Rusiyada azərbaycanlı iş adamı Vaqif Məmişevin ailə imperatorluğuna daxil olan şirkətlərdən birinin ofisində axtarış aparılmasının təfərrüatları məlum olub. Axtarış külli miqdarda fırıldaqçılıqla bağlı açılan cinayət işi ilə əlaqədardır.
Məlumata görə səhər saat 9:30-da başlayaraq gecəyə qədər davam edən axtarış Moskva prospekti- 129 ünvanında yerləşən binada aparılıb. Əməliyyatda Daxili İşlər Nazirliyinin iqtisadi təhlükəsizlik və korrupsiyaya qarşı mübarizə üzrə İdarəsinin 10-a yaxın əməkdaşının iştirak etdiyi bildirilir.

Polis binaya daxil olarkən axtarış üçün orderi təqdim edib və buna görə də müqavimətlə qarşılamayıb. Bildirilib ki, axtarış bu ilin martında külli miqdarda fırıldaqçılıqla bağlı açılan cinayət işinin istintaqı çərçivəsində aparılır. Polis binada olduğu müddətdə mühasibatlıq sənədləri ilə tanış olub.

Polis hətta əməliyyat zamanı İnzibatı Xətalar Məcəlləsinin 8.2-ci maddəsinin pozulması, yəni pəncərədən zibilin aşağıya atılması faktını da sənədləşdirib. Buna görə 2 min rubl cərimə nəzərdə tutulsa da, pəncərədən atılan zibilin sənədlər olduğu iddia edilir.

Axtarış aparılan ofis binanın ikinci mərtəbəsində geniş ərazini tutub. Ofisdən götürülən mühasibatlıq sənədlərinin vergi cinayətləri ilə məşğul olan bölməyə aparıldığı bildirilir. Bununla belə iddia olunur ki, bütün əlaqədar qurumlar bu barədə mətbuatda hər hansı məlumatın yer almaması üçün xüsusi canfəşanlıq göstəriblər.

İlkin məlumatlara görə, tədqiqat Leninqrad vilayətinin Vsevolojski rayonunda 2009-2010-cu illər ərzində aparılan tikinti işləri və bu zaman yol verilən maliyyə pozuntuları ilə əlaqədardır. Söhbət 500 milyon rubldan gedir. Məsələ ilə bağlı bu ilin martında Cinayət Məcəlləsinin 159-cu maddəsi ilə cinayət işi açılıb. Apreldə isə “Paktum”, “Audit Aktiv- M” kimi şirkətlərdə axtarış aparılıb. “Audit Aktiv- M” şirkətinin Məmişev ailəsinin biznes-imperiyası ilə müəyyən əlaqəsi olduğu deyilir. Hələ 2009-cu ildə bu şirkət Vaqif Məmişov rəhbəri, Asif və Vasif adlı iki kiçik qardaşının isə səhmdarı olduğu şirkətin rəsmi auditoru kimi tanınıb.

Aparılan axtarışlardan sonra sözügedən auditor şirkətinin baş direktoruna qarşı ittiham irəli sürülüb və ondan ölkədən çıxmamaq barədə iltizam alınıb.

Başqa bir məlumata görə, V.Məmişevə yaxınlığı ilə tanınan, “Stepan Razin” pivə kombinatının eks-rəhbəri Giya Qviçiya tədqiqat komissiyası ilə Vaqif Məmişov arasında münasibət yaratmağa çalışıb.

Vaqif Məmişevin maddi imkanı həddindən artıq yüksək olmasına baxmayaraq, onun adına ancaq 23 yaşı olan “ВАЗ-21093” markalı maşın qeydiyyatdadır.


***
13:23

Rusiya polisi iyulun 10-da ölkənin tanınmış iş adamlarından biri Azərbaycanlı milyarder Vaqif Məmişevin ofisində axtarış aparıb. “Fontanka” saytının məlumatına görə, məsələ külli miqdarda fırıldaqçılıqla bağlı ittihamlarla əlaqədardır.
Məlumata görə, gecə saatlarında mühasibatlıq sənədlərinin yükləndiyi mikroavtobus axtarış aparılan binadan uzaqlaşıb. Sayt iddia edir ki, polislərin “dəvətsiz” gəldikləri və axtarış aparılan bina Sank-Peterburqun tanınmış iş adamı Vaqif Məmişova məxsusdur.

Ancaq azərbaycanlı milyarderin ofislərindən birinin yerləşdiyi binada axtarış aparılması xəbərinə rəsmi dairələrdən münasibət almaq mümkün olmayıb. Rəsmi dairələrdən Sergey Umnov, Mixail İlin, Aleksey Brilliantov, Aleksandr Mixaylova edilən müraciətlər cavabsız qalıb. Adı çəkilən şəxslərdən heç biri iş başında olmayıb və məzuniyyətdə olduqlarını bildiriblər.
Təkcə polis rəisi Konstantin Vlasov mətbuatın sualını cavablandırıb. Ancaq o da cavabında “Məmişev kimdir?” deyib.
Qeyd edək ki, Vaqif Məmişev tikinti və lizinq şirkətlərinin daxil olduğu “Konrad” şirkətlər qrupunun sahibidir. O həmçinin Sankt-Peterburq Azərbaycanlılarının Milli-Mədəni Muxtariyyətinin sədri, bir çox dövlət mükafatlarını laureatıdır. Ona hətta “Vətənə xidmətinə görə” ordeni də verilib. Ancaq iddialara görə, araşdırmalar onun birbaşa özü ilə yox qardaşı Asiflə əlaqədardır.