Qardaş Türkiyə mətbuatı Azərbaycanda baş verənləri, ölkəmizlə bağlı xəbərləri hər zaman diqqət mərkəzində saxlayır. Ölkənin əksər mətbu orqanlarında Azərbaycanda həyata keçirilən islahatlar, Dağlıq Qarabağ münaqişəsi ətrafında yaşananlar əks olunur, regionda baş verən hər hansı bir önəmli hadisənin ölkəmizin iştirakı olmadan baş vermədiyi qeyd edilir. Elə parlament seçkilərində də bunun şahidi olduq. Əksər elektron və çap orqanları Azərbaycandakı seçkiləri obyektib formada 70 milyonluq Türkiyə ictimaiyyətinə çatdırdılar. Həmim nəşrlərdə Azərbaycanla bağlı gedən xəbərlərə baxış sayının rekord həddə çatdığını müşahidə etmək mümkündür. Bu da Türkiyə üçün Azərbaycanın nə qədər strateji önəm kəsb etdiyinin bariz nümunəsidir.

Bunun bir sıra siyasi səbəbləri ilə yanaşı, iqtisadi önəmliliyi də var. Belə ki, Azərbaycanla Türkiyəni artıq tam gücü ilə işləyən layihələr - Bakı-Tbilisi-Ceyhan, Bakı-Ərzurum, Bakı-Tbilisi-Qars bağlayır. Ən əsası, tək region üçün deyil, Avropa üçün də əhəmiyyət kəsb edən TANAP layihəsi reallaşmaq üzrədir. Məhz bu səbəblərdən də türk xalqı üçün Azərbaycanda sabitliyin və əmin-amanlığın olması önəmli məsələdir. Təsadüfi deyil ki, qardaş ölkənin mətbuatı prezident İlham Əliyevin keçirdiyi görüşlərinə, səfərlərinə, səsləndirdiyi bəyanatlara böyük önəm verir və onu öz səhifələrində ilk yerlərdə dərc edir.

Məsələn, ötən gün qardaş ölkənin aparıcı xəbər agentlikləri, saytları, qəzetləri dövlət başçısının miqrantlarla bağlı səsləndirdiyi fikirləri dərc edib. Bu sırada Cihan, Anadolu, DHA agentlikləri, "Bu gün", "Dünya" qəzetləri və s. nəşrləri göstərmək olar. "TRT Türk" nəşri "Aliyev`den Avrupa`ya sığınmacı eleştirisi" başlıqlı məqaləsində yazır ki, prezident İlham Əliyev bölgədə və dünyada gedən proseslər barədə maraqlı fikirlər səsləndirib. Nəşr qeyd edir ki, prezident dünyada maliyyə və iqtisadi sahədə yaşanan böhrandan bəhs edib. "İndi bu böhrana siyasi və hərbi böhran əlavə olunub. İndi dünyada gedən prosesləri siz də izləyirsiniz. Görürsünüz ki, dünyanın müxtəlif yerlərində, bizim qonşuluğumuzda çox narahatedici proseslər gedir. Həm Avropada, həm MDB məkanında, Yaxın Şərqdə qanlı toqquşmalar, qarşıdurmalar baş verir, qan tökülür. Belə olan halda, hər bir ölkə ilk növbədə öz təhlükəsizliyi haqqında daha da ciddi düşünməlidir. Əslində, biz bu barədə həmişə düşünmüşük. Azərbaycan xalqının təhlükəsiz şəraitdə yaşaması bizim üçün ən birinci prioritet məsələ idi. Çünki əgər biz buna nail ola bilməsə idik, heç bir inkişafdan söhbət gedə bilməzdi. Sabitlik olmayan yerdə inkişaf mümkün deyil", - deyə nəşr prezidentin sözlərini sitat göstərib.

