Əlillərin Müdafiə Komitəsi gözdən əlilin qanunsuz həbsi ilə bağlı bir daha Vergilər nazirinə müraciət etdi

Əlillərin Müdafiə Komitəsinin Vergilər naziri Fazil Məmmədova ünvanladığı müraciətin surəti redkasiyamıza daxil olub. Müraciətdə gözdən əlillər Vergilər nazirindən narazılıqlarını ifadə ediblər.

Müraciətdə bildirilir ki, gözdən əlillər bir aydır ki, “Gündəm Xəbər” vasitəsilə nazirə müraciət ediblər: “Hörmətli nazir! Sizə Əlillərin Müdafiə Komitəsinin üzvü, hərbi xidmət zamanı gözdən əlil olan 2 körpə uşaq atası,Azərbaycan Ordusunun istefada olan zabiti Elyar İsrail oğlu İsmayılovun 11.11.2016-cı il tarixindən məhkəmə qərarı olmadan həbsdə saxlanmasının onun ölüm təhlükəsinə səbəb ola biləcəyindən yazmışdıq. Xahiş edirdik ki, onun zaminə buraxılmasına köməklik göstərəsiniz. 1 aydır ki, Vergilər Nazirliyi Aparatı “Vətəndaşların müraciətləri haqqında” qanunu yanlış izah və tətbiq edərək, konstitusion müraciət və qəbul olunma hüququmuza qadağa qoyub. Bizə bildirlir ki, sözügedən qanunun 6.6 maddəsinə əsasən, həbsdə olan şəxsin nümayəndəsi olmağımızı notarial qaydada təsdiq edən sənəd yoxdur. Ancaq bu maddənin yanlış tətbiq edilməsi göz önündədir. Birincisi, həbsdə olan şəxslə necə müqavilə bağlayaq? İkincisi, biz həbsdə olan gözdən əlilin nümayəndəsi kimi yox, öz adımızdan Sizə müraciət edib, qəbul olunmağımızı diləyirik. Görünür, müraciətimiz Sizə verilmir, ona görə də KİV yolu ilə bird aha müraciət etməyi qərara aldıq”.

