz rayon tam orta məktəbdə direktor işləyərkən, bu vəzifənin və “kreslonun” nə qədər yağlı tikə olduğunu görüb, nəticə etibarilə deputat olmaq arzusuna düşübmüş. RİH başçısı Tofiq Zeynalovun xeyir-duası ilə namizədliyini irəli sürsə də, seçilə bilməyib. Neynəsin yazıq, Tovuz üçün sayı-hesabı olmayan əməklərini nəzərə alsaq və onun fikirincə “yağlı tikə”yə əli çatmadığından təki “kreslom” olsun deyib, RİH başçısının köməkliyi ilə Tovuz təhsilinin rəhbəri olur. V. Hüseynova heç nədən və heç kimdən çəkinmir. Niyə qorxmalıdır? Xəbər gəzir ki, guya o Zeynalovlar kimi nəhənglərə arxalanır. Arxası möhkəm olanın nə qorxacağı olmalıdır?

Məktəb direktorları qarət olunur.....

Xatırladaq ki, V.Hüseynovanın təhsillə bağlı sərişdəsi demək olar ki yoxdur, buna görə də, aidiyyatı işlərdən hali olmaq üçün, İmayıl Tağıyevi V. Hüeynovaya təyin edirlər. Deməli, V. Hüseynova bir çoxlarının istədiyi kimi kreslo sahibi olur. Yəni heç nə etmir, amma kreslosu və talayıb-tökmə kimi fürsət tapmış olur. Onun əvəzinə isə bunları bu işlərdən başı çıxan köməkçi icra edir. Lakin qeyd edək, İ.Tağıyev nə qədər hali adam olsa belə, nə camaatdan, nə də mətbuatdan heç nə yayınmır. V.Hüseynova

şöbəyə müdir gələn kimi rayonun bütün məktəb direktorlarından “təbrik” (qeyd edək ki, quru-quru təbrik yox ha....yəni pullu təbrik!) gözləyib və bu prosesi xüsusi bir gün kimi təqvimə yazıb. Kresloya elə gəlməyib axı bu xanım... Bəs, xeyir-duanı ala bilməkdən ötrü kürünlə pul xərcləyib. Havayı nə var ki? Hə, indi də verdiyi pulları bu rayonu sovuraraq çıxartmaq istəyir. Birinci də başlayıb məktəblərdən. Direktorlardan yığdığını yığıb, gözü doymayan V. Hüseynova Həmçinin Tovuz rayon məktəbləri üçün ayrılmış yanacaq, qışa hazırlıq, kommunikasiya və s. pullarını da şəxsi büdcəsinin hesabına yazıb. Bundan əlavə, bu tamahkar insan bütün şagirdləri aidiyyatı şəxsə 10 manatdan yanacaq pulu, digər vəsaitlər üçün müəyyən miqdarda əlavə pul alıb. “Xeyir-duanı da verəndə gərək belə möhkəm verəsən ki, Canlı “toz sovuran” kimi hərəkət edə biləsən. Bizdə məsələ bir az fərqlidir. Tovuzda sovuran toz yox, pul sovurur.

Qeyd edək ki, rayonun bəzi məktəblərində elektrik enerjisindən istilik kimi istifadə edirlər. Bəzi kənd məktəblərinin direktorları isə açıq şəkildə etiraf edirlər ki, V.Hüseynova onları əməlli-başlı gözüm-çıxdıya salıb və pul tələb edir. Artıq dərs saatlarına da əl qoyub.

Bizdə olan məlumatlara əsasən, Tovuz rayon məktəblərində bütün ştatlar dolu olsa da, faktiki olaraq, həmən ştatların əksəri üzrə çalışan yoxdur. Məsələn, məktəblərin heç birində psixoloq, laborant, kitabxanaçı və s. yoxdur, amma ştat üzrə məvacib alınır. Əcəba bu maaşları kim alır? Kürünlə pul verdiyi kreslosunun pulunu çıxartmağa çalışan V.Hüseynova. Heç onun cibinin yanından pul necə yan keçə bilər axı? Deyilənə görə, kim ki səsini çıxardır, qulaqlayıb göndərirlər naməlum səmtə. Ona görə hamı qorxur və bu acınacaqlı halla barışır. Hətta bu vəziyyətə artıq alışan yazıq camaat V.Hüseynovanın şöbəsinə “Bank” deyirlər. Vallah bank bu qələti eləməz..... adının anonim saxlanmasını istəyən bir müəllim, onların məktəbinə 5 nəfər ingilis dili müəllimi ştatının olduğunu, lakin cəmi iki müəllimin dərs keçdiyini bildirib. Elə ay yoxdur ki, maaşlarından 20-30 manat tutulmasın. Bu pullar da düz V. Hüseynovanın şəxsi büdcəsinə gedir. Görün, bu andra qalmış “kreslo” nə qədər qiymətlidir! Bütün bu olanlardan elə çıxır ki, ölkə başçısı cənab İlahm Əliyevin özbaşına məmurlara ciddi xəbərdarlığı V.Hüseynovanı qətiyyən narahat etmir. V.Hüseynovanın canına vəl-vələ düşüb... Araşdırmanın və saytda yer alan bu xəbərlərdən sonra, Tovuz rayon təhsil şöbəsinin müdiri Validə Hüseynovanın özbaşına və qanunazidd əməlləri ilə bağlı rayonda və rayonun təhsil şöbəsində əməlli-başlı ajiotaja səbəb olub. Verilən məlumatlara əsasən, 6 ayda üst-üstə cəmi-cümlətanı 1 ay işdə olan, səlahiyyətlərini də qismən müavini İsmayıl müəllimə həvalə edən, hətta icra hakimiyyətinin iclaslarından belə yayınan Validə Hüseynova başını itirib. İsmayıl müəllimə onun icazəsi olmadan Tovuz rayon məktəbləri bir nəfər belə olsun, jurnalist qəbul etməmələri üçün qəti şəkildə tapşırıq verib. Sən demə, Tovuz təhsilində vəziyyət danışılanlardan daha bərbad, daha acınacaqlı imiş. Əks halda, Validə Hüseynovanın belə ehtiyat etməsinə nə anlam vermək olar?