2015-ci il parlament seçkilərində çox maraqlı namizədlər iştirak edir. Ən diqqət çəkən məqam odur ki, namizədlərin bir qismi haqqında google.az da axtarış verəndə hər cür informasiya çıxır. Bəzən bəlli olur ki, indi deputat seçilib xalqı təmsil etmək istəyən namizədin keçmişində kriminal situasiya olub və ya hansısa iş adamları namizədə qarşı mətbuatda çıxışlar ediblər. Məsələn, namizədliyini 60 saylı Neftçala Seçki Dairəsindən irəli sürən İsmayıl Ağayev barəsində internet üzərində axtarış verəndə müəyyən xəbərlər ortaya çıxır. Qısa axtarış zamanı bəlli olur ki, İsmayıl Ağayevin məhkumluğu olub. Hətta ona yaxın şəxslərdən biri sosial şəbəkədə yaydığı sənəddə Ağayevin üzərindən məhkumluğun götürüldüyü faktla təsdiq etməyə çalışıb. Bu isə o deməkdir ki, namizədin keçmişində həbs məsələsi olub. Lakin onun məhz hansı məsələ ilə bağlı saxlandığı, barəsində məhkəmə qərarının olub-olmadığı tam aydın deyil. Bəzi iddialara görə, Heydər Əliyevin hakimiyyətinin ilk illərində İsmayıl Ağayevə xüsusi etimad göstərilib, bu şəxs hətta Banditizm və Terrorizm İdarəsinin rəisi vəzifəsində çalışıb. Lakin OMON hadisələrindən sonra bu idarənin rəhbərliyinə olan etimad yox olub və qurum demək olar ki, buraxılıb. Bundan sonra İ. Ağayevin fəaliyyəti ictimaiyyətə məlum olmayıb. Sonradan İ. Ağayev Beynəlxalq Diaspora Mərkəzinin sədri kimi ictimaiyyətdə görünməyə başlayıb. Hətta bu çərçivədə rüşvət qalmaqalına görə, həbs edilən və sonradan azadlığa buraxılan Gülər Əhmədova ilə yaxınlığı da olub. İsmayıl Ağayev həm də Səbail rayon bələdiyyəsinin üzvü olub. http://gundeminfo.az/-ın iddiasına görə, bələdiyyə üzvü zamanı Ağayevin müəyyən qanunsuz əməllərə yol verib. Say sənəd yayaraq bəyan edib ki, bu sənəd İsmayıl Ağayev 2013-cü ildə Şıxovda saxta sənədlə satmasının sübutudur.

Namizəd 70 min manat dəyərində olan qiymətli əşyanı sahibinə qaytarmır...

Mübariz Nəsibov adlı iş adamı da 2012-ci ildə “Yeni Müsavat” a İsmayıl Ağayevdən şikayət edib. Biznesmen iddia edib ki, Beynəlxalq Diaspora Mərkəzinin rəhbəri vaxtı ilə ondan dəyəri 70 min manat olan qiymətli əşya alıb və bu günə qədər geri qaytarmaq niyyətində deyil: ““Uzun illərdir bizneslə məşğulam. 90-cı illərin əvvəllərində Sankt-Peterburqdan Azərbaycan Müdafiə Nazirliyi üçün zirehli gödəkçələr gətirirdik, yataq mebelləri gətirmişəm. İsmayılın mənimlə nə məqsədlə münasibət qurduğunu bilmirəm. Ancaq mən hər zaman ona dəstək olmuşam. O, DİN-in o zamankı Banditizm və Terrorizmlə Mübarizə İdarəsində çalışanda da ona maddi dəstək vermişəm. İsmayıla deyirdim ki, mənim biznesim var, maliyyə problemlərini düşünmə, heç kimdən də heç nə alma. Onun pula necə düşkün olduğunu da bilirəm. İndi o orda-burda mənim guya övladımın müalicəsi üçün ondan pul istədiyimi deyir. Mənim övladlarım İstanbulda universitetdə təhsil alırlar. Onların səhhətləri ilə bağlı Allaha şükür, heç bir problem olmayıb və yoxdur”.



İş adamının 10 min ədəd çəkməsi necə yoxa çıxıb?

