Deputatdan Nardaran hadisələri ilə bağlı ilginc açıqlama Zahid Oruc: “Hökumət daxilindəki diversantların ifşası onlarla əlaqədə olan dairələri hərəkətə gətirib”



Milli Məclisin deputatı Zahid Oruc bu gün Nardaranda 4 nəfərin ölməsi və bir neçə nəfərin yaralanması ilə nəticələnən hadisə ilə bağlı Bizimyol.info saytına açıqlama verib. Deputat bildirir ki, belə bir hadisənin baş verməsi gözlənilən idi. “Çünki uzun müddətdir ki, Nardaranda dini radikalizm inkişaf etmıkdə idi və bu da öz müstəvisini dəyişəcəkdi. Bu proses etiqad, kimlərinsə dini inanclarını yerinə yetirməsindən çıxaraq siyasiləşirdi və məsciddə keçiriləm mərasimlər daha çox proses hadisəsinə oxşayırdı. Bu gün məscidlərdəki rituallar az qala siyahsi qərargahlarda olan fəaliyyətə keçməkdədir. Allah evini anti-iqtidar mərəkəsinə döndərmişdilər. Ona görə də Taleh Bağırzadə, onun çevrəsindəki adamlar, bu şəxslərə ton verən siyasi dairələr onu göstərirdilər ki, partiyalar zəifləyəndə dini hərəkatları önə çıxartmaq meyli güclənir. İlkin məlumatlara əsasən, bu günki hadisəsdə 4 nəfər ölub və şübhəsiz ki, dövlətin müvafiq qurumları bu məsələyə hüquqi qiymət verəcəklər. Çünki heç bir halda dövlətə güllə atmaq olmaz. Hər bir insanın, hər bir polisin həyatı qiymətlidir” – deyə deputat bildirir.

O qeyd edir ki, bu məsələdə iki tərəf arasında vətəndaş və dövlət orqanları kimi bir səngər qazmaq olmaz. “Bu məsələdə tərəf yoxdur. Ölkədə dini etiqadlarını həyata keçirmək üçün heç kimə problem yaradılmır. Azərbaycanda belə yollarla müxtəlif hadisələr həyata keçirmək və onların çevrəsində olan dəstəkçi qrupların maraqlarını təmin etmək mümkün olmayacaq. Konkret onu nəzərdə tuturam ki, ölkənin birinci şəxsi hökumətin daxilində olan diversantlara, cinayətkar şəxslərə qarşı atdığı sərt addımlar bir zamanlar bu qruplarla əlaqədə olan dini dairələrdə, mediada bir hərəkətlənməyə səbəb olub. Bu məsələlər sanki sinxron şəkildə bir biri ilə bağlıdır. Elə bilin ki, həmin narazı kəsim öz dayaqlarına zərbə dəydiyini hiss edib. Onların ölkələrindəki şəbəkə arsenallarında böyük maddi vəsaitlər, hətta görünən odur ki, silahlar var. Belə olan təqdirdə kimsə dini fəaliyyətini silahlı vasitəylə həyata keçirmək istəyəcəksə, onlara qarşı konkret addımlar olmalıdır. Çünki Qarabağı çıxmaq şərtilə ölkənin bütün ərazisində Azərbaycan Konstitusiyası qüvvədədir. Ona görə də ölkənin hansısa məkanını qara bayraqlara bürümək, onu üçrəngli bayrağımızdan yuxarı qaldırmaq, şəriət qaydalarını bərqərar etmək istəmək yolverilməzdir” – deyə deputat bildirdi.

Rəşad VAQİFOĞLU