Dövlət Sosial Müdafiə Fondunun Laçın rayon şöbəsinin korrupsiyası

gundemxeber.az Bir qrup Laçın qaçqını Tia.az saytının elektron ünvanına müraciət edib öz dərdlərini geniş şəkildə qeyd ediblər. Adlarının çəkilməsini istəməyən şəxslərin müraciətini təqdim edirik:
«Hal-hazırda Laçın rayonunun ərazisi bədnam adlandırdığımız qonşularımızın əsarətində inləyir, didərgin düşmüş əhalisi isə adı çəkilən qonşularımızdan o qədər də fərqlənməyən məmurların əsarətində qiyamət gününün məşəqqətlərini andıran ələmyesir həyatı yaşamaqdadır. Hətta ünvanlarına çatdırılmasa da, dünyanın müxtəlif yerlərindən bu ələmyesirlərə yardımlar da göndərilir. Elə zənn etməyin ki, Laçının və laçınlıların pis günləri bunlarla bitir. Əsla!
Azərbaycan Respublikasının Dövlət Sosial Müdafiə Fondunun Laçın rayon şöbəsinin rəhbərliyi öz ağlı çərçivəsində Laçın rayonunun ələmyesir əhalisini hansısa meyarla parçalayaraq təbəqələrə bölüşdürmüşdür. 2012-ci ilin oktyabr ayında onlar ələmyesir əhalinin özlərinə yaxın hesab etdikləri təbəqəsinin təqaüdlərini təxminən oktyabr ayının 25-26-da ödədilər, özlərinə yad hesab etdərək yadlaşdırdıqları təbəqəsinin isə təqaüdlərini hələ də ödəmirlər. Adı çəkilən qurumun rəhbərliyi bəyan edir ki, pul yoxdur, (görəsən dövlətin təqaüd üçün nəzərdə tutduğu pullar haraya xərclənib?) guya, bu işdə günahkar Laçın rayon təhsil şöbəsinin rəhbərliyidir. Çünki, Laçın rayon təhsil şöbəsinin rəhbərliyi hələ bu vaxta qədər rayon müəllimlərinin və məktəb işçilərinin sentyabr və oktyabr ayları üçün əməkhaqqılarını ödəməyib.
İnsafən, bu işdə günahkar Laçın rayon təhsil şöbəsinin rəhbərliyi də deyil, rayon müəllimləri və məktəblərin işçiləridir. Məgər, Laçın rayonunun müəllimləri və məktəblərin işçiləri növbəti ildə rayon məktəblərinin şəbəkələrinin təsdiq etdirilməsi üçün Laçın rayon təhsil şöbəsinin rəhbərliyinə lazım olan məbləğdə pulu toplayıb ödəyib ki, onlar da əməkhaqqıları ödəsinlər?
Məhz, bu ödənişdən sonra Azərbaycan respublikasının Dövlət Sosial Müdafiə Fondunun Laçın rayon şöbəsinin rəhbərliyinin ağlı çərçivəsində Laçın rayonunun ələmyesir əhalisinin yadlaşdırılmış təbəqəsinin təqaüdlərini ödəmək mümkün olar. Vay o günə ki, hüquqi cəhətdən tamamilə savadsız olan bu ələmyesirlərdən birinin demoqoqluğu tuta, bu maskaradlar haqqında harasa nəsə yaza və hüquq-mühafizə orqanları ənənəvi üsullarla onların yazdıqlarını yalana çıxara. Bax onda Laçın rayonun məhkəməsinin hakimi mütəşəıkkil həmrəylik nümayiş etdirib həmin yazıları vəzifəli məmurların şərəf və ləyaqətini alçaldan yalan məlumatlar hesab edəcək , 20-30 min manat AZN-i böhtançı qayırdığı ələmyesirlərdən alaraq həmin məmurlara ödətdirməklə onların ürküdülmüş şərəf və ləyaqətini bərpa edəcək ki, başqa ələmyesirlər də da bundan dərslərini alacaqlar. Bəs nəcə? Adam ağıllı olub insafla danışar. Biz hansı dövrdə yaşayırıq axı?!
Görəsən, Laçın rayonunda təqaüdlərin və əməkhaqqılarının ödənilməsi əməliyyatlarında yaradılmış bu təmənnalı problemlər dən Azərbaycan respublikası Laçın rayon İcra Hakimiyyətinin, Dövlət Sosial Müdafiə Fondunun və Təhsil Nazirliyinin xəbəri yoxdurmu ki, ödəmə proseslərinin vaxtında həyata keçirilməsində tərəflərə köməklik gös tərsinlər? Daha bir də ədalət məhkəməsi işə qarışıb ədaləti bərpa etmək üçün ələmyesirləri bir daha ələmyesirləşdirməsin».