İsmayıllı rayon İcra Hakimiyyəti “Mətbuat xidmətinin rəhbəri” cənab Valeh Salehov açıqlama yaydı. Əvvəla, bəzi məqamlara toxunmazdan öncə onu vurğulamaq istərdik ki, şəhər və rayon icra hakimiyyətlərində aparılan struktur islahatlarının nəticəsi olaraq, vaxtilə qeyd olunan qurumlarda fəaliyyət göstərən ictimai-siyasi şöbə, hələ bir neçə il bundan əvvəl ləğv edilmişdir. Həmin şöbənin birbaşa vəzifəsi mətbuatla və ictimaiyyətlə əlaqə saxlamaqdan, ünvanlanan digər sualları da cavablandırmaqdan ibarət idi. Yəni həmin illərdə də, şəhər və rayon icra hakimiyyətlərində tam dəqiqliklə desək “Mətbuat xidmətinin rəhbəri” adlanan ştat yox idi. Bu gün isə, həmin vəzifəni icra hakimiyyəti başçılarının humanitar və ictimai-siyasi məsələlər üzrə müavini icra edir. Yəni, bir daha onu vurğulamaq istəyirik ki, şəhər və rayon icra hakimiyyətləri strukturunda “Mətbuat xidmətinin rəhbəri” deyilən ştat yoxdur. Odur ki, hər bir vəzifə sahibinə tövsiyyə olunur ki, daşıdığı vəzifəsinin necə adlanmasını düzgün yazmağa çalışsın.
Digər tərəfdən, ünvanladığınız mətndə bəzi sözlər tez-tez təkrarlandığından (edilib, edilir və.s), mətni olduğu qaydada tərəfimizdən verə bilmərik. Ancaq qarşı tərəfin istəyini, eyni zamanda KİV haqqında qanunun tələblərini nəzərə alaraq, göndərilmiş mətni çoxsaylı oxucuların diqqətinə olduğu kimi çatdırırıq.
Qarşı tərəf:


Son iki ildə İsmayıllı rayonunda tikinti- quruculuq işləri geniş vüsət alıb. Aparılan abadlıq işləri axrıncı iki ildə yüksək templə inkişaf etdirilir. (İstənilən KİV-ə sorğuya əsasən statistik rəqəmlər açıqlana bilər). Rayonda orta sahibkarlığı inkişaf etdirmək üçün yerli rəhbərlik bütün vasitələrdən istifadə edir. İsmayıllıda mavi qaz, elektrik enerjisi, içməli və suvarma suya olan təlabatın yerinə yetirilməsi üçün bütün imkanlardan istifadə edilib, hazırda da edilir. Rayon əhalisinin İcra Hakimiyyəti ilə təmasları bərpa edilib, neqativ halların yaranmaması üçün təxirə salınmaz tədbirlər həyata keçirilib. Hazırda da bu və ya digər məsələlər ,qarşıda duran vəzifələr RİHB Mirdamət Sadıqov tərəfindən nəzarətdə saxlanılır.
Lakin son bir ildə müsbət tendensiyaları görməyən bəzi KİV nümayəndələri rəhbəri olduqları qəzet və saytlarda RİHB Mirdamət Sadıqov haqqında həqiqəti əks etdirməyən məlumatlar dərc edir, böhtan xarakterli yoxlanılmamış fikirləri tirajlayırlar. Qısqanclıq, paxıllıq kimi hisslərlə yaşayan şəxslərin bəzən mətbuatı yanlış istiqamətə yönəltmələri KİV-də öz əksini tapır. KİV-dən çirkin işlərində vasitə kimi istifadə etmələri Mirdamət Sadıqova dair həqiqətdən çox-çox uzaq şayələrin yayılmasına gətirib çıxarır.
Məlumat üçün bildiririk ki, Mirdamət Sadıqovun “Birliyant” biznesi yoxdu, Seva adlı xanım tanımır. Bu fikirləri mətbuatdan oxuyub təəssüf hissi ilə qeyd edirik ki, onun Azərbaycan Respublikasının keçmiş MTN rəhbəri Eldar Mahmudovla yaxın münasibəti olmayıb. Bunu da mətbuat düzgün yazmayıb. Eldar Mahmudovun atası Əhməd Mahmudovun 89-cu yubiley konfransının Gəncə Aqrar Universitetində məxsusi keçirilməsinə dair irəli sürülən fikirlər də həqiqəti əks etdirmir. Mirdamət Sadıqov rektor olduğu 2012-ci ildə Aqrar Universitetdə Əhməd Mahmudovun yubiley konfransının keçirilməsi baş verib. Ə.Mahmudova həsr olunan konfrans ölkədə fəaliyyət göstərən 14 ali məktəbdə ,o cümlədən, Gəncə Aqrar Universitetində keçirilib. O zaman Mirdamət Sadıqov bu yubiley konfransına hər hansı məxsusi yanaşma nümayiş etdirməyib.
İcra Hakimiyyəti bir daha bildirir ki, İsmayıllı rayonu haqqında, RHİB Mirdamət Sadıqov barəsində yazılan tənqidi yazılar böhtan xarakterlidir, faktları əks etdirmir. Bu səbəbdən KİV nümayəndələrinə məsuliyyətli davranmaları tövsiyyə olunur. Mətni oldugu kimi dərc etməyiniz xahiş olunur.

Hörmətlə, Valeh Salehov

İsmayıllı Rayon İcra Hakimiyyəti mətbuat xidmətinin rəhbəri

P.S. “gundemxeber.az saytında 02-noyabr-2015-ci il tarixdə “Mirdamət Sadıqovla Eldar Mahmudovu bağlayan nədir?” başlıqlı məqaləyə qarşı tərəfdən verilən açıqlamalar, heç də həqiqəti əks etdirmir. Çünki, məqalədə Mirdamət Sadıqovla Eldar Mahmudovun işbirliyindən, onun vaxtilə rəhbərlik etdiyi ali təhsil ocağında Əhməd Mahmudovun yubiley tədbirinin keçirilməsindən, brilyant biznesi ilə məşğul olmasından, onun işlərini həyata keçirən Seva adlı xanımdan bəhs etdiyimiz halda, qarşı tərəf öz maraqlarına uyğun cavablar yazmaqla, olmayan abadlıq-quruculuq işlərini zörən kimlərinsə düşüncəsinə yeritmək istəyindədirlər.

“Gündəm Xəbər”