Asif Ağayevin idarəçiliyi rayonu ayağa qaldırıb, onun adı “qara siyahı”ya salınıb

Şamaxının icra başçısı Asif Ağayev üçün “əcəl zəngi” çalınır. Rayonda qarışıqlığın yaranmasına səbəbkar olan rayon rəhbəri adını “qara siyahı”ya saldırıb. Bu barədə “Gündəm xəbər”in əldə etdiyi məlumata görə, A.Ağayev artıq gərginliyi sakitləşdirmək və yuxarı dairələrin qəzəbini soyutmaq üçün səfərbər olub.

İcra hakimiyyətindəki kabinetində otura bilməyən A.Ağayev ona gələn zənglərdən sonra olduqca narahatdır.

Mənbə iddia edir ki, ölkədə sosial gərginlik olan ərəfədə belə bir xəta daha faciəvi sonluqla bitərdi. Sadəcə, bəxti gətirib. Buna baxmayaraq, icra başçısı özünü töhmət alacaq məmurlar cərgəsinə qoşub.

Qaynağımız iddia edir ki, icra hakimi təşvişə düşüb. Qeyd edək ki, rayonun Göylər kəndinin 200-ə yaxın sakini icra nümayəndəsinin işdən çıxarılması və yollarının bərbad olmasına etiraz ediblər.

Bu məqsədlə Şamaxı İcra Hakimiyyətinin binası önündə etiraz aksiyası keçirilib. Məlumata görə, 200-ə yaxın rayonun Göylər kəndinin sakinləri İcra Hakimiyyəti binasının önünə toplaşaraq, icra başçısı ilə görüşmək istədiklərini bildiriblər.

Onlar üzləşdikləri yol problemi və kəndin icra nümayəndəsi Xəlilovun işdən çıxarılmasına etiraz ediblər. Lakin icra başçısı Asif Ağayev onları qəbul etməkdən imtina edib. Bu da əlavə gərginliyə səbəb olub.

Əvəzində polis rəisini önə verərək, etirazçılarla onun görüşməsini istəyib. Polis rəisi isə Göylər kəndinin sakinlərini qəbul edərək, onların problemlərini dinləyib və məsələlərin həllinə yardımçı olacağını bildirib.

Etirazçılar bildiriblər ki, Şamaxıda idarəçilik tamamilə nəzarətdən çıxıb. Buna səbəb kimi isə icra başçısının işdə tapılmaması, rayonda özbaşınalıq üçün şərait yaratmasını göstəriblər. İcra başçısının müavini Qasımov rayonu idarə edən şəxsdir. Elə icra başçısı da ondan çəkinir. Çünki müavinin arxasında duran şəxs yüksək vəzifədə çalışanlardan biridir. Bunu özü də açıq şəkildə bəyan edir.

Hələ ARDNŞ prezidenti Rövnəq Abdullayev yaxın qohumu, “Azəriqaz”ın sədri Əkbər Hacıyevin tikinti işləri üzrə müavini vəzifəsinə özünün tələbə yoldaşı, əslən Sabirabad rayonunun Ulacalı kəndindən olan Asif Ağayevi təyin etmişdi.

Bir neçə il öncə “Azəriqaz”da tikinti sahəsində 6 milyon manata yaxın dövlət vəsaitinin yoxa çıxmasının üstü açılanda Əkbər Hacıyev Rövnəq Abdullayevə Asif Ağayevin ondan xəbərsiz yeyintiyə yol verdiyini bildirmişdi. Bu həmin Asif Ağayevdir.

Çətin duruma düşən Asif Ağayev infarkt keçirərək xəstəxanaya düşmüşdü. Bundan sonra Rövnəq Abdullayev Asif Ağayevi bağışlayaraq onu “Azəriqaz”dan çıxarmışdı. Tələbə yoldaşını əvvəlcə dənizdə tikinti şöbəsinə müavin, sonra isə şöbə rəisi təyin etmişdi. Maraqlı məqam odur ki, dövlətin külli miqdarda vəsaitinin yoxa çıxmasına görə heç kim nə cəza alıb, nə də tutduğu vəzifəsindən uzaqlaşdırılaraq barəsində tədbir görülüb.

Rövnəq Abdullayev isə adı korrupsiya faktında hallanan Asif Ağayevin Şamaxıya icra başçısı təyin olunması üçün çox çalışıb. Qaynağımızın sözlərinə görə, Asif Ağayevin icra başçısı təyin olunmasını eşidən ARDNŞ işçiləri şoka düşüblər. Onlar təəccüblənir ki, milyonları mənimsəyən adam yüksək vəzifəyə necə təyin olunub?