Xaçmazda dövlət proqramı necə puça çıxarılıb?

gundemxeber.az Azərbaycanın şimal bölgəsində, daha dəqiqi Xaçmaz rayonunun Çiləgir kəndində sakinlər deyirlər ki, imkanları olsa, qışı fəsillər siyahısından silərlər. Çünki bu mövsümdə onlar yaşadıqları mənzilləri isitmək üçün özlərinin deməsinə görə, min bir əzab çəkirlər. 500-ə yaxın ailənin yaşadığı kənddə qaz sistemi hələ də quraşdırılmayıb. Əhali gözləyir ki, qonşu kəndlərdəki qazlaşdırma işləri nə vaxt Çiləgirə də gəlib çatacaq...
Sakinlərdən Bədəl Hüseynov deyir ki, qaz olmadığından kənd əhalisi meşələrə üz tutmaq məcburiyyətində qalır. Buna görə də meşələrdə seyrəlmə gedir. Hətta nadir ağaclar da kəsilir: «Hər tərəfə qaz çəkiblər, bu kəndə yox. Bunu çəkən adam görəsən nə düşünür? Necə olur ki, ətraf kəndlərə qaz çəkirlər, bura yox? Bu meşəliyi görürsünüz? Çox gözəl meşəlikdir. Orda gözəl istirahət mərkəzləri etmək olardı. Ancaq baxın, nə günə qalıb? Bundan əvvəl meşəyə girəndə çaqqal-canavar görməzdin, indi az qala təpiklə vurursan, qaç, mən gəlirəm. Meşədə meşəlik qalmayıb ki, canavar-çaqqal ağac tapıb gizlənsin».
Kənd sakini odun almaq üçün min əziyyətə qatlaşmaqlarından danışır: «Kənddə fındıq istehsalı ilə məşğul olan sexlər də var. Orda «QAZ-53»lə satılan odunun bir maşını 100 manata başa gəlir. Bunun üçünsə adımızı siyahıya yazdırmalıyıq, növbəyə dayanmalıyıq. O odunu zülmlə alırıq. Bir kəndli qışı yola vermək üçün azı 2-3 maşın almalıdır».
Kəndin başqa sakini Həbib Məmmədov isə deyir ki, büdcələri heç odun alıb ocaq qalamağa da imkan vermir. Aldıqları odunu isə qətrə-qətrə işlədirlər ki, tükənməsin: «Əhali öz cibindən pul verib alır, evləri qızdırmaq üçün. O da baha olduğu üçün işlətmir. Biz də insanıq axı, istəyirik isti evdə yaşayaq».
Xaçmaz rayon Qaz İdarəsinin rəisi Pərviz Fətiyev isə çiləgirlilərə bir qədər də dözməyi tövsiyə edir: - «Orda 7 kənd birdir, 3 kənd də bir, hamısında qazlaşma işləri başlayıb. Layihədə Çiləgir kəndinin də adı var. O kəndin adı 2013-cü ilin proqramında var.
Çiləgirin qazlaşdırılması məsələsi «Regionların sosial-iqtisadi inkişafına dair» 2009-2013-cü il Dövlət Proqramına salınıb. Elə, çiləgirlilər də deyirlər ki, 2013-cü ilə bir ay qalıb, ancaq hələ də heç bir iş görülməyib. Buna görə də çox ümidsizdirlər.

Cəmil Məmmədli