Prezident İlham Əliyevin Milli Təhlükəsizlik Naziri Eldar Mahmudova və onun şevrəsinə qarşı sərt davranması, konkret cəza maşınının işə düşməsi bir çox çevrələrdə həyəcana nədən olub. Amma bu prosesdə müəmmalı məqamlar da yetərincədir ki, DİA.AZ olaraq həmin istiqamətlərə müəyyən aydınlığı gətirməyə çalışdıq.

Qeyd edək ki, prezidentin bu sərt mövqe nümayişi MTN-nin ayrı-ayrı yetki sahibləri tərəfindən iri iş adamlarına qarşı təzyiq faktının ifşasından sonra baş tutub.

Xatırladaq ki, Milli Təhlükəsizlik Nazirliyinin ayrı-ayrı vəzifəli şəxsləri tərəfindən vəzifə səlahiyyətlərindən sui-istifadə və yol verilmiş digər qanun pozuntuları faktları üzrə Baş Prokurorluqda Cinayət Məcəlləsinin müvafiq maddələri ilə cinayət işi başlanaraq istintaq-əməliyyat qrupu yaradılıb.

Baş Prokurorluğun mətbuat xidmətindən DİA.AZ-a dünən verilən rəsmi məlumatda qeyd olunurdu ki, həyata keçirilmiş istintaq-əməliyyat tədbirləri ilə nazirliyin bir qrup əməkdaşı tərəfindən xidməti vəzifələrinin icrası ilə əlaqədar qulluq səlahiyyətlərindən sui-istifadə etmə və əməliyyat-axtarış fəaliyyəti haqqında qanunvericiliyin tələblərini pozmaqla sahibkarlıq fəaliyyəti subyektlərinin fəaliyyətinə qanunsuz müdaxilələr edilməsi, ayrı-ayrı şəxslərin hüquq və qanunla qorunan mənafelərinin pozulmasına əsaslı şübhələr müəyyən edilib.

Cinayət işi üzrə Milli Təhlükəsizlik Nazirliyinin 7 vəzifəli şəxsi Cinayət Məcəlləsinin 308.2, 309.1 və 302.2-ci maddələri ilə təqsirləndirilən şəxs qismində cəlb olunaraq həmin maddələrdə nəzərdə tutulan ittiham elan edilməklə məhkəmənin müvafiq qərarları barələrində həbs qətimkan tədbiri seçilib.

Hazırda istintaq-əməliyyat tədbirləri davam etdirilir.

DİA.AZ onu da xatırladır ki, digər məlumatlarda MTN-in bu günlərdə həbs edilən 11 əməkdaşının Nərimanov Rayon Polis İdarəsinin (RPİ) istintaq təcridxanasında saxlanıldığı bildirilir. Daxili İşlər Nazirliyindən verilən məlumata görə, həbs olunan 11 nəfərin hamısı barədə 4 ay müddətinə həbs-qətimkan tədbiri seçilib.

Səbayel Rayon Məhkəməsinin qərarına görə, ittiham və həbs olunan şəxslər Ədliyyə Nazirliyinin Kürdəxanıdakı 1 saylı İstintaq Təcridxanasına köçürüləcəklər.

MTN-çilər barəsində həbs-qətimkan tədbirini seçən hakimin adı da bəlli olub. Bu şəxs Səbayel Rayon Məhkəməsinin hakimi Rauf Əhmədovdur. R.Əhmədov 2013-cü ildə Prezident Administrasiyası İşlər İdarəsinin keçmiş müdiri Akif Muradverdiyev barəsində də həbs-qətimkan tədbirinin seçilməsi barədə qərar verib.

Həbs edilən şəxslər barədə CM-in 302-ci (əməliyyat-axtarış fəaliyyəti haqqında qanunvericiliyi pozma), 308-ci (vəzifə səlahiyyətlərindən sui-istifadə) və 309-cu (vəzifə səlahiyyətlərini aşma) maddələri ilə cinayət işi başlanıb..

Faktla bağlı Xüsusi Dövlət Mühafizə Xidməti və Baş Prokurorluğun əməkdaşlarından ibarət istintaq qrupu yaradılıb. İstintaq qrupuna baş prokurorun birinci müavini Rüstəm Usubov rəhbərlik edir.

