“Azyaşlı uşaqlar ağlayırdılar, valideynləri ilə polis şöbəsinə getmək istəmirdilər”

“Biz də həmin gün baş verənlərdən qorxu keçirdik”

“Dindaşlarımla birlikdə alçaldıcı və təhqiredici rəftara məruz qalmışıq”

Qax rayonunda keçirilən əməliyyat zamanı həbs olunan Zaqatala sakini, 1994-cü il təvəllüdlü Könül Güliyeva inzibati qaydada mühakimə olunub. Zaqatala rayon polis şöbəsinin İTB-nin sahə rəisi, polis mayoru Şahlar Məmmədovun tərtib etdiyi 21 may 2016-cı il tarixli protokolundan görünür ki, Könül Güliyeva həmin ilin martın 23-də Qax şəhəri H.Z.Tağıyev küçəsi, ev 6-da “Yehovanın şahidləri” dini icmasının qeydiyyatdan keçdiyi hüquqi ünvandan kənarda fəaliyyət göstərməklə, qаnunvericiliklə müəyyən edilmiş qаydаlаrı pozub.

Könül Güliyeva İnzibati Xətalar Məcəlləsinin 515.0.4-cü maddəsi ilə ittiham olunub və toplanmış inzibati xəta haqqında material baxılması üçün əvvəlcə Zaqatala rayon Məhkəməsinə göndərilib.

Lakin Könül Güliyeva Qax rayonu ərazisində şübhəli şəxs qismində saxlanıldığı üçün onun barəsində olan iş materialları həmin rayon məhkəməsinə göndərilib.

Qax rayon Məhkəməsinin qıərarı ilə Könül Güliyeva 1500 manat miqdarında cərimə olunub. Könül Güliyeva apelyasiya şikayət verib. O, məhkəmənin həmin qərarının ləğv

edilməsini, ona qarşı qaldırılan inzibati xəta işi üzrə icraata verilməsini və işin gedişatına sərf olunan xərclərin faizlərlə birgə dövlət tərəfindən tam ödənilməsi barədə qərar qəbul edilməsini xahiş xahiş edib.

Onun şikayəti araşdırılması üçün Şəki Apelyasiya Məhkəməsinə göndərilib. Şikayət hakim Rövşən Rəfiyevin sədrliyi ilə araşdırılıb.

Könül Güliyeva bildirib ki, 4 avqust 2016-cı ildə məhkəmənin onun təqsirli bilinməyi ilə bağlı çıxardığı qərarı əsaslı sübutlar olmadığına görə düzgün deyil. Bundan əlavə, təqsirli bilinməyi onun Azərbaycan Respublikası Konstitusiyası da daxil olmaqla, Azərbaycan Respublikası qanunlarının, Avropa İnsan Hüquqları Məhkəməsinin izah etdiyi kimi Avropa İnsan Hüquqları Konvensiyasının Mülki və Siyasi Hüquqlar haqqında Beynəlxalq Paktın (MSHBP) və İnsan Hüquqları haqqında Ümumi Bəyannamənin (İHÜB) zəmanət verdiyi hüquqlarını pozur: “Mütəmadi olaraq Müqəddəs Kitabı (Tövrat, Zəbur və İncil) və Yehovanın Şahidlərinin nəşrlərini oxuyuram. Həmçinin mütəmadi olaraq Yehovanın Şahidlərinin dini yığıncaqlarında iştirak edirəm. Yehovanın Şahidlərinin məşğul olduğu dini fəaliyyətlə məşğul olsam da, hüquqi şəxs olan “Yehovanın Şahidləri” dini icmasının üzvü deyiləm”.

