Arif Qasımov Siyəzəndən sonra Nizamini viran qoyub

Paytaxtın böyük regionlarından birində yaşıllıqların qətliamı kütləvi və intensivləşib, icra başçısının təbiətə qənim kəsilən komandasının siyahısı ifşa edilib; rayonun problemləri və icra hakiminin biznes imperiyası “Gündəm-xəbər”də

Paytaxtın Nizami rayonunun taleyində nə varsa, hər gələn məmurun prioritet vəzifəsi yaşıllıqları məhv etmək olur. İlk baxışdan belə güman etmək olar ki, artıq yeni gələn icra başçısı üçün qırmağa nə ağaclar, satmağa nə səkilər, yollar qalacaq.

Nizamidə ağac qalmadı..

Lakin Siyəzəndən Nizami rayonuna təyinatı dəyişən Arif Qasımov üçün belə bir problem yoxdur. Nizaminin yeni icra başçısı satmağa qarış-qarış ərazilər də kəşf edə bilir, kəsməyə yaşıllıqlar da. Və buna dair faktlar ara-sıra mətbuatda tirajlanıb.

Amma yazılanların heç bir əks-sədası olmayıb. Nə Nizami rayon İcra Hakimiyyəti “yaşıl soyqırım”a “dur” deyib, nə Ekologiya və Təbi Sərvətlər Nazirliyi addım atıb. Beləliklə, günbəgün keçəlləşən Bakının Nizami rayonunda kölgəliklər məhv edilir, təbiətə qarşı vandalizm davam etdirilir, insanların istirahəti, rahatlığı, hava alması üçün olan ağaclar qurban verilir. Təbii ki, sual meydana çıxır – Arif Qasımov yaşıllıqlardan nə istəyir?

Bununla bağlı “Gündəm-xəbər”ə apardığı araşdırma zamanı bir sıra faktlar ortaya çıxıb. Arif Qasımovun "ağac soyqırımı” ilə məşğul olan mütəşəkkil dəstəsində yaxın dostu olduğu deyilən iş adamı var. Məlumatda bildirilir ki, həmin şəxs bu ekoloji cinayəti icra başçısına güvənərək həyata keçirib. Çünki A.Qasımov Nizami rayonunda tikinti işlərini ona həvalə edib.

Mətbuat xəbər verir ki, bir müddət əvvəl Qara Qarayev prospektində - "8-ci kilometr bazarı”nın yaxınlığında ağacların qırılması faktı qeydə alınıb. Bundan başqa, hazırda metronun "Neftçilər” stansiyasından üzü "Xalqlar dostluğu” istiqamətinə gedəndə yolun sağında - 9 mərtəbəli binaların qarşısındakı yaşıllıqlar da məhv edilib və yerində təyinatı hələ bəlli olmayan obyektlər tikilir.

Şöbə müdirinin əsas “vəzifəsi”

Əslində isə ərazidə “yaşıl soyqırımı” aparan Nizami rayon İcra Hakimiyyətidir və “yaşıl soyqırıma” icra başçısının ən yaxın adamlarından biri, Nizami rayon İcra Hakimiyyətinin Təsərrüfat Şöbəsinin müdiri Tariyel Tahirov birbaşa rəhbərlik edir.

Hətta iddalara görə Nizami rayonunda ağacları gecələr Tariyel Tahirovun işçiləri kəsirlər və bundan da icra başçısı Arif Qasımovun birbaşa xəbəri var. Çünki vaxtı ilə Nizami rayonunda Bələdiyyə sədri vəziəsində işləyən Arif Qasımov bu cür “əməliyyatları” çox həyata keçirib.

İcra başçısının komandasına çox yaxın olan bir sahibkarın verdiyi dəqiq bilgiyə görə ərazidəki ağac soyqırımını Nizami rayon icra hakimiyyətinin təsərrüfat şöbəsinin müdiri Tariyel Tahirovun işçiləri həyata keçirirlər.

Onlar satış məqsədi ilə seçilən və artıq müştəisi olan ərazidə gecələr mütəmadı olaraq bir neçə ağac qırıb yoxa çıxartmaqla ərazini bir müddətdən sonra tamamilə “təmizləirlər”. Bundan sonra isə ərazinin yeni sahibi ortaya çıxır və ərazini çərləyərək işiə başlayır.