Nazirə müraciət edən gözdən əlillər bildirirlər ki, Fazil Məmmədov və onun rəhbəri olduğu nazirliyin Aparatı Qarabağ əlillərinə, şəhid ailələrinə, sahibkarlara bəzən diqqət və qayğı göstərsələr də, yerlərdə isə bəzi üzdəniraq vergi əməkdaşları əlil, şəhid ailələrinin dərman, çörək puluna göz dikiblər: “Bu barədə Sizə bilgi verəndə hüquqi, insanlıq yardımınızı göstərmisiniz.Di gəl,vurğuladığımız kimi,11 noyabr 2016-cı il tarixində axşam saatlarında gözdən əlil Elyar İsmayılovun qanunsuz, insanlığa sığmayan şəkildə həbsinə hələ də reaksiyanız yoxdur. Bəli, Elyar İsmayılovun həbsi həm qanunsuzdur, həm də insanlığa ziddir. Birincisi, heç kimin, özəlliklə vergi əməkdaşının kimisə yaşayış, iş yerindən akt, protokol tərtib etmədən, qərar olmadan zorla aparıb, həbs etmək hüququ yoxdur. Həbs etmə səlahiyyəti yalnız məhkəməyə aiddir. İkincisi, Konstitusiyanın 61-ci maddəsinə görə, tutulan anda şəxs müdafiəçiylə təmin olunmalıdır. Ana Qanunun 63-cü “Təqsirsizlik prezumpsiyası” maddəsinə görə, məhkəmənin qanuni qüvvəyə minmiş qərarı olmadan heç kim cinayətdə təqsirli sayıla bilməz. Vergi orqanı isə gözdən əlilin təqsirli olması barədə məhkəmə qərarı olmadan iformasiya yayıb. Üçüncüsü,gözdən əlil, 2 körpə uşaq atası barədə həbs qətimkan tədbirinin seçilməsi də qanunsuz olması ilə yanaşı, insan hüquqlarına və əsas azadlıqlara tüpürməkdir. Fikir verin, əlil barəsində həbs tədbiri seçilməsi saxlandıqdan 7 gün sonra - 17.11.2016-cı ildə qərara alınıb. Əlilə verilən qərarda isə Yasamal məhkəməsinin hakimi Sərdar Mehrəliyevin 12.11.2016-cı il tarixli 4(004)-1119/2016 nömrəli qərarı ilə həbs seçildiyi yazılıb. Bu qərarın saxtalığı göz önündədir. Tutaq ki, vergi müstəntiqi bilmir, hakim Sərdar Mehrəliyev də bilmir ki, cinayət işlərində qərarın nömrəsi üçrəqəmli olur? 12.11.2016 tarixli qərarın nömrəsi axı dördrəqəmlidir! Belə çıxır,ya Sərdar Mehrəliyev köhnə tarixə saxta savadsız qərar çıxarıb,ya da müstəntiq onun adından qərar qəbul edib. İstənilən halda hakimiyyətin mənimsənilməsi dövlətə qarşı ən ağır cinayətdir. Məhkəmələrin həbs seçilməsində rüşvəti əsas tutmaları günümüzün gerçəyidir. Bəs vergi müstəntiqinə nə gəlib? İstintaq orqanı hansı əsasla gözdən əlili, 2 körpə uşaq atasını şəxsi mülahizəsi əsasında cinayətdə təqsirli bilib, həbs seçib?Axı hələ heç bir sübut-dəlil yoxdur. Müstəntiqlərin Konstitusiyanı,Cinayət Prosessual Məcəlləni (CPM) oxuması daha məntiqli olar, nəinki gözyumulu gözdən əlilə həbs cəzasə vermək. Ali Qanunda da, CPM-də də yazılıb ki, təqsirli şəxs təqsirsizliyini sübuta yetirməyə borclu deyil, ifadə verməyə məcbur edilə bilməz, heç bir ifadənin, dəlil-sübutun məhkəmə üçün öncədən qəbul edilmiş qüvvəsi yoxdur. İstintaqın məhkəməyə təzyiqi də söz konusudur. Fikir verin, sanksiyasında cərimə də nəzərdə tutulan maddə ilə təqsirləndirilən 2 körpə uşaqlı gözdən əlilə aşağı-yuxarı instansiyalar istintaqın
təzyiqilə həbs qərarı verirlər. Müstəntiqin “sübutu” isə qanunsuz idman mərc oyunlarından 14 ay ərzində gözdən əlilin 168 min manat gəlir əldə etməsidir. Sual olunur:14 ay qanunsuz mərc oyunları 2 ay qabaq işə başlayan köşkdə necə keçirilə bilər? Bəs bura nəzarət edən vergi orqanı,polis, prokuorluq, Maliyyə Bazarlarına Nəzarət Palatası, Gənclər və İdman Nazirliyinin (GİN), İqtisadiyyat Nazirliyinin (İN) müvafiq qurumları hara baxırdı? Belə çıxır ki, bu qurumlar nəyinsə qarşılığında ya göz yumublar,ya da oyun olmayıb. İndi müstəntiq hansı əsasla Vergilər Nazirliyi də daxil olmaqla bağlantılı qurumları da şübhə altına alıb? Bir daha bildiririk ki,16.09.2016-cı il tarixində biz Nazirlər Kabineti, Gənclər və İdman Nazirliyi, DİN,Vergilər Nazirliyini bilgiləndirməklə idman mərc oyunlarının keçirilməsinə lisenziya-razılıq verilməsi üçün müraciət etmişik və 1 ay müddətində cavab verilmədiyindən (11.11.2016-da) fəaliyyətə başlamağımız icazəli sayılır. Qanunun tələbi belədir. Gənclər və İdman Nazirliyindən 22.11.2016-cı il tarixli və (NK-dan göndərilən müracəitə) 29.11.2016-cı il tarixli məktubla cavab verilərək “Azəridmanservis”” MMC-yə tapşırıq verilib və MMC-dən bildirilib ki, lisenziya hüququ yalnız TOPAZa məxsusdur, sahibkar kimi onunla müqavilə bağlaya bilərik. (Bu məktubları Sizə yazılı müraciətimizə əlavə etmişik və istintaq orqanına da təqdim olunub). Gənclər və İdman Nazirliyindən bildirilib ki, idman mərc oyunlarının keçirilməsinə nəzarəti Maliyyə Bazarlarına Nəzarət Palatası həyata keçirir. Göründüyü kimi, gözdən əlil sahibkarın fəaliyyəti qanunsuz olmayıb, əksinə onun sahibkarlıq fəaliyyətinə qanunsuz qadağa qoyulub.Onu da vurğulayım ki, bütün dövlət qurumları əlillərin işlə təminatı, sahibkarlıq fəaliyyəti üçün şərait yaratmağa borcludur. Gözdən əlilin valyuta dəyişmə, idman mərc oyunu kimi nisbətən asan, rahat fəaliyyətlə məşğul olmasına dövlət özü şərait yaratmalıdır, nəinki onun dərman, çörək puluna göz dikib həbsdə öldürülməsinə. Necə olur, keçmiş ƏƏSM naziri əlillərə “ayaqqabı silmək biznesi” təşkil edirdi, indi də əlillər ağır şəraitdə nəqliyyat nəzarətçisi, tikinti və s. ağır işlərdə çörək pulunu qazanır, amma belə otaq şəraitində işlərə baş qoşanda məhbəslə mükafatlandırılırlar? Guya gözdən əlil 168 min manat gəlir əldə edib. Bəs hanı bu 168 min manat? Gözdən əlilin 2 körpə uşaqlı ailəsi niyə kirayələrdə qalır? Lap tutaq ki, gəlir 168 min olub, axı, dövlətə dəyən ziyan nə qədərdir? Sadələşdirilmiş vergi yolu ilə dövlətə cəmi 6720 manat ziyan dəyməsini hesablamaq belə çətindir? Buna görə gözdən əlilə ölüm hökmü çıxarılmalıdır?”

Sonda müraciətdə bildirilir: “Hörmətli nazir! Gözdən əlil Elyar İsmayılovun həyatı təhlükədədir. Onun qan təzyiqi 180-dən aşağı düşmür. Sizdən bizi qəbul edib, gözdən əlilin barəsində həbs qətimkan tədbirinin başqa tədbirlə əvəz olunmasına yardımçı olmağınızı diləyirik”.

Məğrur
gundemxeber.az