1 noyabrda keçirilən parlament seçkiləri kifayət qədər qanun pozuntuları ilə yadda qaldı. Ən böyük qayda pozuntularından biri isə Azərbaycan Respublikasının baş naziri Artur Rasizadənin adı ilə bağlı oldu. gundemxeber.az xəbər verir ki, 16 saylı Yasamal rayon II Seçki Dairəsinin 29 saylı seçki məntəqəsinə gələrək səsvermə hüququndan istifadə edən baş nazirin barmağında mürəkkbə ləkəsinin olub-olmadığı yoxlanılıb. Qayda pozuntusu da məhz bu zaman baş verib. Seçki komissiyasının üzvü baş nazirin sol əlinin baş barmağını yoxlamaq əvəzinə, sağ əlinin baş barmağını ultrabənövşəyi lampadan istifadə edərək yoxlayıb və bülleten almaq üçün içəri dəvət edib. Baş nazirin sol barmağında mürəkkəb ləkəsinin olub-olmadığına isə baxılmayıb. Artur Rəsizadə özü də seçki komissiyasını üzvünə sol əlinin baş barmağını yoxlamaq lazım gəldiyini irad tutmayıb. Güman ki, baş nazir özü də Seçki Məcəlləsinin bu tələbini bilmədiyinə görə sərbəst şəkildə qanun pozuntusunun iştirakçısına çevrilib. Beləliklə də sol əlinin baş barmağı yoxlanılmayan baş nazirin daha əvvəl səs verib-vermədiyini bilmək mümkün olmayıb. Onu da qeyd edək ki, Seçki Məcəlləsinin 102.2 maddəsində "Seçicinin sol əlinin baş barmağının işarələnməsi" deyə qeyd olunur. Məcəllənin 102.3 maddəsində isə "Seçicinin barmağının əvvəl seçki bülletenini alarkən işarələnməsini müəyyən etmək üçün ultrabənövşəyi lampadan istifadə edilir " qeyd olunursa, o zaman komissiya üzvünün baş nazirin sağ əlinin baş barmağını yoxlayaraq səsverməyə imkan yaratması Seçki Məcəlləsinin kobud şəkildə pozulması deməkdir. Məsələ ilə bağlı hüquqşünas Ələsgər Məmmədli Cebhe.info-ya bildirib ki, seçki kifayət qədər neqativ hallar və pozuntularla müşahidə olunub: “Qanuna hörmət naminə baş nazir də bütün prosedurlara əməl etməli idi və bütün prosedurların tam qanuni həyata keçirilməsinə xüsusi diqqət yetirilməlidir. Bu pozuntunu həyata keçirən komissiya üzvləri İnzibati Xətalar Məcəlləsinin müvafiq tələblərinə uyğun olaraq məsuliyyətə cəlb olunmalı və cəzalandırılmalıdır”. P.S. Baş nazir Artur Rasizadənin sağ əlinin baş barmağı yoxlanaraq səsvermədə iştirak etməsini əks etdirən kadrlar canlı yayımlansa da, bu gün həmin kadrlar montaj edilərək silinib. Ancaq Artur Rəsizadənin və komissiya üzvünün Seçki Məcəlləsinin tələblərini pozması fotokameraların yaddaşlarında qalır.

Rövşən Əsədov
Cebhe.info