Bu gün Nəsimi Rayon Məhkəməsində Zəngilandan köçkün düşən ailənin məşkunlaşdığı evdən didərgin salan “Kapitol” tikinti şirkətinin direktoruna qarşı açılan cinayət işilə bağlı məhkəmə prosesi keçirilib.

Ədliyyə Nazirliyi cinayət işini Nəsimi rayonu, Kərpic küçəsi 43 ünvanında məcburi köçkün Zərqələm Sadıqovaya məxsus evi dağıtdıqdan sonra ailəyə ev verilməsi ilə bağlı məhkəmənin qərarını yerinə yetirmədiyi üçün açıb.
Hakim Elmar İsayev sədrliyi keçirilən prosesdə ittiham olunan şirkətin direktoru 70 yaşlı Məhluqə Qibləliyevanın (Əslində çirkətin sahibi Abbas Səfərovdu. Lakin bu və ya digər məhkəmə proseslərində ona irəli sürülən ittihamlardan qamaq üçün şirkəti anasının adına keçirib-red) dindirilməsindən imtina edib.

Zərərçəkmişin qardaşı və nümayəndəsi Vahid Sadıqov bildirir ki, məhkəmə göstəriş əsasında qərar verməyə hazırlaşır: “Hakim bizim sullar səsləndirməyə belə imkan vermədi. Məhkəmə məcburi köçkün Zərqələm Sadıqovanın evinin dağıdılmasına və şirkətin ailəyə ev verməsi məsələsinə göz yumur. Qarşı tərəfin bütün tələblərini yerinə yetirdiyi halda bizim heç bir vəsatətimizi qəbul etmir. Bu bir daha sübut edir ki, məhkəmə prosesləri “Kapitol” firmasının sifarişləri ilə keçirilir. Bu gün Zəngilanın işğal günüdür. Belə bir gündə dövlətimiz bizim hüquqlarımızı bir daha tapdadı. İndi biz nə edək, Ermənistana sığınaq? Oktyabrın 12-də prokurorlar və vəkillər dinlənildikdən sonra məhkəmənin qərarı oxunacaq. İndidən bəllidir ki, hakim qarşı tərəfin xeyrinə qərar çıxaracaq. Buna görə də son ümid yeri kimi. Bir daha həm evimizi əlimizdən alan, 10 ildir bizi küçələrə salan tikinti şirkətinin sahibindən, ədalətsiz, qanunu yox, şəxsi mənfəətini güdən hakimdən ölkə başçısı cənab İlham Əliyevə müraciət edəcəyik”.

Qeyd edək ki, 2014-cu ilin iyul ayında Ədliyyə Nazirliyində şirkətin direktoruna qarşı cinayət işi açıb. Bir il nazirliyin istintaq idarəsində, 9 ay isə da Respublika Baş Prokurorluğunda iş gedib. İş yekunlaşdırıldıqdan sonra ittiham aktı tərtib olunaraq Nəsimi rayon Məhkəməsinə göndərilib. Hətta işə Cinayət Məcəlləsinin 306.2 maddəsi ilə baxılması istənilib.
Xatırladaq ki, Bakının mərkəzində göydələnlər ucaldan “Kapitol” tikinti şirkəti müxtəlif qanunsuzluqlar edərək Zəngilandan məcburi köçkün olan ailəni 10 ildən artıqdır ki, küçələrə salıb. “Kapitol” şirkətinin rəhbəri Abbas Səfərov ailənin məskunlaşdığı yurd- yuvanı yerlə yeksan edib. Şirkət dəfələrlə məhkəmələrin ailənin xeyrinə çıxardığı qərarları yerinə yetirmir.
Son olaraq onu da qeyd edək ki, Kapitol” şirkətinin rəhbəri Abbas Səfərov millət vəkili, 28 saylı Sabunçu seçki dairəsindən deputatlığa namizəd, Azərbaycan Kooperasiya Universitetinin rektoru Eldar Quliyevin qızının həyat yoldaşıdır.