Deputatlığa sabiq namizəd Avropa İnsan Haqları Məhkəməsinə üz tutur

Əslən Cəbrayıl rayonunun Hovuslu kəndindən olan, Sumqayıt şəhərində yaşayan, Qafarov Ədalət İzzət oğlu “Gündəm-Xəbər”ə müraciət edərək işğalçı ermənistan tərəfindən dağıdılmış mülkiyyətinə, ailəsinə vurulmuş maddi və mənəvi ziyana görə Ermənistandan 20 milyon dollar təzminat tələb edəcək. Hüquqşünas arxiv sənədlərini toplayaraq Avropa İnsan Haqları Məhkəməsinə müraciət etmək qərarına gəlib.

Şikayət məktubunda bildirilir: “Mən Cəbrayıl rayonunun Hovuslu kəndində anadan olmuşam. Bütün Cəbrayıl rayonunun kəndlərini və vətənim müstəqil Azərbaycanımızın bütövlüyünü özümə doğma bilirəm və bu amal uğrunda mübarizədəyəm.

Şəkildə gördüyünüz ev atam İzzətin, mərhum anam Zeynəbin, bacı-qardaşlarımın, yaxın qohumlarımın hər birinin əllərinin zəhməti ilə tikilərək şəkildəki formada istifadəmizdə olmuşdur. 23 avqust 1993-cü il tarixdən işğalçı Ermənistan tərəfindən dağıdılaraq digər şəkildəki formasını almışdır. Bu gün mənim doğma evimin, rayonumuzun, Azərbaycan torpaqlarının işğal altında qalması bir Azərbaycanlı Hüquqşünas kimi məni çox narahat edir. Hətta hər cürə əzab-əziyyətə qatlaşaraq zəhmətimiz ilə tikdiyimiz evimiz və işğal altında qalmış kəndimiz, gəzdiyim Qarabağ, Zəngəzur torpaqları tez-tez yuxuma gəlir.

Həmin torpaqların müdafiəsi uğrunda gedən döyüşlərdə uyuyan Şəhidlərimizin, kənd qəbirsanlıqlarında uyuyanlarımızın erməni işğalçılarının ayaqları altında qalmasını, dinc sakinlərimizin ermənilər tərəfindən girov götürürülməsini Azərbaycanlı Hüquqşünas kimi özümə bağışlaya bilmirəm. Müstəqil Azərbaycanımızın 20% torpaqlarının ermənilər tərəfindən işğal olunmuş rayonlarında tək bizim ailəmizə bu qədər maddi və mənəvi ziyanlar vurulmuşdursa, diğər ailələrə, kəndlərə rayonlara, ermənistandan qaçqın düşmüş azərbaycanlılara nə qədər ziyanlanın vurulması yenidən komissiya yaradılaraq hesablanmalıdır.

Belə olan halda Beynəlxalq hüquq səviyyəsində işğalçı Ermənistan tərəfindən öz ata-baba yurdlarından Qaçqın düşən və Azərbaycanımızın 20% işğal olunmuş torpaqlarından məcburi köçkün düşmüş ailələrə nə qədər maddi və mənəvi ziyan vurmalarını tələb etmək hüquqlarımız var.

Deməli işğalçı Ermənistan tək bizim ailəmizə 23 avqust 1993-cü ildən bu günkü tarixədək 20 milyon dollardan çox maddi və mənəvi ziyanlar vurmuşdur ki, mən həmin ziyanın Ermənistan respublikası tərəfindən ödənilməsi ilə əlaqədar Avropa İnsan Haqları Məhkəməsinə müraciət etmək qərarına gəlmişəm.

Odur ki, yuxarıda qeyd etdiklərimi, Beynəlxalq Hüquq normalarını nəzərə alıb İşğalçı ermənistandan 20 milyon dollar dəyərində Ailəmizə dəyən maddi və mənəvi ziyanı tələb etməklə yanaşı işğal altında qalmış torpaqlarımızın azad olunmasını bir Azərbaycan Respublikası vətəndaşı olaraq tələb edirəm”.

Azərbaycan Respublikası Milli Məclisinə V çağırış 42 saylı Sumqayıt ikinci seçki dairəsindən deputatlığa sabiq namizəd,

Hüquqşünas, Qafarov Ədalət İzzət oğlu

gundemxeber.az