Akif Nağı: “İttihamları qəti şəkildə qəbul etmirik”; İqbal Ağazadə: “Ehtimal edirəm, Vüqar Əliyevi yanlış informasiya əsasında həbs ediblər”; Baş Prokurorluq və DİN rəsmi məlumat yaydı, onlar vətəndaşları Suriyaya aparmaqda təqsirləndirilir; Akif Nağı isə ittihamlarla razılaşmır


Azərbaycan vətəndaşlarını Suriyada gedən döyüşlərə cəlb edən şəxslər tutulub. Daxili İşlər Nazirliyi və Baş Prokurorluğun mətbuat xidmətlərindən musavat.com-a daxil olan birgə məlumatda qeyd olunur ki, respublikanın hüquq-mühafizə orqanları cinayətkarlıqla mübarizə sahəsində Tərtər rayonunda növbəti xüsusi əməliyyat tədbiri həyata keçiriblər.

Daxili İşlər Nazirliyinə müraciət edən rayon sakini yetkinlik yaşına çatmayan oğlunun radikal dini cərəyana cəlb olunmaqla Suriyaya göndərildiyini və orada qanunsuz silahlı birləşmələrin tərkibində döyüşlərdə iştirak etdiyini bildirib. Aparılan araşdırmalarla Tərtər ərazisində ayrı-ayrı vətəndaşların ölkə hüdudlarından kənarda qeyri-qanuni fəaliyyət göstərən silahlı birləşmələrin sıralarına qoşulmasını təşkil edən, dini dözümsüzlük və bölücülük təbliğatını aparan ekstremist yönümlü şəxslərdən ibarət mütəşəkkil cinayətkar dəstə müəyyən edilib. Nazirliyin xüsusi təyinatlı polis qüvvələri də cəlb olunmaqla Baş Mütəşəkkil Cinayətkarlıqla Mübarizə İdarəsi, Tərtər Rayon Polis Şöbəsi və prokurorluğunun əməkdaşları tərəfindən həmin dəstənin 4 üzvü - əvvəllər məhkum olunmuş Zülfüqar İbrahimov, Mübariz Mirzəliyev, Şəmsəddin Abdullazadə və Vüqar Əliyev saxlanılıblar.

Onların yaşadıqları mənzillərə baxış zamanı ümumilikdə 2 ədəd sandıqçası ilə birlikdə 1 avtomat, 800 qram partlayıcı maddə, alışdırıcıları ilə birgə 9 əl qumbarası, 170 ədəd patron, yayılması qanunla qadağan olunmuş xeyli sayda dini ədəbiyyat, disklər və digər maddi sübutlar götürülüb.

Faktla bağlı cinayət işi başlanılıb, istintaq aparılır. Hazırda mütəşəkkil dəstənin cinayətkar əlaqələrinin ifşası, habelə, digər üzvlərinin müəyyən olunaraq məsuliyyətə cəlb edilməsi istiqamətində təxirəsalınmaz istintaq və əməliyyat tədbirləri davam etdirilir.

Martın 10-da musavat.com Qarabağ Azadlıq Təşkilatına (QAT) istinadən təşkilatının iki üzvünün həbsi barədə məlumat yaymışdı. Məlumatda bildirilirdi ki, QAT sədri Akif Nağı həbslərin qanunsuzluğu ilə əlaqədar baş prokurora və daxili işlər nazirinə müraciət edib. Rəsmi məlumatda adı keçən Zülfüqar İbrahimov və Vüqar Əliyev QAT üzvləridir və onlar martın 10-u, səhər saatlarında saxlanılıb.



A.Nağı rəsmi müraciətində bildirib ki, təşkilat üzvlərinin təqsirinin olduğuna inanmır: “Tam məsuliyyətlə sizə bildirirəm ki, bu, qurama bir işdir, rayon səviyyəsində hansısa məmurun intriqası və qərəzindən başqa bir şey deyildir. Zülfüqar İbrahimov və Vüqar Əliyev nümunəvi, qanuna tabe olan vətəndaşlardır, heç bir qrupla əlaqələri yoxdur, heç vaxt heç bir yabançı və zərərli təbliğatla məşğul olmayıblar. Hesab edirik ki, bu yanlışlıq və ədalətsizlik dərhal aradan qaldırılmalıdır. Hansısa məmurun bu cür qərəzli hərəkəti hakimiyyətin imicinə də zərbə vurur, cəmiyyətdə, xüsusilə də cəbhəyanı ərazilərdə mənəvi-psixoloji duruma mənfi təsir göstərir”.



