Məhbus jurnalistin anası olkə rəhbərliyinə müraciət etdi
Həbsdə olan jurnalist Fuad Hüseynovun anası Hüseynova Süsanə Yusif qızı ölkə rəhbərliyinə müraciət edib. Müraciətdə F.Hüseynovun haqsız həbs olunması deyilir və onun azad olunması istənilir. F.Hüseynovun anasının müraciətini olduğu kimi diqqətinizə çatdırırıq: “Oğlum Fuad Hüseynov Jurnalist fəaliyyəti ilə məşğul olub, neqativ halları ictimailəşdirdiyi üçün 14 oktyabr 2010-cu il tarixdən etibarən həbs olunub. Hamı bilir ki, Fuad heç bir cinayət törətməyib, qondarma cinayətlə şərlənərək həbsə atılıb. Bu barədə həmin qondarma cinayət işi üzrə zərərçəkən hesab olunan Cəfərov Akif Cəmşid oğlu, qondarma şahidlər Mürsəlov Vidadi Mehdi oğlu, Abdullayev Fərman Əlisa oğlu, Mehdiyev Aqşin Şahin oğlu məhkəmələrdə etiraf ifadələri veriblər, konkret sübutlar təqdim ediblər, mətbuatda müntəzəm çıxışlar ediblər.
Həmçinin qondarma şahidlər Əliyev Elçin Çingiz oğlunun, Salahov Ramil Baba oğlunun və digərlərinin etiraf video-çıxışları “Youtube.com” saytında yerləşdirilib yayımlanır. Fuadı şərləyib girov götürməyə nail olan “Kurtlar Vadisi” adlı Ucar rayon hüquq mühafizə orqanlarının rəhbərlərinin yaratdıqları cinayətkar dəstənin zərərçəkən CəfərovAkif Cəmşid oğluna zəng edib Hədə-qorxu gəlmələri, onu Fuadın əleyhinə yalan ifadə verməyə məcbur etmələrini sübut edən telefon danışıqları yazılmış disklər var ki, məhkəmələrə təqdim edilib. Hətta telefon danışığının bir neçəsinin stenoqrammı da mətbuatda dərc edilib.
Məhkəmələrdə Fuadın təqsirsiz olmasını 27 nəfər şahid təsdiq etdi. Məhkəmənin öz təşəbbüsü ilə Bir neçə sənədlər sorğu edilib alındı. Video-audio çıxışlar olan disklər təqdim edildi. Ancaq nəticə bu oldu ki, “Kurtlar Vadisi “ adlı cinayətkar dəstənin sifarişi dövlət qanunlarından ali tutuldu. Fuadın atası ağır yataq xəstəsidir. Oğlu Fuadın həbsinə, bu haqsızlıqlara dözməyən ata iflic olub. Gözləri oğlu Fuadın yollarında qalıb. Fuadın əfv edilməsi üçün hüquq müdafiəçiləri, bir çox təşkilatlar Azərbaycan Prezidenti cənab İlham Əliyevə çoxsaylı müraciətlər ediblər.
Mən ağbirçək ana kimi inanıram ki, Prezident cənab İlham Əliyev növbəti əfv fərmanı ilə oğlum Fuadı da azadlığa, doğmalarına qovuşduracaq. Özüm də Prezident cənab İlham Əliyevə ərizə ilə müraciət etmişəm . Mən mətbuat vasitəsi ilə də Azərbaycan Prezidenti cənab İlham Əliyevə müraciət edib bir daha xahiş edirəm ki, növbəti əfv fərmanı ilə oğlum Fuadı azadlığa, doğmalarına qovuşdurasınız. Mən inanıram ki, Prezident cənab İlham Əliyev bu müraciətləri nəzərə alacaq.