Belə bir məsəl var, deyirlər özünə rəva bilmədiyini başqasına necə rəva görürsən? Və ya varlı kasıbın dərdindən nə anlasın? Hə baxın, bu hər iki məsəl iki gündür mediyada millət vəkili Hadi Rəcəblinin müəllimə fəhləliyi rəva görməsi kimi tövsiyəsi ilə bağlı yazıların, kommentlərin ardı-arası kəsilmir. Biz də, bu məsələyə biganə yanaşmaq istəmədik. Ona görə də, kiçik bir araşdırma apardıq. Əslində bizi maraqlandıran əsas məsələ ondan ibarət idi ki, nəyə görə hörmətli millət vəkili müəllimlərə qarşı türk demişkən bu qədər övkəlidir. Amma axtarışlarımız bizi tamam başqa istiqamətə apardı. Çünki redaksiyamıza Hadı Rəcəblinin müəllimlərə olunan tövsiyəsindən gileylənən bir sıra insanlar olduqca böyük informasiyalar verdilər. Elə həmin informasiyaları da, biz oxucularımızla bölüşmək istədik.

Belə ki, sən demə, hörmətli deputatımız Hadı Rəcəbli müəllimlərə tövsiyə verərək, onların verdiyi bilik və savada görə bu gün millətimizi təmsil edə bildiyini deyəsən unudur. Əgər ki, unutmasaydı, o zaman hər bir sənətin bünövrəsini, təməl daşını qoyan müəllimlərə fəhləlik etməyi rəva görməzdi. Yox əgər görürsə, o zaman Hadı müəllim deputatlıqdan əlavə hardan gəlir əldə edir kimi sual meydana çıxır. Çünki hamıya məlumdur ki, hektarlarla torpağa, saysız-hesabsız evlərə, villalara və iaşə obyektlərinə Milli Məclisdən aylıq aldığı 1822 manat əmək haqqına əldə etmək olmazdı. Hərçənd ki, elə ondan başlayaq ki, Hadı Rəcəblinin sadəcə deputatlığa görə aldığı bir aylıq maaşını 300 manat əmək haqqı ala bilən müəllimin arasında bölsək, bir deputatın pulunun aya 6 müəllimə bəs etdiyini görərik. O zaman səhv və qüsuru Hadı Rəcəblinin müəllimlərə tövsiyəsində deyil, məhz müəllimi qınaq obyektinə çevirməyə tənəzzül edən bir deputata aylıq 6 müəllimin əmək haqqısı verməyin özünü günah hesab etmək lazımdır. Əgər müəllimə deputatın maaşı verilsəydi, müəllim heç bir zaman Hadı Rəcəbliyə işdən sonra fəhləliklə məşğul ol deyə tövsiyə etməzdi. Makidoniyalı

İsgəndər müəllimi Aristotelin zəhmətini qiymətləndirərəkən, “Mənim müəllimim, mənim yerdəki Allahımdır”, deyərək müqayisə edərmiş. Görünür, İsgəndərin kəlamı 150-200 manat alan müəllimlərə şamil edilmirdi və Hadı Rəcəblinin fəhləliklə məşğul olmağı məsləhət görməsi də, bu dövrün misalı deyil. Əslində heç kəs bunu açıqlamadı ki, “işdən sonra fəhləliklə məşğul ol” deyiminin altında gənclərimizin oxumasına və təhsil almasına qarşı psixoloji bir təzyiq dayanır. Uşaqlıqdan hər birimizin beyninə valideynlərimiz tərəfindən “oxu adam ol”, “heç kəsə möhtac olma”, “biliyə yüklən ki, sonra daşı kürəyinə yükləməyəsən” kimi misallar həkk edilərdi. Uşaqlar da gələcəkdə fəhləlik edib onun-bunun qapısında çalışmaqdansa oxumağı üstün tutardı. İndi belə çıxır ki, Hadı Rəcəbli deyir oxusan da, oxumasan da işdən sonra fəhləlik etməlisən. Sizcə bu gənclərin təfəkkürünə necə təsir bağışlayara? Bu da bizim ziyalımızın düşüncə tərzi...

Əvvəlimiz fəhləlik edəcəksə, Allah axırımızı xeyirli etsin! Hadı Rəcəbli ay ərzində bir az əvvəl hesabladığımız kimi 6 müəllimin orta əmək haqqısını yeyib, üstündən də su içir. O kasıb müəllimin ayın 30 gününü 150 manata necə sığdıracağı, həkim, müalicə, dəva-dərman, xeyir-şəri necə yola vermək kimi qayğılardan çox uzaqdır. Bir adam ki, Lənkəranda ona məxsus “Palıdlı sahil” adlı istirahət mərkəzindən aya ən azı 100 müəllimin əmək haqqısı qədər maliyyə əldə edirsə, o kasıb müəllimin halından necə anlaya bilər axı? Onu qınamayın cənablar! Zəmanəni və bu cür insanlar üçün yaradılan şəraiti qınayın! Hələ bu harasıdır, istirahət mərkəzi ilə yanaşı Lənkəranda şadlıq sarayına, yanacaqdoldurma məntəqəsinə, 100 hektar torpağa və müxtəlif cür ticarət obyektlərinə sahibdir. Hadı müəllim neynəsin “fəhləlik edin” deməlidir də! Neynəməlidir siz müəllimlər üçün dırnaqla, cırmaqla toplayıb bu var-dövləti? İndi nə olsun ki, 6 müəllimin maaşını dövlətdən alır, bu o demək deyil ki, 6 müəllimin biliyinə də yiyələnməlidir...

Gülməli deyil cənablar, vəziyyətimiz get-gedə ağlamalı hal alır! Bir baxın, millətin vəkili müəllimi fəhləlik etməyə çağırış edir... Hadı müəllim görünür Cəbiş müəllimi ideallaşdırıb və XXI əsrin müəllimini məhz işdən sonra fəhləlik etməsini, ya da sabun bişirməsini arzu edir... Amma Hadı müəllim unudur ki, o zaman Sovet dövründə belə olsa heç bir deputatın indi elə Hadı müəllim kimi var-dövlətə sahib olması da mükün deyildi... Əgər müəllimlərimizə Cəbiş müəllimi örnək çəkirsizsə, o zaman Hadı müəllim də sovet dövründəki məmur kimi fəaliyyət göstərməlidir. Hadı Rəcəblinin “maddi təminat” sığortası Hadı Rəcəbli yüksək vəzifəli qohum-əqrəbaları hesabına özünə ömürlük “maddi təminat” sığortası əldə edib. Hadı Rəcəblinin qaynının oğlu hörmətli xanım Nərgiz Paşayevanın qızı Ülviyyə Mahmudovanın həyat yoldaşıdır. Hadı Rəcəblinin bir oğlu Vüsal Rəcəbli “Həyat” Beynəlxalq Hümanitar Təşkilatın prezidentidir. Hadi Rəcəblinin digər oğlu Tural Rəcəbli “DNS Computers” şirkətinin rəhbəridir. Hadı Rəcəblinin qızı Dövlət Pedoqoji Kollecinin rəhbəri, YAP Qadınlar Şurasının sədri Nurlanə Əliyevanın gəlinidir və şəhərdə ən məşhur klinikalardan birinin sahibidir. Hadı Rəcəblinin digər qızı “Kapital Bankın” sədr müavini Fual Məmmədovla ailəlidir və şəhərdəki uşaq bağçalarının onun kurasiyasında olduğu bildirilir.

Ülkər