Xəbər verildiyi kimi ötən gündən etibarən bir qrup şikayətçi Baş Prokurorluq qarşısında aclıq aksiyasına başlayıb. 15 şikayətçi gecəni Baş Prokurorluq qarşısında keçirib.

Şikayətçilərdən Aliyə Təmrəzovanın Cebhe.info-ya verdiyi məlumata görə, baş prokuror Zakir Qaralov şikayətçiləri qəbuluna çağırıb. Şikayətçilər Zakir Qaralovun qəbuluna getməyərək problemlərinin həlli ilə ilə bağlı konkret qərarın verilməsi tələbini irəli sürüblər:



“Polis əməkdaşları bizə müdaxilə etmədilər. Sadəcə Zakir Qaralovun bizi qəbul etmək istədiyini bildirdilər. Biz isə konkret qərar istəyirik. Aclığı davam etdirəcəyəm. Digər şikayətçilər də mənə dəstək çıxaraq, baş prokurorun qəbuluna getmək istəmədilər. Belə olan təqdirdə gördük ki, Zakir Qaralov özü yanımıza gəldi. Dedi ki, gəlin sizi qəbul edim. Bildirdik ki, sizin qəbulunuzda olmuşuq, amm nəticə olmayıb. Zakir Qaralov israrla bizi yenidən qəbul edəcəyini dedi. Bir qədər gözlədik. Və qəbuluna getdik”. Aliyə Təmrəzovanın sözlərinə görə, Zakir Qaralov 15 nəfər şikayətçini tək-tək qəbul edərək, onları dinləyib. Müxtəliş problemlər üzrə şikayətləri cavabdeh şəxslərə tapşıraraq, məsələlərin tez bir zamanda həll olunması göstərişini verib. Eyni zamanda şikayətçilərdən məsələlərinə baxılması üçün sentyabrın 19-na qədər vaxt müəyyənləşdirilib: “Hamımıza tək-tək söz verdi ki, ayın 19-na qədər problemlər həll olunacaq. İstədi ki, aclığı dayandırın. Biz bu gündən aclığı dayandırırıq. Zakir Qaralova bildirdik ki, əgər ayın 19-dan sonra problem həll olunmasa, biz bir mənzil tutacağıq və kütləvi surətdə qapalı şəraitdə ölüm aclığına başlayacağıq”.



Xatırladaq ki, şikayətçilər ailələrinə qarşı törədilmiş cinayətlərin ciddi araşdırılmaması, problemlərinin həll edilməməsi və məhkəmələrin işə düzgün baxmamasından narazıdırlar.



Qeyd edək ki, şikayətçilər fevralın 3-də Baş Prokurorluğun qarşısında əyinlərinə kəfən geyinərək etiraz ediblər. Daha sonra Gürcüstan və Türkiyədəki nümayəndəliklərimiz qarşısında aksiyalar keçirilib.



Alçina Amilqızı