Milli Təhlükəsizlik Nazirliyində (MTN) uzun müddət fəaliyyət göstərmiş “reket generalları” qrupunun ifşa edilməsi Azərbaycanın iqtisadi inkişafının qarşısında yaradılan subyektiv maneələrin nə qədər geniş miqyas aldığını göstərdi. Reket və quldurluq yolu ilə sahibkarların əlindən alınan və bu cinayətkar qrupdakı nankorların şəxsi rifahına xərclənən milyonları təsəvvür edirsinizmi? Xalqdan və dövlətdən oğurlanmış bu vəsaitlərin həcmi bəlkə də milyardlarla ölçülür. Bu milyonlar və milyardlar milli iqtisadiyyata sərmayə edilsəydi, ölkənin real sektorunun artımı hansı həddə çatardı?


Bu və ya digər suallarla bağlı bəzi mühüm məqamları "MTN işi"ni araşdıran hüquq-mühafizə orqanlarının, eləcə də iqtisadiyyatımızın inkişafına və təhlükəsizliyinə məsul dövlət qurumlarının diqqətinə çatdırmağı özümüzə peşə borcu sayırıq. Çünki burada söhbət ayrı-ayrı məmurların imkanlı şəxsləri şərləyib pulunu və əmlakını ələ keçirməkdən, iş adamlarına qarşı soyğunçu hərəkətlərindən yox, həm də özlərinin vəzifə səlahiyyətlərindən sui-istifadə edərək dövlətin iqtisadi inkişafına zərbə vurmasından gedir. Çünki Azərbaycan dövləti və ictimaiyyəti həmin milyonlarla vəsaitlərin iqtisadiyyatın daha da inkişaf etditriləcəyini, bu sərmayələrin tədricən ixracyönümlü və rəqabət qabiliyyətli məhsullara, xidmətlərə, iş yerlərinə çevirəcəyini, dövlətin xəzinəsinə böyük mənfəət, xalqa xeyir gətirəcəyini inamla gözləyirdi. Təəssüf ki, o sərmayələr də, o inkişaf da, o xeyir-bərəkət də itirilib. Daha doğrusu, milli təhlükəsizliyimizi qorumalı olan təhlükəli adamların güdazına gedib. Ölkə rəhbərliyinin inanıb görəv verdiyi generallar iqtidaiyyata və iş adamlarına qarşı soyğunçu hərəkətləri ilə milyonlarla vəsaiti real sektordan çıxararaq ölkənin 20 il ərzində nail olduğu iqtisadi inkişafı təhlükə qarşısında qoyub…

İş adamlarının ərizələrə sığmayan şikayətləri



Prezident İlham Əliyevin MTN-ni Eldar Mahmudovdan və onun əlaltılarından azad etməsi cəmiyyətdə çox güclü əks-səda doğurması da təsadüfi deyil. "MTN şefi"nin vəzifədən azad edilməsi ilə bu vaxta qədər səsi-sorağı rəsmi məqamlara gedib çıxa bilməyən reketçilik faktları, talan-qarətə məruz qalmış iş adamlarının, sahibkarların “mafiya filmləri”ndə gördüyümüz qorxulu həyat hekayətləri üzə çıxdı. Təkcə bir fakta diqqət yetirək: MTN əməkdaşlarının törətdiyi cinayət əməlləri nəticəsində hüquqları pozulmuş 57 nəfər zərərçəkmiş şəxs qismində tanınıb. Onlara dəymiş ziyanın ümumi məbləğinin on milyonlarla manat olduğu müəyyən edilib. Bunu respublikanın ən mühüm hüquq-mühafizə orqanı - Baş Prokurorluq ictimaiyyətə rəsmən açıqlayıb.

Həmin yığcam açıqlama ölkəni bütün təhlükələrdən qotumalı olan bir nazirliyin generallarının və əməkdaşlarının vətəndaşları, illah da cəmiyətin fəal, işgüzar və çalışqan, bəsirətli və xeyirxah kəsimini təşkil edən iş adamlarını, sahibkarları hansı mərhumiyyətlərə, maddi və mənəvi terrora məruz qoyduqlarını qısa şəkildə anons edir. Törədilmiş cinayətlərin kökü və təfərrüatları, yəqin ki, daha müdhiş və heyrətamizdir. Vəzifəsi “transmilli iqtisadi cinayətkarlığa qarşı mübarizə” aparmaq olan general Subahir Qurbanovun cinayət əməllərinin bu yaxınlarda mediaya sızdırılan bəzi təfərrüatları onun özünün və rəhbəri Eldar Mahmudovun iş adamlarına qarşı necə qəddar və acımasız münasibət göstərdiyini sərgiləyir. Məsələn, iş adamı Zabil Salmanovun pulunu və əmlakını ələ keçirməyə nail olmaqla kifayətlənməyib, onu başqa şəxslərə, iş adamlarına şər atmağa da məcbur ediblər.

