Rusiya ərazisində qanunsuz yaşayan azərbaycanlı "qanuni oğru", kriminal aləmdə "Lotu Yunus" kimi tanınan Nəzərov Yunis Canəhməd oğlu Rusiya hüquq-mühafizə orqanları tərəfindən Azərbaycana göndərilib.

APA TV-nin "Vesti.az"a istinadən verdiyi məlumata görə, Moskva-Bakı aviareysi ilə deportasiya edilən Yunis Nəzərovu Azərbaycan Daxili İşlər Nazirliyinin əməkdaşları təhvil alıblar.

Ömrünün 20 ilini həbsxanalarda keçirən Yunis Nəzərov 1984-cü ildə "qanuni oğru" titulunu qazanıb. O, sonuncu dəfə Moskvada saxlanılıb və narkotik maddələrin istifadəsinə görə 4 il azadlıqdan məhrum edilib. "Lotu Yunus" kriminal aləmin "generalları" ilə sıx əlaqədə olub. O, vaxtilə azərbaycanlı kriminal avtoritetlərin "xaç atası" sayılan "Lotu Bəxtiyar" ləqəbli mərhum Bəxtiyar Kərimovla dostluq edib. Bundan əlavə, Yunis Nəzərovun 2013-cü ilin avqustunda öldürülən "Qoca" ləqəbli Əlibala Həmidovla və hazırda Bakıda cəza çəkən "Lotu Quli" ləqəbli Nadir Səlifovla da yaxşı münasibətləri olub.

2008-ci ildə Yunis Nəzərovun özünə də sui-qəsd təşkil edilib. Ona Bakıdakı 1 saylı Cəzaçəkmə Müəssisəsində Vəfadar Mirzəyev adlı həmyerlisi balta ilə zərbələr endirib. Məhkəmə Vəfadar Mirzəyevə 12 il 3 ay həbs cəzası kəsib. Yunis Nəzərov "Lotu Quli" ilə birlikdə "Rövşən Lənkəranski" kimi tanınan "qanuni oğru" Rövşən Canıyevə qarşı çıxan şəxslərdəndir. Kriminal aləmin hazırkı söz sahibi olan və məşhur "Ded Xasan"ın yerinə əyləşdiyi bildirilən "Şakro Molodoy" ləqəbli Zaxar Kalaşev isə azərbaycanlı "qanuni oğru"ların bu hərəkətlərini özbaşınalıq adlandırıb. O, növbəti toplantının keçiriləcəyini və hər kəsin cavab verəcəyini bildirib. Bu arada Yunis Nəzərovu təhvil alan Azərbaycanın hüquq-mühafizə orqanlarının onun üçüncü ölkəyə göndərilməsi ilə bağlı hazırlıqlara başladığı da deyilir.