"Nazirlik iddia edirdi ki, bayram yarmarkalarında məhsulların qiyməti bazardan aşağı olacaq. Bunun adı "bayram yarmarka"sıdır, əslində bura bazardır. Qiymətlər hətta bazardan bahadır və məhsullar keyfiyyətsizdir. Məhsulu yarmarkaya gətirib satanlar istehsalçılar-region əhalisi deyil, alverçilərdilər".

Bu sözləri Kənd Təsərrüfatı Nazirliyinin Yasamal rayonunda açdığı yarmarkada alver etməyə gələn paytaxt sakini Arzuman Quliyev deyir.

Novruz bayramı ilə əlaqədar Bakı şəhər əhalisinin kənd təsərrüfatı və ərzaq məhsullarına artan tələbatının ödənilməsi, istehlakçıların seçim imkanlarının artırılması, süni qiymət artımının və möhtəkirliyin qarşısının alınması məqsədi ilə 14-19 mart 2015-ci il tarixlərində Kənd Təsərrüfatı Nazirliyi paytaxtda kənd təsərrüfatı məhsullarının satış yarmarkalarını təşkil etdiyini elan edib.
Söhbət etdiyimiz Bakı sakinləri "bayram yarmarkası"nda çeşidlərin az, məhsulların isə keyfiyyətsiz və baha olmasından şikayətlənirlər.

Alverçilər bahalığa səbəb kimi istehsalçının qiyməti qaldırmasını və daşınma xərclərinin artmasını əsas gətirdilər. Çeşidlərin az və məhsulların keyfiyyətsiz olmasına gəldikdə, ticarətçilər bu iddia ilə qismən razılaşaraq bildirdilər ki, istehsalçılar məhsulların əsas hissəsini Rusiya bazarlarına satmaqda maraqlıdırlar.

Müşahidə etdim ki, nazirlik tərəfindən yarmarkada nümunəvi səliqə-sahman yaradılıb. Yarmarkada nəzarət tərəzisi qoyulduğu deyilsə də, onu görən olmadığını bildirdilər. Onun da şahidi oldum ki, lövhələrdə qiymətlərin bazardakılarla müqayisəsi göstərilməyib. Belə ki, həmin lövhədə bazardakı qiymətlər yazılmayıb.

Ticarətçi Məhəmməd bildirdi ki, qiymətlərin artmayacağını birmənalı şəkildə demək mümkünsüzdür: "Kənd təsərrüfatı məhsullarının bir hissəsi ölkədə istehsal olunsa da, müəyyən hissəsi xaricdən gətirilir. Fakt budur ki, hər iki məhsul arasında qiymət fərqi yox səviyyəsindədir. Bayramqabağı bizdə həmişə qiymət artıb. İstehsalçılarda belə bir psixologiya var ki, məhsullarını saxlayıb bayram ərəfəsində baha satsınlar. Niyə? Ona görə ki, yeyən də, yeməyən də bayramda evinə bazarlıq edir. Axı bizdə qonşudan geri qalmamaq prinsipi var. Bunu istehsalçı da gözəl bilir. Keçən ilə nisbətən qiymət artımının səbəbini soruşduqda istehsalçılar bizə deyirlər ki, mövsümə uyğun olmayan məhsulları bayram üçün saxlayıblar. Və onu ucuz satmaq istəmirlər. İstehsalçı məhsulu saxlamaq üçün əziyyət çəkdiyini deyir. Yəni qiymət artımına səbəb psixoloji amil də rol oynayır. Bununla yanaşı ölkədə bütün sahələrdə bahalaşmanı da unutmayaq, bunun da qiymətlərə təsiri var".
Ticarətçilərlə söhbətdən o da məlum oldu ki, məhsullarını Rusiya bazarına satan azərbaycanlıların bazarına İrandan xiyar və pomidor məhsulları gətirilir. Burada İran məhsulu olan keyfiyyətsiz konfetlərə də rast gəldim.

Satıcı Elnur etiraf edir ki, keyfiyyətsiz məhsullar bazarda satılmadığı üçün bayram yarmarkasına gətirib: "Mən alverçiyəm. Onsuz da hər həftənin sonu keçirilən yarmarkalarda iştirak edirəm. Bizim bazarda da yerimiz var. Yarmarkaya gələn müştərilər məhsulun ucuz olmasını istəyir, onun keyfiyyətinə önəm vermirlər. Belə demək olarsa, bura gələnlər kasıb təbəqədir. Onlar üçün keyfiyyət əsas deyil, qiymət əsasdır. İmkanlılar isə keyfiyyətli məhsulların satıldığı bazarlara və super marketlərə üz tuturlar. Odur ki, kim keyfiyyətli məhsul istəyirsə, buyursun bazara. Burda keyfiyyətdən danışmaq mənasızdır".

Satıcılar Novruz bayramında daha çox istifadə edilən çərəzlər Balakəndən və Ordubaddan gətirildiyi deyilir. Müxtəlif çeşiddə olan çərəz məhsulları bazar qiymətindən da baha satılırdı. Qiymətlər 9-16 manat arasında dəyişirdi.

Bahar bayramının simvolu olan səməninin ən yaxşıları 2 manatdan başlayırdı.
Şahidi olduq ki, bayram yarmarkası Abbas Mirzə Şərifzadə və Mətbuat prospektində tıxacların yaranmasına səbəb olub. Belə ki, yarmarka ilə əlaqədar olaraq General Akim Abbasov küçəsinin A.M.Şərifzadə küçəsi ilə kəsişməsindən Mirəli Seyidov küçəsi ilə kəsişməsinə qədər olan hissəsində nəqliyyat vasitələrinin hərəkəti hər iki istiqamətdə məhdudlaşdırılıb.

Nəqliyyatı İntellektual İdarəetmə Mərkəzi sürücülərə alternativ olaraq Nazim Hikmət küçəsindən istifadə etmələrini tövsiyə edir.

Ramid İBRAHİMOV
Fotolar müəllifindir