Şirkətə qarşı qarət və soyğunçuluq aktları



Eyni üsulu başqa bir iş adamına – “Azimport” MMC-nin rəhbəri Azər Əsgərova qarşı da tətbiq etməyə çalışıblar. Onu da haqqında cinayət işi başlanacağı ilə hədələyib, nazirliyə gətirərək, gecədən-səhərə qədər orada saxlayıb dindiriblər, təzyiq yolu ilə vəzifəli şəxslərin əleyhinə ifadə almaq istəyiblər. Vəzifəli şəxslərin əleyhinə ifadə almaq, hətta yaxın qohumu, vaxtilə “Azimport” MMC-nin meneceri işləmiş, lakin Dövlət Bayrağı Meydanı idarəsinə direktor təyin olunması ilə əlaqədar bu vəzifəni tərk etmiş Rəşad Məmmədovun şirkətin qeyri-rəsmi sahibi olması haqqında ərizələr yazdırmağa çalışıblar.

Bu, azmış kimi MTN əməkdaşları "Azimport"un ofisində qarət və soyğunçuluq aktları həyata keçirməkdən belə, çəkinməyib. Onlar şirkətin ofisində qeyri-qanuni axtarışlar aparıb, seyfdən qiymətli əşyalar, üstəlik, 1 milyon 300 manat nağd pul, sonradan öz adlarına rəsmiləşdirmək məqsədilə şirkətə və işçilərə məxsus olan mülkiyyət sənədlərini götürüblər. Məqsədləri Azər Əsgərovun öz əməyi və səyi ilə qurduğu, respublikada bir çox mötəbər tikinti-abadlıq layihələrini uğurla icra edən, inşaat sektorunda innovativ sahibkarlıq subyektlərindən biri kimi tanınan “Azimport” MMC-nin əmlakını ələ keçirmək olub.


Bu cür tutarlı faktlar MTN-in cinayətə bələnmiş məmurları barəsində ən ağır cəza hökmünün çıxarılmasına kifayət edə biləcək qədər çoxdur. Üstəlik, Baş Prokurorluğun məlumatında da göstərildiyi kimi, təhlükəli cinayətkar dəstənin əməlləri haqqında hüquq-mühafizə orqanlarına ayrı-ayrı vətəndaşlardan yeni müraciətlər daxil olmaqdadır. Həmin müraciətlərin bəzilərindən media az da olsa, xəbər tutur. Məsələn, əvvəllər prokurorluq işçisi olmuş biznesmen İsmayıl Səlimov ona məxsus olan reklam şirkətinin MTN-dəki bandanın əli ilə çökdürülməsinin təfərrüatlarını ictimailəşdirib.

Bir nazirlik digər nazirlikdən hər ay rüşvət alırmış



Ən acınacaqlısı odur ki, öz cinayətkar fəaliyyətini “təhlükəsiz”lik şəraitində həyata keçirən “reket generalları” təkcə iqtisadiyyatın özəl sektoruna deyil, həm də dövlət sektoruna qənim kəsilibmiş. Ölkədə real iqtisadiyyatın ən gəlirli sahələrindən birinə cavabdehlik daşıyan Rabitə və Yüksək Texnologiyalar Nazirliyinin vəzifəli şəxslərindən ümumi himayədarlığın həyata keçirilməsi adı ilə son 3-4 il ərzində hər ay sabit şəkildə külli miqdarda rüşvət alınırmış. Belə ağır xəraca otuzdurulmuş yüksək çinli rabitəçilər isə həmin fantastik məbləğləri elə öz kabinetlərindəcə, dövlətin cibindən oğurlayırmışlar.

Beləliklə, iqtisadi cinayətkarlığın ən ağır forması olan korrupsiya girdabına düşdüklərinə baxmayaraq, “himayədarlar”ının sayəsində “təhlükəsiz” və komfortlu həyat tərzi keçirir, hətta qeyri-qanuni sahibkarlıq fəaliyyəti ilə məşğul olur, çoxsaylı daşınar və daşınmaz əmlaka sahiblənirmişlər. İndi təcridxana hücrələrinin soyuq divarlarına söykənən sabiq rabitəçilər - Beytulla Hüseynov, Vidadi Zeynalov, Məhəmməd Məmmədov və başqaları MTN kabinetlərindəki zəhmli arxadaşlarının dəstəyi ilə, bir növ sadə vətəndaşlarla dövlət arasında rabitəni pozaraq, insanların haqqa-ədalətə inamını sarsıdıblar.

Prezident İlham Əliyevin “vətənə xəyanət” adlandırdığı bu görünməmiş cinayətlərin Azərbaycan iqtisadiyyatına vurduğu zərərin miqyasını indilikdə dəqiq hesablamaq, müəyyənləşdirmək çətindir. Amma iqtisadiyyatımız üçün göz qabağında olan, aşkar görünən yaralar hər kəsə bəllidir: azad sahibkarlığın və əlverişli biznes mühitinin “təhlükəsiz”liyinin uzun müddət təhdid altında olub, iqtisadiyyat qanundankənar əməllərdən sarsılılıb. Ən pisi qorxulusu isə odur ki, bu mənəvi-psixoloji zərbənin təsiri hələ uzun müddət qalacaq. Ta əsl həqiqətlər açılıb, iqtisadiyyatın yolu belə neqativlərdən tam təmizlənənədək. Hüquq-mühafizə orqanları iş adamlarından müsadirə olunmuş pulların geri alınaraq sahiblərilərinə qaytarılmasına çalışmaqla bu mənəvi-psixoloji zərbənin təsirlərini xeyli dərəcədə azalda bilər. (koordinat.az)