Rusiya prezidentinin iqtisadiyyat məsələləri üzrə müşaviri Sergey Qlazev Azərbaycan brendlərinin bu ölkədə daha geniş təmsil edilməsinə çağırıb.

“Moskva-Baku” portalına müsahibəsində Qlazev Azərbaycan mallarının Rusiyada yaxşı tanındığını vurğulayıb.

“Lakin meyvə və tərəvəzlər haqda danışsaq, o zaman bizim piştaxtalarımızda mənşəyi müəyyən edilməyən kənd təsərrüfatı məhsullarının geniş assortimentini görə bilərik. İndi rusiyalı istehlakçılar həmin pomidorlarda “Made in Azerbaijan” brendini görsə o saat biləcək ki, bu Azərbaycanın məhsuludur, nəticədə ona tələbat artacaq”-Sergey Qlazev bildirib.

Xəbər verildiyi kimi, prezident İlham Əliyev bu günlərdə Azərbaycandan qeyri-neft məhsullarının ixracının təşviq edilməsinə dair əhatəli sərəncam imzalayıb. Həmin sərəncamda ixracla məşğul olan iş adamlarına dəstək verilməsi, “Made in Azerbaijan” brendinin yaradılması və xaricdə tanıdılması kimi mühüm məsələlər yer alır.

Putinin müşavirinin sözlərinə görə, Azərbaycanın kənd təsərrüfatı məhsulları öz keyfiyyətinə görə tanındığı üçün onlara tələbat çoxdur. “Əgər xalq tələbatı mallarından danışsaq, bu sahədə Rusiya bazarında tanınmaq lazımdır. Ona görə də brendləşmə bu istiqamətdə atılmış düzgün addımdır”-Qlazev qeyd edib.

Putinin müşavirinin sözlərinə görə, neft konyunkturasının uzunmüddətli pisləşməsi şəraitində Azərbaycan Avrasiya iqtisadi inteqrasiya məkanına qayıtmağı, yəni Avrasiya İttifaqına üzvlüyü nəzərdən keçirməlidir. “Üstəlik qeyd edə bilərəm ki, Avrasiya İttifaqı çərçivəsində Azərbaycan mallarına dünya bazarlarından daha çox tələbat olacaq”-Qlazev bildirib.

Rusiya prezidentinin müşaviri hesab edir ki, Avrasiya İttifaqına üzvlüyün konkret üstünlüklərinə gəldikdə, Azərbaycanın qarşısında ixraca yönəldilən məhsulları tamamilə udmağa qadir olan geniş bazar açılacaq. “Digər tərəfdən, Avrasiya İttifaqına üzvlük Azərbaycanın investisiya cəlbediciliyini kəskin artıracaq. Axı bu halda Azərbaycan ərazisində bütün Avrasiya İttifaqı məkanının istehlakçılarını nəzərə alaraq məhsullar istehsal etmək, o cümlədən neft məhsullarının üzvi sintezindən məhsullar hazırlamaq mümkün olacaq”-SergeyQlazev deyib.

Putinin müşavirinin fikrincə, Avrasiya İttifaqına üzvlük Azərbaycan üçün əlavə tranzit imkanları da açacaq: “Azərbaycan üçün xüsusilə mühüm və həssas məsələ bu ölkədən olan və Rusiyada işləyən milyonlarla adam üçün transsərhəd keçidlərinin asanlaşmasıdır. Məlum olduğu kimi, Avrasiya İttifaqı çərçivəsində gömrük sərhədləri yoxdur”.

Rusiya prezidentinin müşaviri qeyd edib ki, Rusiyada işləyən və ticarətlə məşğul olan milyonlarla azərbaycanlı hazırda üzücü sərhəd və gömrük nəzarətindən keçməli olur. Avrasiya İttifaqında isə bu məsələlər həll edilib: “Bu, Azərbaycan üçün birbaşa və mühüm faydadır. Çünki Avrasiya İttifaqı bugünkü reallıqlarda əlavə cəlbedicilik qazanıb”.