«Qaynanasının adı Sveta idi. Hadisələr başlayandan
sonra onu Yerevana ailəsinin yanına yolladılar.
Sonralar Gürcüstanda görüşürdülər»

Yazıçı Əkrəm Əylisliyə qarşı total kampaniya sonrası yenidən aktuallaşmış erməni qohumluğu mövzusu gündəmdən düşmək bilmir. Xüsusən də, iri məmurların, tanınmış şəxslərin ermənilərlə yaxın-uzaq qohumluq əlaqələri haqda köhnə-yeni məlumatlar müzakirə mövzusudur. İqtidarın təbliğat maşınının qarşısında Əkrəm Əylislini ermənilərlə bağlamaq hədəfi qoyulduğu halda, müstəqil mətbuat elə iqtidarda təmsil olunanların özlərinin ermənilərlə qohumluğuna dair çeşidli məlumatlar yayır. Belə məlumatlardan biri bu günlərdə «Azpolitika.info»-ya da daxil olub.
Sən demə Azərbaycanın ən məşhur oliqarxlarından birinin qaynanası da erməni imiş. Bu oliqarxın adını çəkmirik, çünki məlumatın bir məqamı məhkəməlik ola bilər. Lakin bizim əlimizdə sübut yoxdur. Ya oliqarxın adını çəkib, məlumatın həmin hissəsini verməməliyik, ya da məlumatı yayıb, oliqarxın adını birbaşa çəkməməliyik. Biz ikinci seçimin üzərində dayandıq. Lakin fikrimizcə, söhbətin kimdən getdiyini çox adamlar başa düşəcək.
Bir daha qeyd edirik ki, Azərbaycanın ən məşhur iş adamlarından biridir və siyasi hakimiyyətlə də çox ciddi tellərlə bağlanır. Rəsmi, qeyri-rəsmi varidatı yüz milyonlarla ölçülür. İqtisadiyyatın bir neçə sahəsi üzrə inhisarçı kimi tanınır. Oliqarx-nazirlərdən biri ilə şərikli biznesi var.
Bu oliqarxa yaxın mənbə «Azpolitika.info»-ya deyib: «Qaynanasının adı Sveta idi. Hadisələr başlayandan sonra onu Yerevana ailəsinin yanına yolladılar. Qadın niyə uşaqlarının yanında qalmadı, bilmirəm. Hər halda kürəkəni onu qoruya bilərdi. Uşaqlar - iş adamının həyat yoldaşı və qardaşı burda qaldı. Sonrakı illərdə Gürcüstanda, həmçinin bəzən Fransada tez-tez görüşürdülər. Bir neçə il əvvəl qadın dünyasını dəyişdi. Ondan sonra Ermənistandakı qohumlarla əlaqələrinin qalıb-qalmadığını deyə bilmərəm».
Məlumatın ən maraqlı hissəsi isə (həm də bizi ad çəkməkdən ehtiyyatlandıran-V.N) mənbənin bundan sonra dedikləridir: «Məndə olan məlumata görə, Ermənistandakı erməni qohumlarına yaxşı pul buraxmışdı. Qaynanasının qardaşları bu pulla Yerevanda böyük biznes qurmuşdular. Bunu ailənin nümayəndələrinin birinin dilindən eşitmişdim. Qaynı da hazırda Bakıda yaşayır və iş adamının biznesinin bir qisminə nəzarət edir. Anası dünyasını dəyişəndən sonra ordakı qohumları ilə görüşüb-görüşmədiklərini bilmirəm».
Əlbəttə, ermənilərlə qohumluq cinayət deyil. 30-40 il əvvəl heç kim bilə bilməzdi ki, vaxt gələcək azərbaycanlılarla ermənilər düşmən olacaqlar. İndi heç kimdən tələb də oluna bilməz ki, ermənilərlə qohumluğa son qoy. Ancaq maraqlıdır, niyə məhz erməni ilə hansısa şəkildə qohumluğu olan adamlar Azərbaycanda irəli çəkilirlər?
Bu nazir ölkədə başqa adam tapmadı ki, erməni qohumluğu olan adamla şərikli biznes qurdu?! Bu qədər faciələrdən sonra Azərbaycanlı oliqarxın pulu ilə - hansı ki, bu pullar əsasən qanunsuz yollarla xalqın cibindən oğurlanaraq əldə olunub - hansısa erməni, lap olsun ki, qohumluq münasibətləri olan bir erməni, necə biznes qura bilər?!
Bu oliqarxın milyonçuya çevrilmiş qaynının doğmaca dayıları və onların uşaqları, xalaları və xalauşaqları ermənidirlər və Ermənistanda yaşayırlar. Heç kim deyə bilməz ki, onlar əlaqə saxlamır, görüşmürlər. Belə bir adama bu qədər geniş imkanlar tanımaq milli təhlükəsizliyə zərbə deyilmi?

Vaqif NƏSİBOV,
Azpolitika.info