Bakıda çox sayda avara və dilənçilər saxlanılıb.

Daxili İşlər Nazirliyinin mətbuat xidmətindən ANS PRESS-ə verilən məlumata görə, Baş Polis İdarəsinin əməkdaşları paytaxtın 3 rayonunda dilənçilərə qarşı reyd keçirib. Nəticədə Binəqədi, Nəsimi və Yasamal rayonları ərazisində avaralıq və dilənçiliklə məşğul olan 93 nəfər polis əməkdaşları tərəfindən saxlanılıb.

Onlar inzibati xətalar məcəlləsinin 307-ci- maddəsinə uyğun olaraq yetkinlik yaşına çatmayanların öz valideynləri və ya başqa şəxslər tərəfindən avaralığa cəlb edilməsinə görə on manatdan on beş manatadək miqdarda cərimə edilir və ya işin hallarına görə, xətanı törədənin şəxsiyyəti nəzərə alınmaqla bu tədbirlərin tətbiqi kifayət sayılmadıqda on beş günədək müddətə inzibati həbs tətbiq edilir. Bu da kifayət etmədikdə isə həmin şəxs paytaxtdan çıxarılaraq öz rayonuna göndərilir.

Bundan bir müddət əvvəl Bakı Şəhər Baş Polis İdarəsindən ANS PRESS-ə:"İlin ilk 9 ayı ərzində saxlanılan dilənçilərin sayının 100-ə yaxın olduğu" bildirilmişdi.

Sentyabr ayının 30-da Bakıda keçirilən reydlər zamanı qaraçılarla polis arasında qarşıdurma yaşanmışdı.

Cəfər Cabbarlı heykəlinin yaxınlığında balaca uşağı ilə birgə dilənən qaraçıları polis əməkdaşları saxlamışdı.

Onlar əvvəlcə uşağı götürərək, Post Patrul Xidmətinə məxsus avtomobilə mindirmişdilər.

Bunu görən dilənçi qadın qışqırmağa başlamış və ətrafdakı insanlar səsi eşidib, hadisə yerinə toplaşmışdılar.

Polislər qaraçıları maşına güclə mindirdikləri zaman isə bir dilənçi qadının həyəcan keçirdiyi üçün halı pisləşdiyi üçün əraziyə təcili yardım çağırılmış və qadın xəstəxanaya aparılmışdı.