Burada maraqlı bir məqam isə DİA.AZ-a daxil olan informasiyadan anlaşılır. Belə ki, redaksiyamızı bilgiləndirən mötəbər mənbə iddia edir ki, artıq bir neçə iş adamı MTN rəhbərliyinə qarşı istintaq orqanları ilə əməkdaşlıq etməyə başlayıblar. Amma buna qədər də əməkdaşlıq edənlər olub və həmin şəxslərin sırasında "Avromed" şirkətinin prezidenti, 115 saylı Şəki kənd ikinci seçki dairəsindən deputat seçilmiş Cavanşir Feyziyev də var.

Məlumatlı mənbələr iddia edir ki, Cavanşir Feyziyev elə ilkindən Eldar Mahmudova qarşı ifadə verib və onun, habelə onunla yanaşı daha bir neçə iş adamının ifadəsi bugünkü mənzərənin yaranmasında müstəsna rol oynayıb.

Cavanşir Feyziyevin nədən Eldar Mahmudova qəzəbli olmasına gəlincə isə bunun də səbəbləri var imiş, Bu barədə DİA.AZ-a danışan mənbə iddia edir ki, Feyziyev hər ay MTN-ə "sabitlik pulu" adı altında haqq ödəyirmiş. Yəni o, sərbəst iqtisadi fəaliyyətinə görə MTN-ə bprclu olduğuna görə, bunun haqqını verməli imiş...

DİA.AZ xatırladır ki, Cavanşir Feyziyevin adı MTN-ə əks cinahda hələ 2011-ci ildə hallanmağa başladı. Həmin ərəfədə Anar Mustafayev adlı şəxs müvafiq dövlət qeydiyyatından keçmədən, lisenziya almadan hazırda şəxsiyyətləri istintaqla araşdırılan Azərbaycan, Türkiyə və İran vətəndaşları ilə cinayət əlaqəsinə girərək qabaqcadan əlbir olan bir qrup şəxs halında 2010-cu ildən 2011-ci ilin may ayının sonunadək külli miqdarda, yəni 53 min manatdan artıq məbləğ dəyərində müxtəlif adda və sayda dərman preparatlarını qaçaqmalçılıq yolu ilə gömrük sərhədindən gömrük nəzarətindən gizli keçirərək, Türkiyə və İrandan Azərbaycana gətirilməsini və Bakı şəhərində satışını təşkil edibmişlər. İstintaq-əməliyyat tədbirləri çərçivəsində Anar Mustafayevin idarə etdiyi «Mercedes-Benz» markalı avtomobilə, eləcə də yaşadığı mənzilə keçirilmiş baxış zamanı Türkiyədən və İrandan Azərbaycana qaçaq yolla gətirilmiş 163 adda 53 min manatdan artıq dəyərdə çoxlu sayda dərman preparatları aşkar edilərək götürülmüşdü.

Faktla bağlı o zaman MTN-in İstintaq Baş İdarəsi tərəfindən Cinayət Məcəlləsinin 206.3.2-ci (qabaqcadan əlbir olan bir qrup şəxs tərəfindən qaçaqmalçılıq) maddəsi ilə cinayət işi başlanılmışdı və A.Mustafayev təqsirləndirilən şəxs qismində cəlb olunaraq barəsində məhkəmənin qərarı ilə həbs-qətimkan tədbiri seçilmişdi.

Mənbə iddia edir ki, həmin şəxs "Avromed" şefi Cavanşir Feyziyevin adamı olub və qeyd olunan ərəfədən də MTN-nin hədəfinə çevrilən deputat artıq illər ərzində "sabitlik pulunu" ödəməyə məhkum edilibmiş.

Nəhayətdə usanan deputatın MTN şefi ilə bağlı daha yuxarı instansiyalara şikayət etdiyi də söylənilir.

Qeyd edək ki, Bütün bu iddia olunanlarla bağlı deputatla və onun yaxınları ilə əlaqə yaratmağa çalışsaq da, alınmadı... Amma yenə də istənilən maraqlı tərəfin mövqeyini işıqlandırmağa hazırıq...