Könül Güliyeva qeyd edib ki, mərasim hələ başlamamış, təxminən saat 18:45-də yığıncaqda iştirak edənlərdən biri gəlib: “Həmin şəxs dedi ki, polislər gəlib. Dindaşım Xusişvili eyvana çıxdı və həyətdə 20-dən çox polis əməkdaşının olduğunu gördüm. Rəis müavini evin sahibinin kim olduğunu

soruşdu. Dindaşım Xusişvili ev sahibi olduğunu bildirdi. Rəis müavini Xusişviliyə xidməti vəsiqəsini göstərərək bildirdi ki, evdə axtarış aparmalıdırlar. Xusişvili ona toplaşmaqlarının səbəbini izah etdi. Otaqlardan birində Xusişvilinin 4 yaşında olan balaca qızı xəstə olduğuna görə yatırdı. Xusişvili polis əməkdaşlarından xahiş etdi ki, həmin otağa girməsinlər, çünki qızı onları görüb qorxa bilərdi. Polis dedi ki, axtarışı yalnız bir polis əməkdaşı keçirəcək, lakin otağa əvvəlcə biri, sonra isə daha 3-4 polis əməkdaşı və 1-2 nəfər şahid daxil oldu. Rəis müavini və cinayət-axtarış şöbəsinin əməkdaşı Manafov mülki geyimdə idilər. Qalanları isə polis formasında idilər. Onlar Xusişvilinin həyat yoldaşının, qızının və otaqların şəklini çəkdilər. Xusişvilinin şəxsi ədəbiyyatını və disklərini (disklərin çoxu cizgi filmləri idi) götürdülər və otaqlarda axtarışı bitirəndən sonra həyətə çıxdılar”.

Mühakimə olunan şəxsin sözlərinə görə, mərasimdə iştirak edənlərin hamısından Müqəddəs Kitablarını alıblar: “Digər nəşrlərlə yanaşı, yığıncaqda iştirak edənlərdən 21 ədəd Müqəddəs Kitab götürdülər. Polis əməkdaşları evin damına qalxdılar, lakin orada heç nə tapmayaraq aşağı düşdülər. Sonra polis əməkdaşları evin zirzəmisinə düşmək istədilər. Xusişvili də onlarla düşmək istədi, lakin Yol Polis Xidmətinin polis əməkdaşı onun qolundan tutaraq düşməyə qoymadı. Hər hansı bir icazələri olmadan polis əməkdaşları, Müqəddəs Kitab da daxil olmaqla, dini ədəbiyyatı müsadirə etdi. Bizə hələ də heç bir ədəbiyyat qaytarmayıblar.

Bundan əlavə, bəzi şəxsi əşyaları da, məsələn, dindaşı Xusişvilinin qızının cizgi filmləri olan disklərini də

götürdülər. Polis əməkdaşları üç avtobus çağırdılar və yığıncaqda iştirak edənlərin hamısını həmin avtobuslara oturdataq polis şöbəsinə apardılar. Azyaşlı uşaqlar ağlayırdılar, valideynləri ilə polis şöbəsinə getmək istəmirdilər. Saat 19:00-da polis şöbəsinə çatdıq. İkinci mərtəbəyə qalxaraq zala daxil olduq. Uşaqlar qorxudan bərk ağlayırdılar. Ümumilikdə, polis şöbəsində 56 nəfər idik. Yığıncaqda iştirak edənlərin hamısı skamyada oturdu. Sorğu-sual etmək üçün bizi iki-iki çağırırdılar. Təxminən saat 22:00-da saxlananların çoxunu buraxdılar, kişilərin isə bəzilərini şöbədə saxladılar.

Nəinki azyaşlı uşaqlar, bir qədər böyük uşaqlar və hətta biz də həmin gün baş verənlərdən qorxu keçirdik. Bizim hüquqlarımız kobudcasına pozulub. Polis tərəfindən saxlanıldıqda hər bir Azərbaycan vətəndaşının nədə ittiham olunduğunu bilmək və vəkillə əlaqə yaratmaq hüququ var. Lakin dinc dindar insanlara hüquqi yardım almağa icazə vermədilər. Yığıncaqda iştirak edənlərin bəzilərinin telefonlarını əllərindən aldılar və zəng etməyə icazə vermədilər. Polis əməkdaşları dini mərasimi pozmaq üçün başlamazdan bir az əvvəl evə soxuldular.

