Yeni romantik-komediya filmi olan “Nazlı” aprelin 27-dən tamaşaçıların görüşünə gələcək.

Film incə-mincə, müasir bir xanımın şəhərdən uzaq, ucqar bir kənddə başına gələn hadisələrdən bəhs edir.

Nazlı çox ağıllı və savadlı olmasına rəğmən, daha çox şıltaqlığa, dəbdəbəli yaşamağa, gecə klublarına, bahalı həyat tərzinə üstünlük verir. Nazlının atası Şamil ağır təbiətli, yaşına hörmət edən, adət-ənənəyə sadıq, ciddi biznesmendir. Qızının ailə həyatı qurması üçün əlindən gələni edir.



Ancaq ailə həyatı Nazlının planlarına daxil deyil. Nazlının növbəti gecə gəzintisindən sonra Şamilin səbri tükənir. O, qızının qarşısına şərt qoyur: Nazlı ya ailə quracaq, ya da var-dövlətdən məhrum olacaq...



Filmdə rolları xalq artistləri Rasim Balayev, Fuad Poladov, Arif Quliyev, Məbud Məhərrəmov, əməkdar artistlər Mehriban Xanlarova, Nahidə Orucova, aktyorlar Ülvi Həsənli, Qorqud Cəfərli, Xumar Səlimova oynayır.



“Nazlı” nın quruluşçu rejissoru Rəhman Rafiqoğlu, quruluşçu operator Əli Sultanov, geyim üzrə rəssamı Mehriban Əfəndidir. Filmin baş produseri Murad Məhərrəmlidir.



gundemxeber.az filmin yenicə təqdim olunan treylerini təqdim edir.