M.Nəsibov İ. Ağayevin “OMON hadisələri” zamanı dediklərində də səmimi olmadığını bildirib: “İsmayıl Ağayev Mahir Cavadovun mühasirədən çıxmasına şərait yaradıb. İndi deyir ki, guya orada yaralanıbmış. Orada 2 nəfər yaralanıb, onların da adı istintaq materiallarında var. Orada İsmayıl yaralanmamışdı. İsmayıl Ağayev hər zaman mənə rəsmən yalvarıb ki, onun vəzifəyə getməsinə dəstək verim, onun Sumqayıta polis rəisi keçməsinə yardım edim. İsmayıl məndən dəyəri 70 min dollar olan brilyant daşı götürdü ki, bunu verib vəzifəyə gedəcək. Həmin daşı mən indiyə qədər İsmayıldan ala bilmirəm”.

Tərəflər arasında daha ciddi problem isə 10 min ədəd əsgər çəkmələrinin yoxa çıxması ilə bağlı olub: “1995-ci ilin yanvar ayında Daxili İşlər Nazirliyi mənim şirkətimə 10 min ədəd əsgər çəkməsi sifariş verdi. Biz o çəkmələri ucuz qiymətə İrandan gətirirdik. Çəkmələri Dərnəgüldəki anbarlarımıza yığmışdıq. İsmayıl Ağayev 2 gün sonra məndən 200 ədəd çəkmə istədi. Mən də dedim ki, çəkmələr dövlət sifarişidir, verə bilmərəm. Ertəsi gün gəlib gördüm ki, çəkmələr yoxdur. Mən ondan şübhələnməzdim. Hazırda AFFA-nın peşəkar futbol liqasının prezidenti olan Ramin Musayev mənimlə türmədə yatırdı, o həbsxanada özü mənə dedi ki, bu göstərişi "bandotdel"in işçilərinə İsmayıl Ağayev verib. Mən heç bu məsələni açıb-ağartmadım. İndi belə bir adam mənim ondan pul tələb etdiyimi deyir. Bir daha deyirəm, heç nəyə ehtiyacım yoxdur. İstədiyim sadəcə odur ki, İsmayıl gəlsin, bunları etiraf etsin və birdəfəlik özünü xeyriyyəçi, xalqın, millətin dərdinə yanan şəxs kimi təqdim etməkdən əl çəksin”.

“Pirşağı qəsəbəsindəki torpaq sahəsini qanunsuz olaraq zəbt edib”

Dia. Az saytı da bir müddət əvvəl deputatlığa namizədlə bağlı neqativ ruhda informasiya yayıb. Belə ki, Xocalı qaçqını Xudaverdiyeva Sevda Vəli qızı şok ittihamlar səsləndirib. DİA.AZ-a müraciət edən narazı vətəndaş həyat yoldaşı Telman Xudaverdiyefin hazırda Beynəlxalq Diaspor Mərkəzinin sədri, deputatlığa namizəd İsmayıl Ağayev tərəfindən şərlənərək həbs olunduğunu iddia edir. Sevda Xudaverdiyeva bildirir ki, İsmayıl Ağayev bir müddət əvvəl onların Pirşağı qəsəbəsindəki torpaq sahəsini qanunsuz olaraq zəbt edib və hətta daha da irəli gedərək, orada qeyri-qanuni inşa işləri də həyata keçirməyə başlayıb. Xudaverdiyevlər etriaz edəndə isə haızrda deputatlığa namizəd olan İsmayıl Ağayev torpaq sahibini şərləyərək onu həbsə atdırıb. İddia edib ki, giya Telman Xudaverdiyevə torpağın müqabilində pul verib. Narazı vətəndaş dia.az-a yazır ki, İsmayıl Ağayev 2-3 nəfər naməlum adamlarla gələrək özlərini Prezident Administrasiyasının nümayəndəsi kimi təqdim edərək zəbt olunmuş torpaq sahəsinin dövlətin marağında olduğunu bildiriblər: “Hücum edənlərin arasında Aleks adlı bir yəhudi isə hər şeyə qadir olduğunu bildirib. Əslində o dediklərini də edib. Həyat yoldağımı etiraz etdiyinə görə həbsə atdırıb”.
Onu da bildirək ki, Telman Xudaverdiyev 1987-ci ildə Qərbi Azərbaycanı məhz döyüşərək tərk edən azsaylı vətən oğullarındandır.

HÜSEYN

gundemxeber.az