Mobil operatorun vətəndaşlardan oğlurladığı milyonlar

«Azercell» mobil telefon şəbəkəsi ölkədə ən bahalı şəbəkədir. Ötürmə və qəbuletmə qabiliyyəti daha güclü olduğu üçün, ölkə vətəndaşlarının əksəriyyəti məhz «Azercell»-i seçirlər və beləliklə də bu şəbəkə sahiblərinin aylıq təmiz gəliri milyonlarla ölçülür. Amma bu milyonlar onlar üçün «köynəy»ə bəs etsə də, ayıb yerlərini örtmək üçün «tumana» bəs etmir. Yəqin ki, oxucular anladılar-söhbət «Azercell» mobil telefon şəbəkəsindən gedəcək. Ölkə vətəndaşlarının çoxları kimi mən də «Azercell» müştərilərindən biriyəm.
29 oktyabr 2012-ci il tarixdə təxminən saat 16-17 radələrində telefonuma «balansdan tutulma» siqnalı gəldi. Telefona baxdıqda balansımdan 2 manat 60 qəpik silindiyini gördüm. Çox təəccübləndim: axı mən heç yana zəng etməmişdim, nəyə görə bu pulu məndən tutdular? Sumqayıt şəhərinə yaxın olan bağda qaldığım üçün səhərisi gün , yəni 30.10.12 tarixində mən Sumqayıta getdim və Mərkəzi Poçt yaxınlığındakı «Azercell» Müştəri Xidmətlərinə müraciət etdim. Çox böyük nəzakətlə məni qəbul edən «Azercell» təmsilçisi mənim şikayətimi qeydə aldı və kompyuterlə mərkəzə sorğu göndərdi. Az sonra telefonuma məlumat gəldi ki, «şikayətiniz araşdırılacaq və sizə məlumat veriləcək». Bir sutkadan sonra «Azercell» in 65100 xüsusi xidmət telefonundan çox zəif eşidilə bilən səslə cavan oğlan belə dedi: «Siz 29.10.12 tarixdə gün ərzində ölkədaxili zənglər etmisiniz, ona görə də bu məbləğ balasınızdan silinib». Ha çalışdımsa mənlə danışanı başa salım ki, mən heç kimə zəng etməmişəm və söhbət heç də «gün ərzində» yox son istifadədən gedir, o sanki məni eşitmirmiş kimi əlaqəni kəsdi. Bir tərəfdən məni maraq götürdü, digər tərəfdən isə məni axmaq yerinə qoymaqları mənə çox pis təsir etdi və bu səbəbədən 02.11.12 tarixində müraciət etdiyim Müştəri Xidmətinə getdim. Bu dəfə məni təmsilçi Emil Musayev eyni nəzakətlə qəbul etdi. Nə baş verdiyini ətraflı surətdə ona danışdım və xüsusi qeyd etdim ki, birinci dəfə müraciət edəndə mən telefonuma gələn «Son istifadə 2,60 AZN, balans -0,80 AZN» yazını pozmadan əvvəlki təmsilçiyə göstərmişdim. Onu da qeyd edim ki, 29.10.12 tarixində tək bircə dəfə zəng etmişəm və bunun üçün işə məndən «son istifadə» olaraq 0.18 manat balansımdan silinib. Elə isə bu nə «son istifadəsi»dir? Emil bəy bir xeyli vaxt kompyuteri «qurdaladıqdan» sonra başladı mənə nağıl versiyaları danışmağa: Ola bilsin ki, Siz danışdıqdan sonra telefonu söndürmək yadınızdan çıxıb . Sual etdim: tutalım ki, yadımdan çıxıb (bu qətiyyən mümkün deyil, çünki hamı qəpiyinin qədrini bilir), bəs qarşı tərəf, o da yadından çıxarıb, telefonu danışıq üstə qoyub? sualına isə belə cavab verdi: Ola bilər, və yaxud cibinizdə təsadüfən düyməni basmısınız və qarşı tərəf telefonu açıb, bu minvalla da 2.60 manatlıq danışıq vaxtı gedib . Mən bir az da utrirovat edərək soruşdum : Yəni qarşı tərəf səs eşitmədiyi halda belə, saat yarım telefonu qulağında saxlayacaq? sualıma isə Ola bilər cavabını verdi. Artıq bunu heç şəhr etmək mümkün deyil. İnsan nə qədər məntiqsiz olmalıdır ki, belə ifadəni dilə gətirsin.
