Salyanda evlərin sənədləşdirilməsi üçün 1500 manat tələb olunur
Salyandan bir qrup şikayətçi məktubu ünvanlayıb. Onlar hələ 2011-ci ildə aldıqları evlərin sənədlərinin olmamasından narazılıq edirlər. Narazı rayon sakinlərinin bildirdiklərindən belə aydın olur ki, 2010 –cu ilin dekabr ayının 30-da Heydər Əliyev Fondunun təşəbbüsü ilə Salyan şəhərində salınmış yeni yaşayış massivində açılışı olan evlər rayonun müxtəlif sakinlərinə verilib: “Həmin ərazidə birmərtəbəli 167 ev inşa olunmuşdur ki, bunlardan 6-sı dörd otaqlı, 29-u üç otaqlı, 131-i iki otaqlı, biri isə bir otaqlıdır. Səkkiz küçədən ibarət olan şəhərcikdə 5 kilometr uzunluğunda daxili yollar asfaltlanıb. Şəhərcik daxilində 3 min 755 metr qaz xətti və 2 min metr içməli su xətti çəkilib, 49 müasir işıqlandırma dirəyi quraşdırılıb. Qəsəbə tam şəkildə mavi yanacaq və elektrik enerjisi ilə təmin olunmuş, sayğaclaşdırma işləri başa çatdırılıb. Ümumilikdə, 5 min 600 kvadratmetr ərazidə yaşıllıq zolağı salınıb, 12 min ağac və bəzək kolları əkilib”.
Yəni, bir sözlə, yaşayış üçün hər şey olsa da məhz Salyan rayon icra hakimiyyətinin başçısı Tahir Kərimovun iştahası sakinlərin evlərini sənədləşdirə bilməsini əngəlləyir. Sakinlər bildirir ki, bu proses üçün ən az istənilən rüşvət məbləği 1500 manatdır.
Sakinlərin sözlərinə görə, əgər onlar qanuni evlərinə sənədləşə bilməzlərsə, o zaman builki prezident seçkilərində də seçici kimi iştirakları mümkün olmayacaq.
Onu da bildirək ki, həmin evlərin inşasının yarısı keçmiş icra başçısı Əlağa Hüseynovun vaxtına təsadüf edir ki, bu inşaat zamanı həyata keçirilən maxinasiyaların nəticəsi olaraq “yuxarıların” “gözlərinə kül üfürməyi” bacaran keçmiş icra başçısı deputat mandatı əldə etməyə müvəffəq oldu.
Fərid