Bu günlərdə məhbəs həyatı yaşayan jurnalistlər, hüquq müdafiəçiləri, gənc fəallar ölkə başçısı tərəfindən əfv olundu, məhkəmələr tərəfindən azadlığa buraxıldı.

Müsbət qiymətləndirilən bu addımlardan sonra başqa həbsdə olan başqa siyasətçilərin, jurnalistlərin də azadlığa buraxılacağına böyük ümid yaranıb. Xüsusilə də jurnalist Xədicə İsmayılın...

Bəs görəsən azadlığa çıxacaq növbəti jurnalist Xədicə İsmayıl ola bilərmi? Moderator.az-ın bununla bağlı sualına Beynəlxalq Avrasiya Mətbuat Fondunun rəhbəri, Mətbuat Şurasının sədr müavini Umud Rəhimoğlu aydınlıq gətirib.

Umud Rəhimoğlu ilk öncə əfv sərəncamı ilə bağlı cənab prezidentin atdığı addımları yüksək dəyərləndirdiyini bildirib. Daha sonra qeyd edib ki, jurnalist, qələm əhli, vətəndaş cəmiyyəti təmsilçisi olaraq həmişə vətəndaş cəmiyyətini təmsil edən, mediada çalışan insanların həbsinin əleyhinə olub: “Müstəqil Azərbaycanın sivil dövlət kimi vətəndaş cəmiyyəti quruculuğunda özünün hədəf götürdüyü istiqamət əslinə qalanda onu diktə edir ki, biz söz azadlığında, bu cür məsələlərdə yazı və fikir plüarizminə daha çox diqqət ayıraq. Digər tərəfdən, əlbəttə ki, bir vətəndaş cəmiyyəti təmsilçisi olaraq mənim üçün çox xoş oldu. Mən bu siyahıda xeyli vətəndaş cəmiyyəti təmsilçilərini, jurnalistləri gördüm və çox məmnun oldum. Düşünürəm ki, bu istiqamətdə cənab prezidentimiz tərəfindən növbəti addımlar da atılacaq. Əslinə qalanda bu addımlar ölkəmizin müsbət imicinin formalaşmasına, Azərbaycanın olduğu kimi görünməsində əsas amillərdən biridir. Bəzən görürük ki, hansısa kiçik bir neqativ hadisə, həbsdə olan jurnalistin haqlı və ya nahaq olmasından, həbsinin motivlərinin nə olmasından asılı olmayaq Azərbaycanda baş verən müsbət hadisələrə kölgə salır. Bəzi hallarda bu məsələlərdən ölkənin əleyhinə istifadə edirlər. Hesab edirəm ki, belə addımların atılması Azərbaycanda vətəndaş barışığının əsasını qoyur, insanlarda böyük rəğbət hissi yaradır. Həbsdə olan hər kəsin qapısınını açılmasını arzu edirəm, xüsusən də həmkarlarımızın. Hesab edirəm ki, indiki dövrdə, bu qarışıq zamanda Azərbaycanımızda daha çox həmrəylik olmalıdır. Görüşdüyüm adamlar ölkədə baş verən bu hadisələri çöx müsbət dəyərləndirirlər. Özüm də bu işə ilk müsbət yanaşan və bu işi təqdir edənlərdən biriyəm. Azadlığa çıxanların hər birini təbrik edirəm. Çox az sayda vətəndaş cəmiyyəti təmsilçiləri var ki, onların da qapılarının açılmasını arzu edirəm”.

Rumiyyə