QAT sədri Akif Nağı 11 martda “Yeni Müsavat”a dedi ki, hazırda atılacaq addımlarla bağlı məsləhətləşmələr gedir: “Müəyyən addımlarımız olacaq. Bu gün vəkillə müqavilə imzalanıb, ancaq onun təqsirləndirilənlərlə görüşü mümkün olmayıb. Saxlanılanların qohumları Prezident Administrasiyasına və DİN-ə gedib, qəbula yazılıblar. Ancaq ittihamları qəti şəkildə qəbul etmirik”.

A.Nağı onu da dedi ki, artıq deputatlar da məsələyə müdaxilə edib: “Zülfüqar İbrahimli Böyük Quruluş Partiyasının üzvüdür, partiya sədri və deputat Fazil Mustafa da məsələyə reaksiya verib. Həmçinin deputat İqbal Ağazadə də aidiyatı üzrə müraciətlər edib, hələ bir nəticə yoxdur”.

Tərtərdə Suriyada hökumət qüvvələrinə qarşı vuruşmaq üçün dəstə toplamaqda şübhəli bilinərək həbs edilən Vüqar Əliyev “Ümid” Partiyasının keçmiş üzvüdür. Xəbəri “Yeni Müsavat” a açıqlamasında “Ümid” Partiyasının sədri İqbal Ağazadə verib.

İ.Ağazadənin sözlərinə görə, partiya sıralarından 2010-ci ildə tamamilə ayrılan Vüqar Əliyev din yox, dünyəvi görüşləri ilə seçilirmiş: “Vüqar Əliyev ciddi karyerası olan bir şəxsdi. O, Gənclər və İdman Nazirliyinin tərkibindəki qurumlardan birində beynəlxalq əlaqələr üzrə katib olub. Eyni zamanda Avropa Şurasında Azərbaycan gəncliyini təmsil edirdi – Avropa Şurasının milli komitəsində gənclər üzrə katib idi. O heç vaxt dindar olmayıb, heç vaxt namaz qılmayıb. Onun çalışdığı ən son qurumlardan biri Avroatlantik məkana inteqrasiya ilə bağlı bir QHT idi”.



İqbal Ağazadə bildirir ki, radikal dini qurumlara mənfi münasibəti ilə seçilən Vüqar Əliyev yeznəsi vəhhabi olduğuna görə bacısını ondan boşatdırmışdı: “Bu gün keçirilən əməliyyatda həbs edilən Zülfüqar İbrahimov Vüqar Əliyevin bacısını keçmiş qaynıdır. Yeznəsi vəhhabilərə qoşulduğu üçün Vüqar bacısını belə bir adamla yaşamasına qarşı çıxdı və onları ayırdı. Vüqar Əliyevin kiçik qardaşı isə 2003-cü ildə “Qarabağ partizanları”nın tərkibində tutulmuşdu. Sonradan Vüqar Əliyev qardaşının da həmin dəstədən tamamilə uzaqlaşdırdı. Ehtimal edirəm ki, onu yanlış informasiya ilə həbs ediblər. Mən bu insanı 2003-cü ildən tanıyıram. Onun dinə münasibəti tamamilə fərqli olub”.

İqbal Ağazadə deyir ki, Vüqar Əliyev son bir neçə ildə həm də kiçik bizneslə məşğul idi: “Onun Goranboyda çörək sexi vardı. Eyni zaman da beynəlxalq qurumlardan birinin, səhv etmirəmsə, SOS-un Gəncə regional təşkilatına rəhbərlik edirdi. 2013-cü ilin sonlarına qədər o, SOS-da çalışırdı”.

İqbal Ağazadə ümid edir ki, istintaq tədbirləri zamanı bütün detallara aydınlıq gətiriləcək.

Elşad, Aygün