Prezident İlham Əliyev radikal islahatlara qərar verdi. Harınlaşmış məmurlara verilən limit başa çatdı və dövlət başçısı sərt ritorikadan sərt addımlara keçdi. Bütün bunların belə sonluqla başa çatacağını Avropa.infonun ekspert qrupu dəfələrlə yazmışdı.

Prezident sərt addımlarla yanaşı iqtisadi islahatlara da start verdi. Artıq mətbuatda dövlət başçısının son addımları məxməri inqilabın başlanğıcı kimi dəyərləndirilir. Bu barədə bir qədər sonra...

Beləliklə, oktyabrın 17-də Azərbaycanın milli təhlükəsizlik naziri, general-polkovnik Eldar Mahmudov İlham Əliyevin sərəncamı ilə vəzifəsindən azad edildi. Eyni zamanda, MTN – nin 7 əməkdaşı məhkəmə qarşısına çıxarılaraq, barəslərində aylıq həbs qətimkan tədbiri seçildi.

Baş Prokurorluğun mətbuat xidmətindən bildiriblər ki, həyata keçirilmiş istintaq-əməliyyat tədbirləri ilə nazirliyin bir qrup əməkdaşı tərəfindən xidməti vəzifələrinin icrası ilə əlaqədar qulluq səlahiyyətlərindən sui-istifadə etmə və əməliyyat-axtarış fəaliyyəti haqqında qanunvericiliyin tələblərini pozmaqla sahibkarlıq fəaliyyəti subyektlərinin fəaliyyətinə qanunsuz müdaxilələr edilməsi, ayrı-ayrı şəxslərin hüquq və qanunla qorunan mənafelərinin pozulmasına əsaslı şübhələr müəyyən edilib.

Baş Prokurorluq Cinayət Məcəlləsinin bir sıra maddələri ilə MTN-in 7 vəzifəli şəxsi barədə həbs qəti-imkan tədbiri seçib.

Bu maddələrdən biri Cinayət Məcəlləsinin 308.2-ci maddəsidir. Maddə Məcəllədə əks olunmuş 308.1-ə istinadla ağırlaşdırıcı hal kimi tətbiq edilib. Belə ki, 308.1-maddəsində deyilir: “Vəzifə səlahiyyətlərindən sui-istifadə, yəni vəzifəli şəxsin xidməti vəzifələrinin icrası ilə əlaqədar öz və ya üçüncü şəxslər üçün qanunsuz üstünlük əldə etmək məqsədi ilə öz qulluq səlahiyyətlərindən qulluq mənafeyinə qəsdən zidd olaraq istifadə etməsi və ya qulluq mənafeyi tələb etdiyi halda istifadə etməməsi fiziki və ya hüquqi şəxslərin hüquqlarına və qanuni mənafelərinə, yaxud cəmiyyətin və ya dövlətin qanunla qorunan mənafelərinə mühüm zərər vurduqda min manatdan iki min manatadək miqdarda cərimə və ya üç ilədək müddətə müəyyən vəzifə tutma və ya müəyyən fəaliyyətlə məşğul olma hüququndan məhrum etmə və ya iki ilədək müddətə islah işləri və ya əmlakı müsadirə olunmaqla üç ilədək müddətə azadlıqdan məhrum etmə ilə cəzalandırılır.

308.2-ci maddə isə məcəllənin 308.1-ci maddəsi ilə nəzərdə tutulmuş əməllər ağır nəticələrə səbəb olduqda və ya seçkinin (referendumun) nəticələrinə təsir məqsədilə törədildikdə üç ilədək müddətə müəyyən vəzifə tutma və ya müəyyən fəaliyyətlə məşğul olma hüququndan məhrum edilməklə, əmlakı müsadirə olunmaqla üç ildən səkkiz ilədək müddətə azadlıqdan məhrum etmə ilə cəzalandırılır.

309.1 maddəsi isə vəzifəli şəxs tərəfindən xidməti səlahiyyətlərinin hüdudlarından açıq-aşkar surətdə kənara çıxan hərəkətlər etməsi fiziki və ya hüquqi şəxslərin hüquqlarına və qanuni mənafelərinə, yaxud cəmiyyət və ya dövlətin qanunla qorunan mənafelərinə mühüm zərər vurduqda cəzanı nəzərdə tutur.

Bu maddə min manatdan iki min manatadək miqdarda cərimə və ya iki ilədək müddətə islah işləri və ya üç ilədək müddətə müəyyən vəzifə tutma və ya müəyyən fəaliyyətlə məşğul olma hüququndan məhrum edilməklə, əmlakı müsadirə olunmaqla üç ilədək müddətə azadlıqdan məhrum etmə ilə cəzalandırılır.
302-ci maddə isə əməliyyat-axtarış fəaliyyəti haqqında qanunvericiliyi pozma ilə bağlıdır.

