16:35

Bu gün saat 8 radələrində Bakı şəhəri Suraxanı rayonu Heydər Əliyev prospektində müntəzəm sərnişindaşıma fəaliyyəti göstərən "Ayşən LTD" MMC-nin müvəqqəti istismarında olan 171 saylı marşrut xətt üzrə xidmət göstərən 10 TF 993 dövlət qeydiyyat nişanlı "Daewoo" markalı avtobus və "Shacman" markalı yük avtonəqliyyat vasitəsinin iştirakı ilə ağır yol nəqliyyat hadisəsi baş verib.

Bakı Nəqliyyat Agentliyinin İctimaiyyətlə Əlaqələr şöbəsinin müdiri Nuridə Allahyarovanın APA-ya verdiyi məlumata görə, baş vermiş yol nəqliyyat hadisəsi nəticəsində 21 nəfər müxtəlif dərəcəli bədən xəsarətləri alıb.

Hadisə baş verəndən dərhal sonra Bakı Nəqliyyat Agentliyinin məsul şəxsləri hadisə yerinə gəliblər. Hüquq mühafizə orqanı əməkdaşları ilə birgə hadisə yerinə keçirilən ilk baxış zamanı "Shacman" markalı yük avtomobilinin dövlət nömrə nişanının nəqliyyat vasitəsinin üzərindən çıxarılaraq götürüldüyü müəyyən edilib. Hadisə şahidlərinin ilkin dindirilməsi zamanı məlum olub ki, qəza "Shacman" markalı yük avtomobilinin sürət həddini aşması səbəbindən baş verib. Yüksək sürətlə hərəkətdə olan yük avtomobili arxadan 171 saylı sərnişin avtobusuna çırpılıb. Nəticədə avtobus aşıb. Həmin vaxt yolda hərəkətdə olan "VAZ-2107" markalı minik avtomobili də aşan avtobusa çırpılıb.

Xəsarət alanların səhhəti və müalicəsi ilə yerində maraqlanmaq üçün Bakı Nəqliyyat Agentliyinin rəhbərliyi, eləcə də daşıyıcı şirkətin nümayəndələri müalicə müəssisəsində olublar: "Xüsusi olaraq vurğulamaq istərdik ki, Bakı Nəqliyyat Agentliyi xəsarət alanların müalicəsini diqqətdə saxlayır. Hazırda baş vermiş ağır yol nəqliyyat hadisəsi ilə bağlı hüquq mühafizə orqanları araşdırma aparır. Hadisənin dəqiq başvermə səbəbi də bu araşdırmalardan sonra məlum olacaq".

12:56

Xəsarət alanların yerləşdirildiyi Sabunçu rayon 3 saylı klinik xəstəxanadan Trend-ə verilən məlumata görə, xəsarət alanlardan hazırda 7 nəfəri xəstəxanadadır, digərlərinin xəsarəti ağır olmadığına görə tibbi yardın göstərilərək evə buraxılıb.

Qeyd olunub ki, hazırda 7 nəfərin 5-i reanimasiyada həkim nəzarəti altındadır, ancaq xəsarət alanlar üçün həyati təhlükə yoxdur. Xəsarətlər əsasən baş-beyin əzilməsi və sınıqlardır.

12:27

Bu gün Bakının Suraxanı rayonu ərazisində, Heydər Əliyev prospektində ağır yol qəzası baş verib. Lent.az-ın məlumatına görə, prospektin "aeroport yolu" kimi adlanan hissəsində metronun "Koroğlu" stansiyası ilə Bilgəh qəsəbəsi arasında sərnişindaşıma ilə məşğul olan 171 saylı xəttin "Daewoo" markalı avtobusu ilə "Shacman" markalı yük maşını toqquşub. Hadisə nəticəsində avtobus aşıb, yük maşını isə yoldan çıxıb. Daha sonra isə "VAZ-2107" markalı maşın aşan avtobusa çırpılıb.

Sabunçudakı 3 saylı şəhər klinik xəstəxanasından Lent.az-a bildirilib ki, qəzadan sonra 21 nəfər yaralı tibb müəssisəsinə daxil olub. Onlar arasında ağır xəsarət alanlar da var.

Yol Polisindən isə bildirilib ki, qəzadan sonra ərazidə tıxac yaranıb və sıxlıq tədricən aradan qaldırılır.