Turan Informasiya Agentliyinin direktoru Mehman Əliyev "Tikintilərin dövlət reyestrinə daxil edilən məlumatların tərkibi, həmin məlumatların təqdim edilməsi və reyestrin aparılması qaydaları"nın ŞTM-ə uyğunlaşdırılması üçün təxirəsalınmaz tədbirlər görməyini baş nazir Artur Rasizadəyə ünvanlanan məktubda xahiş edmişdir.

Məktubda geyd olunur ki, “son illər fərdi mənzil tikintisi prosedurunun sadələşdirilməsi üzrə dövlət səviyyəsində müxtəlif təşəbbüslər irəli sürülüb və həyata keçirilib. Sonuncu belə qərar qanunvericiliyə 14 oktyabr 2016-cı il tarixində məlumatlandırma icraatı haqqında dəyişikliklərin edilməsi oldu. Həmin vaxt prezident İlham Əliyev Şəhərsalma və Tikinti Məcəlləsinə dəyişikliklər edilməsi haqqında qanunu imzalayıb. Bu dəyişikliklərə əsasən, fərdi tikinti həyata keçirən şəxsin müraciətinə icra hakimiyyəti tərəfindən baxılması müddəti 30 gündən 10 günə endirildi. Həmçinin, İH-yə tikinti həyata keçirmək istəyən şəxsin təqdim etdiyi müraciətə yazılı cavab vermək, habelə, əgər ona qarşı iradlar varsa, onları yazılı və ətraflı şəkildə əsaslandırmaq barədə mütləq tələb irəli sürülüb.

Amma tikilmiş mənzil üzərində hüquqların sənədləşdirilməsi zamanı Dövlət Əmlak Komitəsi tikinti həyata keçirən şəxsdən İcra Hakimiyyətinin tikintiyə verdiyi icazəsini təqdim etməyi tələb edir. Bu zaman DƏK Nazirlər Kabinetinin 12 yanvar 2015-ci il tarixli 4 nömrəli "Tikintilərin dövlət reyestrinə daxil edilən məlumatların tərkibi, həmin məlumatların təqdim edilməsi və reyestrin aparılması qaydaları"na, daha dəqiq isə, onun 3.1.1-ci bəndinə istinad edir.

Qaydaların tələbi ŞTM-nin tikinti üçün icazə tələb etməyən 80-ci məlumatlandırma icraatı maddəsinə ziddir. Beləliklə, Qanunun Qaydalar üzərində üstünlüyünü nəzərə alaraq, bu ziddiyyət aradan qaldırılmalı və Qaydaların 3.1.1-ci bəndindən "Tikinti icazəsinin surəti" tələbi çıxarılmalı, yaxud onun məlumatlandırma icraatına şamil edilmədiyi qeyd edilməlidir”.