Həbs edilənlərə elan edilmiş 302.2 maddəsi informasiyanın gizli yolla götürülməsi üçün nəzərdə tutulan xüsusi texniki vasitələrdən istifadə edilməklə törədildikdə nəzərdə tutlan cəza ilə bağlıdır. Bu zaman min manatdan iki min manatadək miqdarda cərimə və ya üç ilədək müddətə müəyyən vəzifə tutma və ya müəyyən fəaliyyətlə məşğul olma hüququndan məhrum edilməklə və ya edilməməklə iki ildən beş ilədək müddətə azadlıqdan məhrumetmə ilə cəzalandırılır. Hazırda istintaq-əməliyyat tədbirləri davam etdirilir.
Mətbuatın verdiyi məlumata görə, E. Mahmudov vəzifə səlahiyyətlərini aşaraq siyasi hakimiyyətin təmsilçilərinin telefon danışıqlarının dinlənilməsini həyata keçirib. Eldar Mahmudovla bərabər MTN-in bir qrup generalının saxlanılması da böyük əks-səda doğurdu. Məlumata görə, həbs edilənlər arasında MTN-in Monitorinq Mərkəzinin əməkdaşı Azərbaycan tarixində ilk dəfə olaraq general-mayor hərbi rütbəsi ilə təltif olunan qadın Natəvan Mürvətovanın, MTN-in Monitorinq Xidmətinin rəisi general mayor Teymur Quliyevin adı var.

KİV-də yayılmış digər bir informasiyada isə nazirin vəzifəsindən çıxarıldığı saatlarda Xüsusi Dövlət Mühafizə Xidmətinin, Daxili İşlər Nazirliyinin və Baş Prokurorluğun birgə əməliyyat qrupunun MTN-in Monitorinq Xidmətinin rəisi general Teymur Quliyev, Antiterror Mərkəzinin rəis müavini İlqar Əliyevi, eləcə də daha bir neçə yüksək rütbəli əməkdaşını həbs etməsi qeyd edilir.

Daha sonra mətbuatda Eldar Mahmudovun qudası, Beynəlxalq Bankın sabiq prezidenti Cahangir Hacıyevin də saxlanılaraq, Baş Mütəşəkkil Cinayətkarlıqla Mübarizə İdarəsində saxlanıldığı xəbəri yer alıb. Milli təhlükəsizlik nazirinin birinci müavini, general-leytenant Hilal Əsədovun, MTN mərkəzi aparatının rəhbəri Fərhad Vahabov barədə ev dustaqlığı qərarı verilməsi barədə də məlumatlar dolaşmaqdadır.

Oktyabrın 18-də isə Prezident İlham Əliyevin hüquq-mühafizə orqanlarının rəhbərləri ilə fövqəladə toplantı keçirib. Toplantıda sabiq milli təhlükəsizlik naziri Eldar Mahmudovun vəzifədən azad edilməsinin səbəbləri, Azərbaycan dövlətinin təhlükəsizliyi ilə bağlı məsələlərin müzakirə olunduğu qeyd olunub.

MTN rəhbərliyinə qarşı əməliyyatı Baş Dövlət Xüsusi Mühafizə İdarəsi və Baş Prokurorluq birgə həyata keçirib, ona Korrupsiyaya qarşı mübarizə baş idarəsinin rəis müavini Əli Nağıyev rəhbərlik edib.

Məlumatlara görə, MTN ölkədə kiçik və orta biznesin dirçəlməsinə, inkişafına qarşı əsas cəza alətinə çevrilmişdi. Nazir Eldar Mahmudovun göstərişi, nazirliyin Antiterror Mərkəzinin rəisi Elçin Quliyevin, nazir müavini Hilal Əsədovun, habelə Akif Çovdarovun və digərlərinin fəal iştirakı və dinləmə qurğularının köməyi ilə ölkənin biznes-elitasının, habelə orta biznesin tanınmış nümayəndələrinin fəaliyyəti izlənilib.

Sonra bu biznesmenlər barədə kompromat xarakterli materiallar toplanılıb. Bundan sonra MTN-in əməliyyat qrupu rəhbərliyin göstərişi və Antiterror Mərkəzinin rəis müavini İlqar Əliyevin şəxsən iştirakı ilə biznesmenlərin qanunsuz həbslərini həyata keçirib. Söhbət de-fakto sanksiyasız həbslərdən, biznesmenlərin "haqq" alınması üçün girov götürülməsindən və ciddi korrupsiyadan gedirdi.

