Ticarət Mərkəzində kassa aparatı adı çəkənə xor baxırlar

Qəzetimizin ötən saylarında paytaxtın ən böyük ticarət mərkəzlərindən sayılan “Laçın” Ticarət Mərkəzində baş verən qanunsuzluqlardan, icarədarların rəhbərlik tərəfindən necə, hansı üsullarla istismar edilməsindən bəhs etmişdik. Vurğulamışdıq ki, ticarət mərkəzinin rəhbərliyinin arenda qiymətlərini fantastik dərəcədə artırması icarədar və satıcıları istehlakçılara keyfiyyətsiz məhsulları baha qiymətə satmaq məcburiyyəti ilə üz-üzə qoyur. Bugünlərdə məlum ticarət mərkəzi ilə bağlı redkasiyamızı bilgiləndirən özəl mənbə, “Laçın” Ticarət Mərkəzinin vergi maxinasiyaları ilə bağlı da maraqlı informasiyalar çatdırıb. Mənbənin verdiyi ən mühüm xəbərlərdən biri ticarət mərkəzində kassa aparatılarının olmaması ilə bağlıdır.

Ticarət Mərkəzində kassa aparatları niyə yoxdur?

Mənbənin sözlərinə görə, bu günün özündə də kassa aparatları olmadan fəaliyyət göstərən ticarət mərkəzi bununla vergidən külli miqdarda vəsait yayındırır ki, bu da nəticə etibarilə ölkə büdcəsinə ziyan vurur: “Ticarət mərkəzində kassa aparatları yoxdur. İşin ən maraqlı tərəfi isə bu durumun nə satıcıları, nə də mərkəz rəhbərliyini narahat etməməsidir. Satıcılar uzun illərdir ki, kassa aparatları olmadan fəaliyyət göstərməyə o qədər öyrəniblər ki, bu gün ticarət mərkəzində kassa aparatının adını çəkən şəxslərə yad planetdən gələn insanlar kimi baxırlar. Nə qədər qəribə də olsa Vergilər Nazirliyinin ticarət mərkəzində vaxtaşırı təftiş aparmalı olan əməkdaşları da kassa aparatlarının yoxluğu ilə bağlı hər hansı müvafiq addım atmır. Bu isə vergidən yayınmaq üçün ciddi zəmin yaradır ki, nəticədə hər ay xeyli miqdarda pul dövlət büdcəsi əvəzinə müxtəlif şəxslərin cibinə axır. Məhz bu səbəbdən də başda rəhbərlik olmaqla bəzi şəxslər kassa aparatlarının mövcudluğuna maraq göstərmir”.

Dövlətə badalaq atmaqla əldə edilən imtiyaz

Bilgili qaynağın məlumatına görə, ticarət mərkəzində kassa aparatlarının mövcud olmaması rəhbərlik tərəfindən xüsusi imtiyaz hüququ kimi dəyərləndirilməkdədir: “Laçın” rəhbərliyi nəinki ticarət mərkəzində kassa aparatlarının mövcudluğuna səy göstərmir, əksinə bəzən kassa aparatlarının yoxluğu ilə fəxr edir, bunu ticarət mərkəzinin malik olduğu xüsusi imtiyazla izah edir. Laçın rəhbərliyi hesab edir ki, əslində kassa aparatlarının yoxluğu ilə arendatorlar fəxr etməli və anlamalıdırlar ki, onların icarədar olaraq çalışdıqları məkan sıradan bir alqı-satqı mərkəzi deyil. Bura qanunlara meydan oxuyan bir mərkəzdir ki, bu da kassa aparatlarının yoxluğu həqiqəti ilə isbatlanmaqdadır. Bir sözlə, “Laçın” Ticarət Mərkəzi sözün həqiqi mənasında Vergilər Nazirliyi və onun simasında dövlətə meydan oxumaqdadır ”.

“Post-terminal – o nə olan şeydir?”

Məlumatlı qaynağın sözlərinə görə, ticarət mərkəzində kassa aparatları ilə yanaşı post-terminal avadanlığı da mövcud deyil. Məhz bu səbəbdən də bu gün “Laçın” Ticarət Mərkəzində çalışan şəxslərin çoxu post-terminal anlayışının ümumiyyətlə nə olduğu haqqında məlumatlı deyil: “Ticarət mərkəzində kassa aparatları kimi post-terminal avadanlığı da mövcud deyil. Buna görə də ticarət mərkəzindən alqı satqı edən vətəndaşların hamısı yalnız nəğd pulla alış-veriş etmək məcburiyyəti qarşısında qalırlar. Bu isə heç də bütün vətəndaşların maraqlarına cavab vermir. Ümumiyyətlə, ticarət mərkəzi günün tələblərinə ayaq uyğunlaşdırmaq baxımından o qədər geri qalır ki, hətta icarədar və satıcıların bir çoxu post-terminal anlayışı haqqında primitiv bilgiyə sahib deyillər. Ticarət mərkəzində post-terminalla bağlı söhbət düşən zaman qarşı tərəfin verdiyi ilk reaksiya – “o nə olan şeydir” ifadəsi olur. Bir sözlə, “Laçın” Ticarət Mərkəzi çağdaş dünyada təmsil olunsa da, bu dünyanın tərkib hissəsindən daha çox onun əlavəsi olan bir mərkəz kimi fəaliyyət göstərir və yazılanlardan da göründüyü kimi, bu mərkəzin günün tələbləri ilə uyuşması üçün ciddi islahatlara ehtiyac var”.

“Bizim öz qanunlarımız var”

Bilgili mənbənin məlumatına görə, ticarət mərkəzinin rəhbərliyi “Laçın”da çalışan şəxslərin hüquq və mənafeyinə hörmət etmir, mərkəz daxili əlaqələri kobud idarəetmə üsulu əsasında tənzimləməyə çalışır: “Laçın” Ticarət Mərkəzinə xas olan əsas problemlərdən biri də idarəetmə sisteminin kobud qaydalar əsasında həyata keçirilməsi, bu zaman ticarət mərkəzində çalışan vətəndaşların hüquq və maraqlarının nəzərə alınmamasıdır. Ticarət mərkəzini sərt və qaba üsullarla idarə edən rəhbərlik satıcı və icarədarların narazılığını nəzərə almır, qarşı tərəfin maraqlarını tapdalamaqla mövcud narazılıqların daha da artmasına səbəb olur. Rəhbərlik öz etirazını büruzə verən şəxslərə bildirir ki, “Laçın”ın öz qanunları var və burada hər şey məhz bu qanunlarla idarə olunur. Əgər kimsə bundan narazıdırsa o zaman ticarət mərkəzini tərk edə bilər. Bir sözlə, nəhəng ticarət mərkəzində mənəvi-psixoloji durum olduqca ağırdır vəı belə davam edəcəyi təqdirdə Binə-Sədərk olaylarının bu kəs “Laçın”da yaşanması qaçınılmaz olacaq”.

İlqar Rəsulov