Siyəzən rayonunda icra hakimiyyətinin həyata keçirtdiyi bütün tikinti, təmir işlərinə və büdcə təşkilatlarına nəzarəti də məhz Tariyel Tahirov həyata keçirib. İndi isə o köhnə işini Nizami rayonunda davam etdirir.

Belə ki, Arif Qasımov və yaxın adamları rayoun bütün ərazilərinə tökülərək boş yerlərin hamısını qeydiyyata alaraq zəbt edirlər.

Çünki uzun müddət indiki Nizami rayonuna icra başçısı gələcəyini xəyal edən Arif Qasımov bu gün istəyinə çatmaqla bərabər, yerdə qalan boş əraziləridə məhz “mənim olmalıdır” anlayışı ilə işləyir.

Qardaşı Vüqar Qasımovun əməlləri

Onun icra etdiyi tikinti layihələrinə, ümumiyyətlə biznesinin idarə olunmasına qardaşı Vüqar Qasımov nəzarət edir. Bundan başqa, Arif Qasımovun bəzi yaxın qohumları Sabunçu rayonunun Ramana qəsəbəsində qanunsuz torpaq satışı ilə məşğul olurlar.

Sözügedən qəsəbənin yarısı məhz icra başçısının qohumları tərəfindən satılıb. Həmin şəxslərin arxasında isə birbaşa icra hakiminin özü dayanıb. Apardığımız araşdırmalar nəticəsində aydın oldu ki, Arif Qasımovun qardaşı Vidadi Qasımov 2007-ci ilin iyun ayında silahlı insidentdə iştirak edib. Belə ki, iyunun 17-də saat 01.00 radələrində Atatürk prospektində yerləşən “Pürrəngi” çayxanasında atışma olub.

Nərimanov rayon prokurorluğunun məlumatına görə, Münaqişə zəminində Arif Qasımovun qardaşı Vidadi Adil oğlu Qasımov odlu silahdan açılan atəşlə yaralanıb. Güllə yarası alan Vidadi Qasımov Kliniki Tibbi Mərkəzin reanimasiya şöbəsinə yerləşdirilib. Onun həyatını xilas etmək mümkün olmayıb.

Böyük bir rayonun sakinləri qaz, işıq, su, kanalizasiya problemləri girdabında boğulur. Bundan başqa, təməli keçmiş icra başçısı Mehbalı Əliyevin vaxtında qoyulan problemlər də aradan qaldırılmayıb. Əksinə, rayonda qanunsuz tikinti-söküntü işləri bu gün də davam edir ki, bu da sakinlər arasında narazılığı daha da artırır.

Başçının biznesinin - Siyahısı

Bildirək ki, digər yüksək çinli məmurlarımız kimi, A.Qasımov da geniş biznes şəbəkəsi ilə tanınıb. 2011-ci ildə Siyəzənin icra başçısı təyin olunan Arif Qasımov özü üçün rayonda bir neçə nəhəng ferma inşa etdirib. Bu fermaları saхlamaq üçün təbii ki, əkin və otlaq sahələrinə ehtiyac var. Arif Qasımov bu ehtiyacı ödəmək üçün fermerlərə uzun müddətə icarəyə verilmiş bələdiyyə torpaqlarını zəbt edib. Həmin ərazilər indi icra başçısının fermalarına хidmət edir.

Məlumatlı mənbə bildirir ki, Arif Qasımovun Siyəzəndə bir neçə üzlük daş sexləri də fəaliyyət göstərir. Həmin seхlər rayonda görülən bütün təmir-tikinti işlərini tikinti materialları ilə təmin edirdi . Mənbə bildirir ki, hazırda bu proses Nizami rayonunda davam etdirilir.

Amma Arif Qasımovun biznesi Siyazənlə məhdudlaşmır. Əldə etdiyimiz faktlara əsasən, onun əvvəllər bələdiyyə sədri işlədiyi, indi isə icra başçısı kimi təyinat aldığı Nizami rayonunda, icra başçısının nümayəndəsi olduğu Binəqədi rayonunun Biləcəri qəsəbəsində bir neçə ticarət obyekti fəaliyyət göstərir.