Biznesmenləri MTN-in təcridxanasında həftələrlə, bəzən aylarla saxlayırdılar. Onların barəsində həbs tədbirinin dəyişdirilməsi üçün hər biznesmendən böyük məbləğdə pul alıblar.

Beləliklə, İlham Əliyev dövlət içində dövlət yaratmaq istəyənlərin cəhdlərinin qarşısını almış oldu. Bununla yanaşı, ölkə rəhbəri azad biznesin inkişafı üçün əməli gedişlər etdi.

Dövlət başçısı peşəkar və sadiq kadrlarla işləyə biləcəyini nümyiş etdirdi. Pezident İlham Əliyev Mədət Quliyevin Azərbaycan Respublikası milli təhlükəsizlik nazirinin birinci müavini təyin edilməsi haqqında sərəncam imzaladı.

İlham Əliyev bununla ciddi kadr islahatlarına başlayacağını bəyan etdi. Bu kadr təyinatı hakimiyyət stukturlarına islhatçı kadrların çəkilməsi kimi də şərh edilə bilər.

Prezidentin sahibkarlarla bağlı verdiyi sərəncam isə ölkənin iqtisadi inkişafı ilə birbaşa bağlıdır. Belə ki, oktyabrın 19-da prezident İlham Əliyev tərəfindən qanunvericilik təşəbbüsü qaydasında Milli Məclisə sahibkarlıq sahəsində aparılan yoxlamaların dayandırılmasını nəzərdə tutan qanun layihəsi göndərilib. Qanun layihəsinə əsasən 2015-ci il noyabrın 1-dən etibarən sahibkarlıq sahəsində aparılan yoxlamalar 2 il müddətinə dayandırılır.

İlham Əliyevin imzaladığı sərəncama əsasən, xüsusi razılıq (lisenziya) tələb olunan fəaliyyət növlərinin sayının minimuma endirilib. Dövlət təhlükəsizliyindən irəli gələn hallarla əlaqədar xüsusi razılıq (lisenziya) tələb olunan fəaliyyət növlərinin siyahısının müəyyən edilib və bu fərmanın müddəaları nəzərə alınmaqla sahibkarlıq fəaliyyətinin həyata keçirilməsi üçün tələb olunan xüsusi razılıq (lisenziya) verilməsi qaydasının sadələşdirilməsi və şəffaflığının təmin edilməsi məqsədi ilə təkmilləşdirilməsi nəzərdə tutulub.

Nazirlik həmçinin Prezident yanında Vətəndaşlara Xidmət və Sosial İnnovasiyalar üzrə Dövlət Agentliyi ilə birlikdə sahibkarlıq fəaliyyətinin həyata keçirilməsi üçün tələb olunan xüsusi razılıq (lisenziya), sertifikat, şəhadətnamə və digər sənədlərin elektron qaydada verilməsini təmin edən “Elektron lisenziya” portalının yaradılması istiqamətində işləri sürətləndirməlidir.

Fərmana əsasən, prezidentin “Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin fəaliyyətinin təmin edilməsi haqqında” 2012-ci il 5 sentyabr tarixli fərmanında aşağıdakı dəyişikliklər edilib:5.17-ci bəndin sonunda nöqtə işarəsi nöqtəli vergül işarəsi ilə əvəz edilib və aşağıdakı məzmunda 5.18-ci bənd əlavə edilib. 5.18. sahibkarlıq fəaliyyətinin həyata keçirilməsi üçün tələb olunan (dövlət təhlükəsizliyindən irəli gələn hallar istisna olmaqla) xüsusi razılıq (lisenziya) verilməsi nəzərdə tutulur.

Beləliklə, İlham Əliyev siyasi gedişlərlə yanaşı, eyni zamanda iqtisadi reformaların müəllifi kimi çıxış etdi.
Prezident Əliyev Qərbin “rəngli inqilablar” hədəsinə məxməri inqilab gedişi ilə cavab verdi. Son günlər baş verənlər ictimai rəydə ölkə rəhbərinin reytinqinin artması ilə sonuclandı və ən əsası artıq vətəndaşlar azad bazar iqtisadiyyatına keçidin yaratdığı imkanlardan bəhrələnə biləcəklər. Bu isə İlham Əliyev hakimiyyətinin güclənməsi ilə yanaşı Azərbaycan üçün Suriya variantının birdəfəlik məhvi deməkdir. İlham Əliyev ölkəni gözləyən iqtisadi çətinlikləri və kənardan ixrac edilən xaos təhlükəsini cəmi bir neçə gedişlə dayandıra bildi.

Avropa.infonun ekspert qrupu