Bütün bunlardan sonra xahiş etdim ki, heç olmasa hansı nömrə ilə mənim 2.60 manat danışdığımı mənə desin. Emil bəy bu xidmətin ödənişli olduğunu, yəni gərəkdir ki, 1.06 manat mənim telefonumdakı balansımdan tutulsun, ancaq onda məlum olar ki, axrıncı 15 gün ərzində mən hansı nömrələrə neçə saniyə ərzində neçə manat ödənişlə zəng etmişəm. Deməli «Azercell» cibimə girdiyi azmış kimi, onun fırıldağına nə «don» geyindiyinə baxmaq üçün mən yenə nəsə ödəməliyəm. Çarə yox, bu fırıldağın məntiqli axırına çatmaq üçün razı oldum. Bu dəfə Emil bəy bəyan elədi ki, onun işlədiyi kompyuterdə hansısa texniki problem var, əgər mən həmin ödənişli cədvəli almaq istəyirəmsə, onda gərək gedim Sumqayıt şəhəri Birinci mikrorayondakı Müştəri Xidmətlərinə. Getdim, tapdım. İçəri girdikdə gördüm burada məni elə birinci dəfə qəbul edən cavan oğlan oturub. Soruşdum: «Yadınızdadırmı, mənim telefonumdakı yazı son istifadə-2.60 AZN? təmsilçi təsdiqlədi. Bir sözlə, o cədvəli çıxartdı, təbii ki, balansımdan 1.06 manat silinməklə və cədvəldən aydın olur ki, mən guya saat 1348 dən başlayaraq, saat 1607-ə qədər müxtəlif nömrələrə zəng etmişəm yəni 4 dəfə zəng etmişəm. Bunlardan isə yalnız biri 070-lə başlayan nömrə düzdür. Qalan 3 zəng isə qondarmadır. 29.10.12- tarixdə olan zəng haqqında nə mənim telefonumun yaddaşında etdiyim zənglər siyahısında, nə də göstərilən nömrələrin qəbul olunan zənglər siyahısı yaddaşında heç bir məlumat yoxdur. Mənə kontur-arqument gətirirlər ki, mən göndərdiyim zəngləri yaddaşdan silə bilərəm, yaxşı, bəs onda mən zəng etdiyim abonentlər necə, onlar da yaddaşdan mənim zəngimi siliblər? Bu suala cavab tapa bilməyən təmsilçi təzədən araşdırma üçün sorğu tərtib etdi və mərkəzə göndərdi, çünki elə onun yanında mənim guya zəng etdiyim nömrəmi yığaraq, xahiş etdim ki, qəbul olunan, zənglərin siyahısını yoxlasın, 29 oktyabrda məndən ona zəng gəlibmi. O yoxladı və əlaqə saxlayaraq bildirdi ki, 29 oktyabrda nə məndən ona, nə də ondan mənə zəng olmayıb. Təmsilçi özü də bu araşdırmaya şahid olduqdan sonra təzə sorğunu tərtib etdi. Bu sorğudan isə hələki bir xəbər yoxdur.
Bax belə, əziz oxucurlar, damla-damla, qəpik-qəpik (10-15 qəpik) «Azercell» adlı, «əjdaha» öz abonentlərinin cibinə girərək, mövcud olmayan danışıq üçün pul çıxarır və bizim isə bundan heç xəbərimiz də olmur.
İndi gəlin bir balaca riyazi hesablama aparaq görək yüksək tarifli telefon danışıqlarımızdan başqa «Azercell» cibgirləri vətəndaşların cibindən nə qədər pul çıxarırlar.
Deməli belə: əgər qəbul etsək ki, ümumən abonentlərin sayı 1 500 000-dir və orta hesabla hər ay hərəmizin cibinə ikicə manat girirlərsə, onda «Azercell» cibgirləri hər ay bizim cibimizdən nə az, nə çox 3 000 000 manat pulu elə-belə «za bud zdorov» çıxarırlar.
«Azercell» təmsilçiləri mənim narazılığımın qarşısında mənə təklif edirlər ki, mən onları məhkəməyə verim. Əgər mən «Azercell» mobil operatorunu məhkəməyə versəm, birincisi, mən 20 manat rüsum ödəməliyəm ki, məhkəmə işi araşdırmaya götürsün, ikincisi isə kəmsavad məhkəmə hakimlərinin rüşvət almadan heç bir işi araşdırmayacağını hamı gözəl bilir. Ən yaxşı halda isə hakim «Azercell»-i məndən oğurladığı 2,80 manatı mənə qaytarılması haqda hökm çıxaracaq. Bunu «Azercell» əməkdaşları çox gözəl bildikləri üçün, narazı müştərilərə məhkəməyə müraciət etmələrini çox arxayıncasına təklif edirlər. Bilirlər ki, 2-3 manat üçün heç kəs 20 manatından və boş yerə itirməli olacağı vaxtından keçməyəcək.

Fərrux Süleymanov

P.S. Hörmətli «Azercell» abonentləri, sizi bilmirəm, amma mən millətin cibinə girən bu mobil operatordan gedəsi oldum.