Nəticədə dindaşlarım ilə birgə dini mərasimi planlaşdırılmış vaxtda və yerdə keçirə bilmədik. İnzibati Xətalar Məcəlləsinin 515.0.4-cü maddəsi “dini qurumun qeydiyyatdan keçdiyi hüquqi ünvandan kənarda fəaliyyət göstərməsin”i nəzərdə tutur. Məni bu maddəni pozduğumu sübut edən heç bir dəlil yoxdur.

Yeganə dəlil odur ki, ibadətimin ayrılmaz hissəsi olan dini fəaliyyətlə məşğul idim, daha dəqiq desək, əqidəmi ifadə edirdim. Mənim 515.0.4-cü maddəni pozmaqda təqsirli bilmək üçün “dini qurumun qeydiyyatdan keçdiyi hüquqi ünvandan kənarda fəaliyyət göstərməsin”i pozduğunun sübutu olmalıdır.

Bundan əlavə, polis əməkdaşları evə soxulanda biz heç anma mərasiminə başlamamışdıq. Mənim inzibati xəta törətdiyim sübut olsa belə, məhkəmə, İnzibati Xətalar Məcəlləsinin 75.0.7 maddəsində tələb olunduğu kimi, “işin düzgün həlli üçün əhəmiyyətli olan digər halları, habelə inzibati xətanın törədilməsinə kömək edən səbəblər və şərait”i nəzərə almalıdır.

Həmin gün Xusişvilinin evində Müqəddəs Kitabı araşdırmaq üçün dinc dini yığıncağın keçirilməsi nəzərdə tutulmuşdu. Bu cür yığıncaqlar onun ibadəti üçün zəruridir. Xusişvilinin evində reyd keçirilməsi, sorğu-sual üçün polis şöbəsinə aparılmağım hüququm pozulub. Dindaşlarımla birlikdə alçaldıcı və təhqiredici rəftara məruz qalmışıq.

Hesab edirəm ki, ittiham olunmağım, təqsirli bilinməyim və dini ədəbiyyatın götürülməsi üçün qanuni əsas yox idi. İttiham olunmağım və təqsirli bilinməyim bu tələblərin heç birinə cavab vermir.

Bundan başqa, zorakılıq, nifrət və ya diskriminasiyaya təhrik edən hər hansı bir fikir söyləməyim barədə sübut yoxdur. Əksinə, 23 mart 2016-cı ildə Xusişvilinin evində dindaşlarım ilə birgə Müqəddəs Kitabı (Tövrat, Zəbur və İncil) oxumaq və araşdırmaq üçün dinc yığıncağın keçirilməsi nəzərdə tutulub.

Birinci instansiya məhkəməsinə təqsirli olduğumu təsdiq edən heç bir sübut təqdim olunmayıb. Polisin ümumiyyətlə heç bir dəlil gətirmədiyinə baxmayaraq, birinci instansiya məhkəməsi ittihamı rədd etməyib.

Qax Rayon Məhkəməsi tərəfindən işin ədalətli və tam şəkildə araşdırılması hüququndan məhrum olunmuşam. Ona görədə Qax Rayon Məhkəməsinin qərarının ləğv edilməsini, mənə qarşı qaldırılan inzibati xəta işi üzrə icraata verilməsini və işin gedişatına sərf olunan xərclərin faizlərlə birgə dövlət tərəfindən tam ödənilməsi barədə qərar qəbul edilməsini xahiş edirəm”.

Apelyasiya şikayətinin dəlillərini araşdıran hakim kollegiyası sonda qərar elan edib. Qərara görə, Könül Güliyevanın apelyasiya şikayəti təmin edilməyib.