Məhkəmə polislərə müqavimət göstərənləri cəzalandırdı

Gəncə Apellyasiya Məhkəməsində polisə müqavimət göstərməkdə təqsirli bilinən Tovuz rayon sakini, 1985-ci il təvəllüdlü Hüseyn Əliyev və onunla birlikdə mühakimə olunan Ramid Cəbrayılovun cinayət işi üzrə məhkəmə prosesi başa çatıb.

Hüseyn Əliyev 18 fevral 2014-cü il tarixdə, gecə saat 00.00 radələrində idarə etdiyi “BMW” markalı avtomobil ilə Tovuz şəhəri, Heydər Əliyev prospekti ilə hərəkətdə olarkən həmin prospektdə yerləşən parkın qarşısında tanışları Natiq Abdullayevin “VAZ-21074” markalı avtomobillə Bəxtiyar Ələkbərovun “Qaz-31105” markalı avtomobili toqquşmasını görüb. Həmin vaxt ora Hüseyn Əliyevin dostu Ramid Cəbrayılov özünə məxsus “Niva” markalı avtomobillə gəlib.

Hüseyn Əliyev və Ramid Cəbrayılovdan əvvəl baş vermiş yol nəqliyyat hadisəsi barədə verilmiş məlumata əsasən, Tovuz Rayon Polis Şöbəsinin Dövlət Yol Polisi Xidmətinin inspektoru, polis kiçik serjantı Cavid Məmmədov və baş inspektor, polis kapitanı Tanrıverdi Hüseynov, polis baş leytenantı Əli Quliyev hadisə yerinə gəliblər. Hüseyn Əliyev Əli Quliyevin xidməti vəzifələrini yerinə yetirməsinə öz qanunsuz müdaxilələri ilə mane olub. O,

polis baş leytenantına qəza törətmiş sürücüsü tanışı olduğunu, hadisənin onluq olduğunu deyib və polisə hadisə yerinin sənədləri tərtib etməsinə imkan verməyib.

Həmin vaxt Əli Quliyev bu hərəkətlərinə görə Hüseyn Əliyevə iradını bildirib. Bu zaman Hüseyn Əliyev “səndən səkkiz aydır ki, yanıqlıyam, sənin üstündən maşınla keçməyi özümə söz vermişəm”,-deyə polis baş leytenantını hədələməyə başlayıb. O, həmçinin polisin ünvanına nalayiq sözlər işlədib və sinəsindən tutaraq başı ilə sifət nahiyəsinə zərbə endirməyə cəhd göstərib.

Ramid Cəbrayılov isə Əli Quliyevi arxadan tutub. Bundan istifadə edən Hüseyn Əliyev polis baş leytenantını yumruqla vurub. Bundan sonra Hüseyn Əliyev və Ramid Cəbrayılov Əli Quliyevə çoxsaylı yumruq və təpik zərbələri endiriblər. Hüseyn Əliyev Əli Quliyevin əynində olan polis əməkdaşına məxsus xüsusi geyim forması hesab edilən göy rəngli gödəkçəsini cırıb.

Nəticədə onlar Əli Quliyevə boyunun sol yan səthində sıyrıqlar və bel nahiyənin sol tərəfində qançırlar kimi sağlamlığa zərər vurmayan xəsarətlər yetiriblər. Cavid Məmmədov və Tanrıverdi Hüseynov mübahisəni sakitləşdirdikdən sonra Hüseyn Əliyev istifadəsində olan “BMW” markalı avtomobili Əli Quliyevin üstünə sürüb və onu vuraraq sağlamlığı üçün təhlükəli zor tətbiq etməyə

cəhd göstərib. Lakin Əli Quliyev cəld kənara çəkildiyi üçün avtomobil ona dəyməyib.

Hər iki təqsirləndirilən şəxs Cinayət Məcəlləsinin 315.2-ci (hakimiyyət nümayəndəsinə qarşı müqavimət göstərmə və ya zor tətbiqetmə) maddəsi ilə ittiham ediliblər. Tovuz rayon Məhkəməsinin hökmü ilə Hüseyn Əliyev 3 il 6 ay müddətinə azadlıqdan məhrum edilib. Zamində olan Hüseyn Əliyevin barəsində başqa yerə getməmək barədə qəti imkan tədbiri ləğv edilib və o, məhkəmə zalından həbs edilib. Zamində olan digər təqsirləndirilən Ramid Cəbrayılovun barəsində Cinayət Məcəlləsinin 70-ci (şərti məhkum etmə) maddəsi tətbiq edilib və o, şərti cəza alıb. Məhkəmə zalından həbs edilən Hüseyn Əliyev apelyasiya şikayəti verərək barəsində Cinayət Məcəlləsinin 70-ci maddəsinin tətbiq edilməsini istəyib. Onun şikayəti araşdırılması üçün Gəncə Apellyasiya Məhkəməsinə göndərilib.