Həmçinin icra başçısının Bakının müхtəlif yerlərinə tikinti işləri apardığı bildirilir. Paytхatda özünün və yaхınlarının adına onlarla mənzilinin, dəyəri milyonlarla manatla ölçülən bir neçə villasının olduğu da deyilir.

Sultan Süleyman taxtı

Onu da bildirək ki, Nizami rayon rəhbəri az əvvəl şah taxtı olan kresolusu ilə medianın gündəminə gəlmişdi. Artıq məlum foto rəsmi saytdan yığışdırılıb. İH başçısının kabinetində oturduğu kreslonun böyüklüyü və əzəməti istər-istəməz gözə çarpırdı. İxtisasca hüquqşünas olan və vəzifə mərtəbələrini pillə-pillə çıxan Arif Qasımovun belə əzəmətli kresloya həvəsi hər halda təsadüf ola bilməz.

Ötən il Rusiya saytlarının dövlət başçılarının iş otaqları haqda yaydığı xəbərdə Azərbaycan prezidenti İlham Əliyevin kabineti də daxil bir çox ölkə rəhbərlərinin kabinetlərinin fotosuna yer verilmişdi. Lakin heç bir prezidentin, baş nazirin kreslosu Arif Qasımovun kreslosundan daha əzəmətli deyildi.

Bu fotonu yayılmasından sonra rayon icra başçısı rəsmi saytdan həmin şəkli yığışdırıb və yenisi əlavə olunub. İcra başçısı vəzifə alverində adının çəkilməsi ilə də gündəmə gəlib. Arif Qasımov "Gülərqeyt” əməliyyatına oxşar hadisədə iştirakçı olub. Siyəzənə rəhbərlik etdiyi dövrdə ona Rusiyadan gələn iş adamı Ramazan Səlimovun müavini olması təklif edilib. Qasımov kimdir?

Prezident İlham Əliyevin səlahiyyətlərinə vaxtından əvvəl xitam verdiyi Bakı Ağır Cinayətlər Məhkəməsinin hakimi Həsən Əliyev iş adamı Ramazan Səlimovdan 600 min manat alaraq onu icra başçısı təyin etdirəcəyini vəd edir. İş adamı istintaq ifadəsində deyib ki, bu işdə Arif Qasımov da iştirak edib. Həsən Əliyev Ramazan Səlimovu öz "Range Rover”i ilə Siyəzənə apararaq bu rayonun icra başçısı Arif Qasımovla görüşdürüb. Həmin görüşdə Ramazan Səlimovun RİH başçısının birinci müavini postuna təyinatı məsələsi müzakirə olunub. Arif Qasımov bildirib ki, məsələni öyrənib bir neçə gündən sonra cavab deyəcək. İki gündən sonra cavab gəlib ki, birinci müavin yerli sakin olmalıdır. Ona görə də Ramazan Səlimova rayonda peşə məktəbinin direktoru vəzifəsini təklif edib, lakin o, razılaşmayıb.

Xatırladaq ki, o, Azərbaycan Respublikası Prezidentinin 22 sentyabr 2015-ci il tarixli sərəncamı ilə Bakı şəhəri Nizami Rayon İcra Hakimiyyətinin başçısı təyin edilmişdir. Əmək fəaliyyətinə başladıqdan sonra müxtəlif vəzifələrdə, o cümlədən Naxçıvan Muxtar Respublikası dövlət əmlakı nazirinin köməkçisi işləyib.

Sonra Binəqədi Rayon İcra Hakimiyyəti başçısının Biləcəri qəsəbəsi üzrə nümayəndəsi, Nizami Rayon İcra Hakimiyyəti başçısının Keşlə qəsəbəsi üzrə nümayəndəsi, 2011-ci ilin iyul ayınadək Bakı şəhəri Nizami Bələdiyyəsinin sədri, 2011-2015-ci illərdə isə Siyəzən Rayon İcra Hakimiyyətinin başçısı vəzifələrində çalışıb.

Rafiq Qara