Rabitə və yüksək texnologiyalar nazirinin birinci müavini təyin olunub. Trend-in məlumatına görə, Azərbaycan Prezidenti İlham Əliyevin Sərəncamı ilə rabitə və yüksək texnologiyalar nazirinin birinci müavini təyin olunan Ramin Quluzadə bu gün nazirliyin kollektivinə təqdim edilib.

Əldə etdiyimiz məlumata görə, rabitə və yüksək texnologiyalar nazirinin birinci müavini təyin olunan Ramin Quluzadə Heydər Əliyev Fondunda İşlər departmentinin direktoru vəzifəsində çalışıb. 2004-cü ildən Fondda fəaliyyət göstərən Ramin Quluzadə bu qurumun təşkilati işlərində, respublika daxilində və xarici ölkələrdə sosial, humanitar layihələrin həyata keçirilməsində iştirak edib.

Ramin Quluzadə Azərbaycan Prezidentinin 2014-cü ildə imzaladığı Sərəncama əsasən Heydər Əliyev irsinin qorunması və təbliğində səmərəli fəaliyyətinə görə “Tərəqqi” medalı ilə təltif edilib.

1977-ci ildə Bakı şəhərində anadan olub. 1999-cu ildə Azərbaycan Dövlət İqtisad Universitetini magist dərəcəsi ilə bitirib. Ailəlidir, 2 övladı var.



Maraqlıdır ki, Rabitə və yüksək texnologiyalar nazirinin indiyəqədərki birinci müavini İltimas Məmmədovun vəzifəsindən azad olunması haqda sərəncam elan olunmayıb. Bu səbəbdən onun hazırki statusu qeyri-müəyyəndir.

Xatırladaq ki, İltimas Məmmədov Prezidentin 22 iyul 2014-cü il tarixli sərəncamı ilə rabitə və yüksək texnologiyalar nazirinin birinci müavini təyin olunmuşdu. Əli Abbasovun vəzifəsindən uzaqlaşdırılmasından sonra isə nazirin səlahiyyətlərini də icra edirdi.

V.Nəsibov