Hakim Bədəl Əliyevin sədrliyi ilə keçirilən prosesdə çıxış edən Hüseyn Əliyevin vəkili Yolçu Abbasov bildirib ki, Hüseyn Əliyevə təyin olunmuş cəza həddindən artıq ağırdır: “Hüseyn Əliyev ittiham olunduğu cinayətin ictimai-təhlükəliliyinə və onun şəxsiyyətinə uyğun olmayan ağır cəza olduğu üçün hökm ona aid hissədə dəyişdirilməlidir və onun cəzası yüngülləşdirilməlidir. Hüseyn Əliyevin həmin əməli tam əsaslandırılmayaraq, Cinayət Məcəlləsinin 315.2-

ci maddəsi ilə tövsif edilib. Məhkəmə belə qərara gələrkən hökmdə göstərib ki, Hüseyn Əliyev hadisə vaxtı öz maşınını zərərçəkmiş polis əməkdaşı Əli Quliyevin üstünə sürüb, onu vurmaq istəyib. Onun bu hərəkəti polis işçisinin həyatı və sağlamlığı üçün təhlükəli zor tətbiqetmə hesab olunur. Həmin zor tətbiqetmə əməli subyektiv cəhətdən real hərəkətlərdə ifadə olunmayıb. Məhkəmədə Hüseyn Əliyev və şahidlər ifadə veriblər ki, o, münaqişənin sonunda öz maşınına oturub, yüksək sürətlə hərəkətə gətirərək avtoxuliqanlıq hərəkətləri nümayiş etdirib. Onun polis işçiləri və çoxsaylı adamlar toplaşmış yolda, təhlükəli manevrlər etməsi polis əməkdaşı Əli Quliyevin üstünə sürmə, onu vurmağa cəhd kimi qiymətləndirilib. Hesab edirik ki, Hüseyn Əliyevin həmin hərəkəti onun özünü göstərmə, nümayiş etdirmə məqsədi daşıyıb və polis işçisinin həyatı üçün təhlükəli zor tətbiq etməyə yönəlməyib. Bu səbəbdən Hüseyn Əliyevin əməlində Cinayət Məcəlləsinin 315.2-ci maddəsinin tərkibini yarada bilməz”.

Vəkil daha sonra qeyd edib ki, hadisə vaxtı Hüseyn Əliyev Ramid Cəbrayılovla birgə Əli Quliyevlə yaxalaşaraq dartışıblar və onlar bir-birlərini vurublar. Vəkil bildirib ki, Hüseyn Əliyev və Ramid Cəbrayılovun hərəkəti də Cinayət Məcəlləsinin 315.1-ci maddəsinin tərkibini təşkil edir: “Düzgün olaraq məhkəmə Ramid Cəbrayılovun əməlini

Cinayət Məcəlləsinin 315.2-ci maddəsindən 315.1-ci maddəsinə tövsif edib, lakin Hüseyn Əliyevin əməlinin tövsifində daha çox zərərçəkmiş və digər iki polis işçisinin ifadələrinə əsaslanıb. İş materiallarından görünür ki, həmin avtomaşının toqquşması ilə əlaqədar hadisə yerinə çoxlu sayda adam toplaşıb. Hüseyn Əliyevin polisin üstünə maşın sürməsinin polis işçilərindən başqa, təsdiq edən heç bir şahid ifadəsi yoxdur. Bundan əlavə, məhkəmə təqsirləndirilən şəxs Hüseyn Əliyevə cəza təyin edərkən, onun cəmiyyətdən təcrid olunmadan islah olunmasının mümkünlük məsələsini müzakirə etməyib, eyni zamanda təyin edilən cəzanın onun ailəsinin həyat şəraitini hədsiz dərəcədə pisləşməsini nəzərə almayıb. Hüseyn Əliyev ali təhsilli, gənc ailəli olmaqla, himayəsində iki körpə uşağı var, işləməyən arvadı və şəkər xəstəliyindən əziyyət çəkən anası himayəsində olmaqla, ailənin yeganə dolandırandır”.

Yolçu Abbasovun sözlərinə görə, müdafiə etdiyi şəxs hadisələrin təsadüfi axarı zəminində cinayət xətasına yol verib: “Eyni zamanda Hüseyn Əliyev zərərçəkmişlə barışıb, zərərəçəkmiş məhkəmədə ondan heç bir şikayəti və tələbi olmadığını bildirib. Bundan əlavə, Hüseyn Əliyev məhkəmə ərəfəsində qəzaya düşərək, kəllə-beyin travması alıb, diz qapağı sıradan çıxdığı üçün yeriməkdə əziyyət çəkir. Belə olan halda məhkəmə Hüseyn Əliyevin barəsində Cinayət Məcəlləsinin 70-ci maddəsini tətbiq etməklə, təyin edilmiş

cəzanı şərti hesab edə bilər. Buna əsaslar olduğu halda məhkəmə həmin məsələni müzakirə etməyib”.

Prokuror Qalib Rizvanov çıxış edərək apelyasiya şikayətinin təmin edilməməsini istəyəndən sonra hakimlər qərar açıqlayıblar. Qərara görə, Hüseyn Əliyevin cəzasının yüngülləşdirilməsi ilə bağlı apelyasiya şikayəti təmin edilməyib.