Əgər yadınızdadırsa, hələ avqust ayında Leyla xanım Əliyevanın təşəbbüsü ilə kimsəsiz və sahibsiz ev heyvanları üçün sığınacağın inşa olunmasına başlanılmışdı. Leyla Əliyevanın dəstəyi ilə başladılan “İnternational Dialogue for Environmental Action” kampaniyası dünyada bitki və heyvan növlərinin qorunması istiqamətində insanları daha diqqətli olmağa, bioloji balansın önəmini anlamağa və onu qoruyub saxlamağa səsləyir.

Hesab edirəm Leyla xanım Əliyevanın canlı varlıqların, heyvan və bitki aləminin qorunması istiqamətində saysız-hesabsız fəaliyyətinin fərqinə varmaq üçün sadəcə xatırlamaq kifayət edir. Amma əfsuslar olsun ki, bu gün Azərbaycanda Leyla Əliyevanın bütün bəşəriyyət və insanlıq adına nümayiş etdirdiyi mərhəmət hissinin aşılanması bir sıra kürsülülər tərəfindən acımasızca dəf edilməkdədir. Bir çox insanların Allahın ədalətinə və mərhəmətinə sığınaraq, xanım Əliyevanın bu yöndə gördüyü insani keyfiyyətlərin dəyərləndirilməsi üçün dua edirlər. Bu gün acımasızlıq edib küçədəki sahibsiz itləri öldürmək, yandırmaq kimi aktları həyata keçirənlər məhz Bakı meriyasının sərəncamı ilə fəaliyyət göstərənlərdir. Görəsən Hacıbala Abutalıbov xanım Leyla Əliyevanın qərar və tapşırıqlarına niyə məhəl qoymur? Niyə ətraf mühitdə qəddarlğın və zalımlığın təbliğatını aparır? Hacıbala Abutalıbov nəyə və kimə xidmət edir? Əldə edilən məlumatlara görə, sahibsiz küçə itləri məhz Bakı şəhər İcra Hakimiyyətinin (BŞİH) Sahibsiz Heyvanlara

Qarşı Mübarizə Departamentinin əməkdaşları tərəfindən günün günorta çağı, insanların gözü qarşısında vəhşicəsinə öldürülür. Ən acınacaqlısı da odur ki, BŞİH əməkdaşları bunu uşaqların, xəstə adamların gözü önündəcə həyata keçirirlər.

Bu ilk növbədə insani keyfiyyətlərə zidd olan bir əməl olmaqla yanaşı ətraf mühitə zor tətbiq etməkdə, baxıma möhtac heyvanlara əziyyət etməkdə, körpə və gənclərin tərbiyəsinin zalımlıq və qəddarlıq toxumunu səpməkdən dolayı BŞİH məsuliyyətə cəlb olunmalıdır. Bu yöndə gərəkən araşdırılma aparılmalıdır. Sahibsiz itləri insanların gözü qarşısında amansızlıqla qətlə yetirib sonra da onları Balaxanı qəsəbəsində Sahibsiz Heyvanlara Qarşı Mübarizə Departamentinə məxsus ərazidə kütləvi şəkildə yandırırlar. Burada iki məqama toxunmaq gərəkir. Bincisi, sözügedən department əgər ölüm aktını həyata keçirirsə, bunun harası mübarizə departamenti olur? Bu düpbədüz “Sahibsiz Heyvanların Ölüm Departamenti” adlandırılmalı idi. Çünki qətl və öldürmək mübarizə yolu hesab olunmamalıdır.

Onu da qeyd edək ki, küçələrdə olan quduz itlərdən əziyyət çəkən, şikayətçi olan sakinlər də az deyil. Amma bu ona əsas vermir ki, adını “quduzluqla mübarizə” qoyub itin biri 30 manatdan rastına çıxan küçüyü belə öldürəsən. Gözdən yayınmayan məqamlardan biri də odur ki, bu günlərdə Bakı şəhər İcra Hakimiyyətindən verilən məlumata görə, onlar sahibsiz quduz itləri öz krematoriyalarında yandırırlarmış. Utanmadan öz qəddarlıqlarını nümayiş etdirən bu məxluqların bunun üçün dövlətdən pul aldıqlarını eşitmək isə olduqca acıdır. Bəzi saytlarda əksini tapmış tükürpədici statistik

məlumatı nəzərinizə çatdırsaq, it öldürənlərin də məqsədlərinin maliyyə olduğunu görərik.

Təkcə 2009-cu ilin statistikasına görə, bir itin öldürülməsi dövlət büdcəsinə 30 manata başa gəlir. Adamı yandırıb tökən də odur ki, itlərin öldürülməsinə hələ 2009-cu ildə dövlət büdcəsindən 2 milyon 370 min manat vəsait ayrılıb. İtlərin öldürülməsi statistikası hər il artdığına görə, bu məbləğin də artdığı şübhəsizdir. Çünki hələ 2011-ci ildə - “Eurovision-2012” mahnı müsabiqəsi ərəfəsində Bakıda minlərlə küçə iti öldürülmüşdü. Qarşıdan isə Avropa Oyunları gəlir. Bu isə o deməkdir ki, itlərin öldürülməsi üzərindən də maliyyə əldə etmək niyyətində olan Bakı şəhəri İcra Hakimiyyəti artıq geniş miqyaslı işlərə başlayıb. Bu da onu deməyə əsas verir ki, Bakı şəhər İcra Hakimiyyəti sahibsiz itlərin öldürülməsindən belə maliyyə köçürmələri əldə edir. Nəzərinizə çatdıraq ki, xaricdə tibb ona görə irəliləyir ki, çünki onların həkimləri bir sıra tibbi nailiyyətləri məhz elə sahibsiz və çarəsi tapılmayan xəstəlikləri olan heyvanlar üzərində müəyyən tətqiqatların aparılması ilə nail olurlar. Çarəsi tapıla bilinən sahibsiz heyvanlarının xəstəlikləri təbii ki, müalicə olunur. Onlar sahibsiz itləri əməliyyat belə etdirirlər, korlara və polislərə xidmət göstərməsi üçün həmin itlərə xüsusi təlimlər keçib onları insanlar üçün yararlı olması da təmin edilir. Çarəsiz xəstəlikləri olan heyvanlar üzərində isə insanlara xeyri dəyə biləcək preparatların hazırlanması üçün tətqiqat aparırlar. Daha bizim “ağıllı” və “son dərəcə elmli” bir sıra üzdəniraq həkimlər kimi ağıllarına gələn dərmanı insan üzərində tətbiq edib dəlləkliyi öyrənirlər.

Bir sözlə, itləri öldürüb insanlar üzərində tədqiqat aparmağı daha üstün tutanlarımız olduğu sürəcə vay ki, vay bizim halımıza…

Ülkər