Hörmətli Nazir! Sizin 30 oktyabr 2015-ci il tarixdə 9 saylı Bakı Peşə Liseyinə direktor təyin etdiyiniz Hüseynov Mətləb Eldar oğlu, qısa müddət ərzində elə bir “qəhrəmanlıq”lar göstərib ki, gəl görəsən. Yəni, onun “qəhrəmanlıq”larını ardıcıllıqla sadalamağa çalışacağıq.
1) O, liseyin balansında və dövlət nömrə nişanı 10 PS 295 olan sürüş təlim avtomobilinin GPS qurğusunu özbaşına söndürərək, öz şəxsi işləri üçün qeyri-qanuni istismar edir. Baxmayaraq ki, həmin avtomobilin belə bir yolla istismarı nazirlik tərəfindən qəti surətdə qadağan olunub.
2) 9 N-li Bakı Peşə Liseyi şagirdlərinin sürüş təlim dərslərini yerinə yetirmək üçün, üç yük avtomobili və bir ədəd VAZ-07 markalı avtomobilləri olsa da, onlardan yalnız biri yük avtomobili saz vəziyyətdədir.
3) VAZ-05 markalı avtomobil istismara tam yarasız olduğu halda, Mətləb müəllim həmin avtomobilə sürücü işə qəbul edib. Sürücü də ümumiyyətlə işə gəlmir və onun maaşı mənimsənilir.
4) Liseydə 3 gözətçi ştatı var. Onlardan yalnız ikisi işləyir, üçüncünün maaşı mənimsənilir.
5) Fəhlə ştatına işə götürülən şəxs də işə gəlmir və onun da maaşını mənimsəyirlər.
6) Mətləb Hüseynov vəzifəsinin icraasına başlayan andan, özbaşına qeyri-qanuni komissiya təşkil edib ki, onların da nə məktəbə, nə də ki, nazirliyə heç bir aidiyyəti yoxdur. Onların yoxlamalarının nəticəsi olaraq qərar qəbul edilir və bəzi müəllimlər, istehsalat təlimi ustaları əksər hallarda işindən də uzaqlaşdırılır. 15-20 il iş təcrübəsi olanları tutduqları vəzifədən azad edib, başqa bir işə keçirir. Hansı ki, həmin şəxslərin təyin olunduqları sahədən ümumiyyətlə xəbərləri olmur. Yəni, onlar jurnalda yazdıqları mövzuların məzmunlarını belə anlamırlar. O halda da, şagirdlər nəsə anlaya bilmirlər. Belə müəllimlərdən İsmayılova Şəhla Niftalı qızını, Samirə Quliyevanı, Gülnar İbrahimovanı və.s misal çəKmək olar.
Direktor özü ilə Sənaye-Pedoqoji Kollecindən gətirdiyi üç nəfəri, istehsalat təlimi ustası təyin etməklə bərabər, onlara dərs saatı da verib. Lazımi iş təcrübəsi və ali təhsili olmayana dərs saatı vermək qadağan olduğu halda, o bunu etmir. Odur ki, istehsalat təlimi ustaları qrupun fəaliyyətini, davamiyyətini lazımınca təşkil edə bilmirlər. Kadrlar şöbəsinin inspektoru olan Naridə Namazovanı işindən azad edib və onu ixtisasına uyğun olmayan, yəni avtomobillərin elektrik avadanlıqlarının təmiri üzrə çilingər qrupuna istehsalat təlimi ustası da təyin edib. Mətləb müəllimdən bir soruşan yoxdur ki, ödənişli qrupların ödədikləri pullar niyə banka keçirilmir? Təqaüddə və ixtisasca kimya-biologiya müəlliməsi olan Sarıtel Hacıyeva, əməliyyatçı mühasib qrupuna istehsalat təlimi ustası təyin edilib.
O, bazar iqtisadiyyatı ixtisasını bilən və xarici ölkələrdə lazımi təcrübələr keçən Ramella müəlliməni, daşıdığı vəzifəsindən uzaqlaşdırdıqdan sonra, həmin fənni öz adamları arasında bölür. Təsərrüfat işləri üzrə direktor müavini təyin etdiyi Babaxan müəllimə, playner və mühərrik üzrə mexanik qrupda ixtisas fənni üzrə 207 saat dərs yükü verib. Axı, Babaxan müəllim adicə playner sözünün mənasını bilmir. Liseydə ən böyük qanunsuzluq əməllərindən biri də ondan ibarətdir ki, hər bir tədris müəssisəsində təlim-tərbiyyə sıra cərgəsindən başladığı halda, Mətləb müəllim əksinə sıranı ləğv edib.
Direktorun gətirdiyi yeniliklərdən biri də, forma adı altında hər bir şagirddən 40-50 manat pul yığmasıdır. O, düşünmür ki, peşə liseylərində oxuyan şagird ailələrinin maddi durumlar olduqca aşağı səviyyədə olur. Hələ, bunlar azmış kimi, o, tərbiyə işləri üzrə direktor müavininin səlahiyyətlərini də əlindən alaraq, onu psixoloqa verib. Baş usta təyin edib ki, onun da ixtisası avtomobilçi deyil.
Acınacaqlı hal həm də ondan ibarətdir ki, liseydə 11 dekabr 2015-ci il tarixdə xalqımızın ulu öndəri, mərhum prezidentimiz Heydər Əliyevin anım günü ilə bağlı baş ustanın xoşagəlməz çıxışı olur. Həmin çıxışa görə Mətləb müəllim əslində baş ustanı işdən çıxartmalı idi. Amma o, bunu etmədi və yalnız ondan izahat almaqla kifayətləndi.
Mətləb müəllimin ötən 3 ay ərzində qol qoyduğu qanunsuzluqlar, təkcə bunlarla yekunlaşmır. O, məhz ona görə çoxsaylı qanunsuzluqlara qol qoyur ki, onun peşə məktəbi sahəsindən ümumiyyətlə xəbəri yoxdur. Özü ilə gətirdiyi Xaliq Səfərovu dərs hissə müdiri təyin etsə də, o, eyni zamanda Sənaye-Pedoqoji Kollecində də dərs keçir.

Cəfər

gundemxeber.az