Uzun zamandır ağır şəkər xəstəliyindən və o cümlədən də xərçəngdən əziyyət çəkən əməkdar artist Gülnar Salmanova bu dəfə mətbuatda verdiyi açıqlama ilə gündəmə gəlib.

Milli.Az xəbər verir ki, əməkdar artist mətbuata açıqlamasında bildirib ki, vəziyyəti çox pisdi, müalicə aldığı xəstəxanada ona baxan yoxdu.

O, həkimi Rüstəm Verdiyevi günahlandırıb. Əməkdar artist bildirib ki, həkim ondan rüşvət tələb edir, almadıqda isə onun səhhəti ilə maraqlanmır.

Məlumat üçün bildirək ki, Gülnar Salmanova əvvəllər Əfəndiyev adına 2 saylı şəhər Klinik Xəstəxanasında müalicə alırdı. Ancaq klinika təmirə dayandığından bütün xəstələr həkim heyəti ilə Sabunçu rayon 3 saylı Şəhər Klinik Xəstəxanası köçürülüblər.

Məsələ ilə bağlı əməkdar artistin həkimi ilə əlaqə saxladıq. Rüstəm Verdiyev Milli.Az-a bildirdi ki, Gülnar xanım kaprizli insandı, bir neçə ağır xəstəlikdən əziyyət çəkir, yarım candır.

"Gülnar Salmanova 4 ildən artıqdır ki, dializ xəstəsidi, böyrəkləri işləmir. Xəstə bundan əlavə 20 ildən çoxdur ki, diabetdən əziyyət çəkir, insulin qəbul edir. Sol süd vəzisindəki xərçəng şişindən əziyyət çəkir. O da, kimya terapiyasından sonra yaranan xəstəlikdir.

Xanım həftədə üç dəfə 3-4 saat hemodializ seansı qəbul edir. Keçən il işlədiyimiz klinikanı bura (Sabunçu rayon 3 saylı Şəhər Klinik Xəstəxanasına) köçürüblər. Gülnar xanım özü mənim qonşumdu. İstər burada, istərsə də, evinə gedib mən o insanın qayğısına qalıram.

Bunu onun oğlu, Elçin Salmanov da təsdiq edə bilər. O, səhv etmirəmsə, Şamaxı rayon prokurorluğundan işləyir. Elçin şahiddir ki, mən Gülnar xanımın qayğısına necə qalıram, ona nəzarət edirəm".

Rüstəm Verdiyev əməkdar artistin rüşvət ittihamına da cavab verib. O bildirib ki, heç bir xəstənin, o cümlədən də Gülnar xanımın puluna ehtiyacı yoxdu:

"Əsassız sözlərdi, dializ xəstələrinin heç biri pul verən belə deyillər. Onlara pul ayrılır və ciblərindən pul xərcləmirlər. Ümumiyyətlə, bizim ölkədə bu cür xəstələrə böyük qayğı göstərilir. Biz onlardan nə uma bilərik, axı onlar, onsuz da, böyük əziyyət çəkirlər, yarımcan bir insandırlar".

Rüstəm Verdiyev qeyd edib ki, məsələ ilə bağlı baş həkim Fikrət Zeynalov onunla danışıb: Sizə danışdıqlarımı ona da dedim və xəstəyə bütün yardımlar olunur".

Həkim sözlərinə həqiqiliyinə bizi inandırmaq üçün əməkdar artistin oğlu Elçin Salmanovla əlaqə saxlamağımızı tövsiyə etdi, hətta telefon nömrəsini təqdim etdi: "O, mənim bütün sözlərimi təsdiq edəcək, xanıma necə qayğı göstərdiyimi deyəcək".

Lakin aktrisanın oğlu nəinki deyilənləri təsdiqlədi, anasına olan "məhəbbəti" ilə bizi təəccübləndirdi. Laqeyd şəkildə "Anamın səhhəti barədə nə öyrənmək istəyirsinizsə, özü ilə əlaqə saxlayın" deyib telefonu qapatdı.

Ceyhun Ələkbərov