T.Məmmədov: “Hər il “Şəhid Ailələri, Əlillər və Müharibə Veteranlarının Müdafiəsi” İB-i barədə, Azərbaycan Respublikasının Prezidenti yeni qanunlar, sərəncam və fərmanlar imzalasa da, məhkəmələrdə hakimlər isə, tamamilə bunun əksinə qərarlar qəbul edirlər”
“Şəhid Ailələri, Əlillər və Müharibə Veteranlarının Müdafiəsi” İB-i, Xətai rayon şöbəsinin orqanı olan “Uca Zirvə Qarabağ Qaziləri” qəzetinin 29 oktyabr 2015-ci il tarixli sayında, “Xəyanət” başlıqlı açıqlama işıq üzü görmüşdü. Açıqlamada Xətai rayon şöbəsinin sədri vəzifəsini daşıyan Tahir Məmmədovun, üz-üzə qaldıqları problemlə bağlı söylədiyi fikirlər, bu gün də daha çox rezonans doğurmaqdadır. Açıqlamada Nobel prospekti-139 C ünvanında yerləşən qərargahın, Əmlak Məsələləri üzrə Dövlət Komitəsi yanında Reyestr Xidməti tərəfindən satılması və bütövlükdə Qarabağ müharibəsi əlillərinin, şəhid ailələrinin və veteran kontingentinin təhqir olunmaları barədə məlumat da vermişdi. Uzun sürən çəkişmələrdən sonra, təşkilatın yerləşdiyi qərərgahın satılmasının qanuni olduğunu məhkəmələr də təsdiqləmişdi ki, bunu da Tahir Məmmədov Azərbaycan torpaqlarına XƏYANƏT hesab edir. O, bu xəyanətin acı nəticələr verəcəyini dəfələrlə bəyan etmiş və yuxarı instansiyalardan bu barədə qazilərə kömək göstərmələrini də xahiş etmişdir. Ünvanladığı müraciətlərində Tahir Məmmədov dəfələrlə bildirib ki, “atılan addımlar hansısa qarşıdurmaya və qan tökülməsinə də səbəb olacaq” deyə fikirlərini çatdırsa da, təəssüflər olsun ki, ünvanlanan müraciətlərə yuxarı instansiyalardan heç bir reaksiya verilməyib.
Xətai rayon Məhkəməsi İcra Şöbəsinin əməkdaşları, təşkilatın Nobel prospekti-139 C ünvanındakı qərargahını boşaldaraq, onu “TÜSİAB” İB (türk iş adamlarına) təhvil vermək istəyirlər. Tahir Məmmədov bunu xəyanət hesab edərək onu da bildirir ki, “qərərgahımızın yerləşdiyi ərazidən təqribən beş dəfə böyük əraziyə malik olan və başqa dövlətin pullu iş adamlarına bizim cəmi iki sot yerimizi satmaqla, öz hərəkətlərinə qanuni don geyindirmək, əslində xəyanətdən başqa bir şey deyil. O, onu da bildirir ki, “ərazini illər əvvəl ələ keçirmiş “TÜSİAB” İB, ondan bu günədək heç bir məqsədlə istifadə etməyib və hal-hazırda da oranı 1 milyon dollara satışa çıxarıb. Satışa çıxarılmış əraziyə hər gün torpaq müştəriləri gəlib gedirlər. Təşkilatın qərərgahı kimlərinsə marağı ucbatından, sanki bazara da çevrilib”.
O, onu da bildirir ki, “ərazi daim İB-in istifadəsində olub. Bizim qeyd olunan əraziyə aid mülkiyyətçi və istifadəçi hüququmuz da vardır. Belə olan halda, görəsən hansı əsasla oranı boşaltmağı bizdən tələb edirlər? “Şəhid Ailələri, Əlillər və Müharibə Veteranlarının Müdafiəsi” İB-i barədə, hər il Azərbaycan Respublikasının Prezidenti yeni qanunlar, sərəncam və fərmanlar imzalasa da, məhkəmələrdə hakimlər isə, bunun əksinə qərarlar qəbul edirlər”.
Təşkilatın sədri T.Məmmədov Azərbaycan Respublikasının suverenliyi, müstəqilliyi, azadlığı uğrunda vuruşmuş, torpaqlarımızın müdafiəsində yaxından iştirak etməklə sağlamlıqlarını itirmiş qazilərə, onların torpaqlarını satan məmurlara qarşı birləşib, birlikdə mübarizə aparmağa səsləyir. Eyni zamanda o, Xətai rayon Nobel prospekti-139 C ünvanında, təşkilatın qərargahının müdafiəsinə qalxan əlil və veteranları icra məmurlarına, yəni “torpaq satanlara” qarşı olmağa da dəvət edir.
Biz Qarabağ torpaqlarımızı və digər ərazilərimizi satqınların xəyanəti nəticəsində itirdik. Atılan bu cür addımlar isə, torpaqlarımızın satılmasının yeni mərhələsidir. Problemin varlığı ilə bağlı İB-nin 590 nəfərdən çox üzvü etiraz səsini qaldırır və haqq-ədalətin bərpa olunmasını da tələb edirlər. Onu da qeyd edək ki, yaşanan problemlə bağlı cəmiyyətin sədri T.Məmmədovun “Bakı Milli Televiziyası”nda ölkə rəhbəri cənab İlham Əliyevə ünvanladığı müraciəti də var ki, onu da hər bir dinləyici izləyə bilər.
Bundan əlavə o, həm Türkiyə səfirliyindən, həm də yaşanan olayların varlığına cavabdehlik daşıyan qurum rəhbərlərindən, problemin varlığına münasibət bildirmələrini və onun ədalətli həllinə kömək məqsədilə, təsirli addımlar atmalarını da xahiş edirlər.

Mövzunu diqqətdə saxlayacağıq.

Mirzə

gundemxeber.az