Anadolu agentliyi də prezidentin Avropada yaşananlarla bağlı fikirlərini dərc edib. "Baxın, bu gün Avropada mənəvi böhran yaşanır. Avropa bəyan etdiyi dəyərlərə sadiq çıxa bilmir, miqrantlara - müsəlman qaçqınlarına nə qədər böyük əzab-əziyyət verilir, onların ləyaqəti alçaldılır, onlara qarşı çox dözülməz, qəbuledilməz addımlar atılır. Mən dəfələrlə demişəm, o insanların heç bir günahı yoxdur. Xarici müdaxilə nəticəsində onların ölkələri darmadağın edildi, onlar on minlərlə, yüz minlərlə yaxınlarını itirdilər, milyonlarla insan qaçqın vəziyyətinə düşdü və indi onlar Avropaya pənah aparırlar. Orada isə onların qarşısında sədlər tikilir, tikanlı məftillər çəkilir, onlara itlərlə hücum edilir, onlar qəfəsə salınır. Sonra isə insana yaraşmayan o qəfəsin üstündən onlara yemək atılır. XXI əsrdə bu qədər dözülməz hərəkət heç kimə şərəf gətirmir. Bu, bir sınaq dövrüdür. Avropa indi bu sınaqdan çıxmalıdır, bəyan etdiyi dəyərlərə sadiq qalmalıdır. Yoxsa, əgər bu vəziyyət davam edərsə, heç bir başqa ölkə qarşısında heç bir tələb qoyula bilməz. İlk növbədə, sən özün daxildə bu prosesləri normal məcraya salmalısan, özün daxildə bəyan etdiyin dəyərlərə sadiq çıxmalısan, ondan sonra kimdənsə nəsə tələb edə bilərsən. Bu proseslər bizi çox narahat edir, incidir, ürəyimizi ağrıdır. O yazıq insanları bu vəziyyətdə görəndə əminəm ki, hər bir normal insan çox ağır hisslər yaşayır. Digər tərəfdən, bu, dini qarşıdurmadır, - mən bunu belə adlandırardım, - bu, miqrant böhranı deyil, bu, dini qarşıdurmadır, bu, islamafobiyanın əlamətidir. Bu, son illər ərzində anti-müsəlman təbliğatının nəticəsidir və bu, daha da böyük problemlərə və dünyada sivilizasiyalararası toqquşmaya gətirib çıxara bilər", - deyə dövlət başçısı vurğulayıb.

Yuxarıda qeyd etdiyimiz kimi, nəşrlər tək dövlət başçısının çıxışları deyil, onun səfərlərinə də böyük önəm verirlər. Bu sırada, prezident İlham Əliyevin qonşu Gürcüstana səfəri diqqət mərkəzindədir. Məsələn, "Cihan" agentliyi "Azerbaycan Cumhurbaşkanı Aliyev Tiflis`te" başlıqlı məqalədə səfərin yüksək səviyyədə keçməsindən, bu səfərin tək iki ölkə üçün deyil, Türkiyə üçün də önəmindən bəhs edib. Nüfuzlu "Bu gün" qəzeti isə bu səfərə "Azerbaycan Cumhurbaşkanı Aliyev Gürcistan`da" başlıqlı yazısı ilə yer ayırıb. "Taym türk" nəşri də səfərlə bağlı yazısının başlığını "Azerbaycan Cumhurbaşkanı Aliyev Gürcistan`da" kimi qoyub. Burada dövlət başçısının səfər zamanı səsləndirdiyi bəyanatlara yer ayrılıb. Dövlət başçısı iki ölkənin çox yaxın işbirliyində olduğunu, xüsusən də torpaqların bütövlüyünün qorunması məsələsində bir-birinə dəstək verdiklərinin söyləyib. Eləcə də, 2008-ci ildə Rusiya ilə Gürcüstan arasında gedən müharibə zamanı Azərbaycanın bütün təzyiqlərə baxmayaraq, Gürcüstana hərtərəfli yardım etdiyini də nəşr diqqətə çatdırıb.

Yeri gəlmişkən, qardaş ölkənin nəşrləri bunlarla yanaşı, prezident İlham Əliyevin son günlər sahibkarlığın inkişafi ilə bağlı həyata keçirdiyi islahatlar, verdiyi fərman və sərəncamları da təqdir edirlər. Məsələn, "Son dakika" nəşri "Tusiab`dan Azerbaycan Cumhurbaşkanı Aliyev`e Tam Destek" başlıqlı yazısında türk iş adamlarının fikirlərini dərc edib. TÜSİAB-ın rəhbəri Yavuz Keleş prezidentin bu istiqamətdə atdığı addımların Azərbaycanda çalışan türk iş adamları tərəfindən dəstəkləndiyini bəyan edib. Onlar lisenziyaların "ASAN xidmət" mərkəzlərinə verilməsi, vergi yoxlamalarının dayandırılması, eləcə də gömrük rüsumlarının azaldılmasına görə dövlət başçısına təşəkkürlərini çatdırıblar.

Kaspi.az